ءبىر اپتا بۇرىن جۇكتى ايەل دەنساۋلىعىنا شاعىمدانىپ, №2 كوپبەيىندى قالالىق اۋرۋحاناعا جەدەل جاردەممەن جەتكىزىلدى. وندا ونىڭ باس سۇيەگىنە مرت جاسالدى. تەكسەرۋ كەزىندە 32 جاستاعى جۇكتى ايەلدە مي ىسىگى انىقتالدى.
ناۋقاس ۇلتتىق نەيروحيرۋرگيا ورتالىعىنا, مي پاتولوگيالارىنىڭ نەيروحيرۋرگياسى بولىمشەسىنە جاتقىزىلدى. دارىگەرلەر ەمدەۋ تاكتيكاسىن انىقتاپ, انا مەن بالا ءۇشىن بارلىق ىقتيمال قاۋىپتەردى تالقىلاۋ ءۇشىن تەز ارادا كونسيليۋم جينادى. اۋرۋحاناعا جاتقىزعان كەزدە ايەلدىڭ جۇكتىلىك مەرزىمى 26 اپتادان جاڭا اسقان ەدى. وعان «كلينيكالىق دەكومپەنساتسيا, ىشكى وككليۋزيالىق گيدروتسەفاليا كەزەڭىندەگى مي قىسىمىمەن سول جاقتاعى كوپىر-ميشىق بۇرىشىنىڭ ىسىگى» دياگنوزى قويىلدى.
ء«بىز ناۋقاسقا شۇعىل وپەراتسيا جاسادىق, ارەندت بويىنشا سول جاقتامالىق جابىق سىرتقى ءتۇسىرۋ درەناجى, سودان كەيىن نەيرومونيتورينگتى قولدانا وتىرىپ, كوپىر-ميشىق بۇرىشىنىڭ ىسىگىن ميكروحيرۋرگيالىق جولمەن الىپ تاستادىق. كولەمى 5*5,5 سم بولاتىن ۇلكەن ىسىك ميدى قىسىپ, ناتيجەسىندە ايەلدىڭ كورۋ قابىلەتى ناشارلاي باستاعان, تالتىرەكتەپ ءجۇرۋ جانە باسقا دا بۇزىلۋلار پايدا بولعان. وپەراتسيانىڭ قيىندىعى ىسىك مي باعاناسىندا ورنالاسقان, مۇنداي جاعدايلاردا ميدىڭ ومىرلىك ماڭىزدى بولىكتەرىنە زاقىم كەلتىرمەۋ وتە ماڭىزدى», دەدى نەيروحيرۋرگ دارىگەر مۇراتبەك تىلەۋبەرگەنوۆ.
شۇعىل وپەراتسيادا قۇرامىندا تاجىريبەلى انەستەزيولوگ, نەيروفيزيولوگ, ترانسفۋزيولوگ دارىگەرلەر بولعان دارىگەرلەردىڭ مۋلتيديستسيپلينارلىق كومانداسى جۇمىس ىستەدى. سونداي-اق وپەراتسيا شارانانىڭ جاي-كۇيى مەن ونىڭ جۇرەك سوعىسىن فۋنكتسيونالدىق باعالاۋدى تۇراقتى جۇرگىزۋ ماقساتىندا شاراناعا كتگ باقىلاۋى جۇرگىزىلدى.
«ماعان وسىنداي كۇردەلى وتا جاساعان دارىگەرلەرگە العىسىمدى بىلدىرەمىن. ولاردىڭ ءبارى مەن ءۇشىن الاڭدادى, مەنىڭ جانە بالامنىڭ ءومىرىن قۇتقارۋدا ۇلكەن الاڭداۋشىلىق سەزىمى بولدى. مەن نەيروحيرۋرگيا ورتالىعى ورنالاسقان ەلوردادا تۇراتىنىما قۋانامىن, وپەراتسيا وتە تەز, شۇعىل وتكىزىلدى. ەندى تەز قالپىما كەلەمىن دەپ ۇمىتتەنەمىن, قۇدايعا شۇكىر, كورۋ قابىلەتىم قالپىنا كەلە باستادى. ازداپ جۇرە باستادىم. وپەراتسيا جاساعان جانە مەنىڭ ءومىرىم مەن بالامدى قۇتقارۋعا قاتىسقانداردىڭ بارلىعىنا ۇلكەن العىسىمدى بىلدىرەمىن!» دەدى ناۋقاس.
شامامەن 5 ساعاتقا سوزىلعان وتا ءساتتى اياقتالدى. بۇل وپەراتسيا پاتسيەنتكە تەگىن, ياعني ءمامس شەڭبەرىندەگى كۆوتا بويىنشا جۇرگىزىلدى. كۇردەلى وپەراتسيانى مي پاتولوگيالارىنىڭ نەيروحيرۋرگياسى بولىمشەسىنىڭ مەڭگەرۋشىسى نۇرجان رىسكەلديەۆ, نەيروحيرۋرگ دارىگەر مۇراتبەك تىلەۋبەرگەنوۆ, انەستەزيولوگ دارىگەر ورازعالي قۇرمانباەۆ, نەيروفيزيولوگ دارىگەر ساۋلە وتەۋوۆا جانە ابۇعو اكۋشەرستۆو بولىمشەسىنىڭ مەڭگەرۋشىسى بەرىك پىرىمبەتوۆ جاسادى.
دارىگەرلەر اتاپ وتكەندەي, قازىر انا مەن بالانىڭ ومىرىنە ەشقانداي قاۋىپ جوق, ايەل جۇكتىلىگىن جالعاستىرۋدا.
