ءال-ازھار شەيحى مەشىت جاماعاتىنا بىرلىك پەن بەيبىتشىلىكتىڭ قادىرى, يسلام قۇندىلىقتارى, مۇسىلمان ۇمبەتىنىڭ رۋحاني تۇتاستىعى جايلى ناسيحاتىن جەتكىزدى.
«يسلام – تەرروريزم ءدىنى ەمەس. ەكەۋى وت پەن سۋ سەكىلدى ەكى بولەك ۇعىم. اسىل ءدىنىمىز الەم حالقىن بەيبىت ءومىر سۇرۋگە جانە اۋىزبىرشىلىككە ۇندەيدى. ءدىننىڭ دىننەن, ۇلتتىڭ ۇلتتان, ادامنىڭ ادامنان ارتىقشىلىعى جوق. بارلىعى دا – اللانىڭ قۇلدارى. سوندىقتان اينالاڭىزداعى ادامداردى جاقسىلىققا, ىنتىماققا, بىرلىككە شاقىرىڭىزدار», دەدى جوعارى مارتەبەلى يمام احمەت تايىپ.
سونداي-اق ءال-ازھار شەيحى قازاق دالاسىنان شىققان ويشىل ءابۋ ناسىر ءال-فارابي باستاعان ءدىن عۇلامالارى يسلامدى الەمگە دارىپتەگەنىن, سول ءبىلىمنىڭ شاراپاتى اراب حالقىنا دا تيگەنىن ايرىقشا اتاپ ءوتىپ, سول ءىلىم يەلەرىنىڭ اسىل ەڭبەگى ءۇشىن قازاق حالقىنا العىسىن ءبىلدىردى.
ۋاعىزدان كەيىن قمدب توراعاسى, باس ءمۇفتي ناۋرىزباي قاجى تاعان ۇلى قازاقى قوناقجايلىقپەن شەيح احمەت تايىپتىڭ يىعىنا شاپان جاۋىپ, يسلام ءدىنىنىڭ دارىپتەلۋىنە, ءدىني ءبىلىم مەن عىلىمنىڭ دامۋىنا ەرەكشە ۇلەس قوسقان تۇلعالارعا بەرىلەتىن ءدىني باسقارمانىڭ «شاراپات» مەدالىمەن ماراپاتتادى.
ايتا كەتەيىك, ءال-ازھار شەيحىنىڭ جۇما ۋاعىزىنا 20 مىڭنان استام ادام قاتىستى.
سونىمەن قاتار نۇرسۇلتان نازارباەۆ ء«ال-ازھار» ۋنيۆەرسيتەتىنىڭ باس يمامى شەيح احمەد ات-تايەبپەن كەزدەستى. كەزدەسۋ استاناداعى باس مەشىتتە وقىلعان جۇما نامازىنان سوڭ بولدى.
قازاقستاننىڭ تۇڭعىش پرەزيدەنتى قازاقستان مەن مىسىر اراسىندا قارىم-قاتىناس ورناتۋ بارىسى, سونىڭ ىشىندە جوعارى ءبىلىم بەرۋ سالاسىنداعى بايلانىستار تۋرالى ءوز ەستەلىكتەرىن ورتاعا سالدى.
نۇرسۇلتان نازارباەۆ سونداي-اق احمەد ات-تايەبتىڭ سەزدە سويلەگەن ءسوزىنىڭ نەگىزگى تەزيستەرىنە قولداۋ ءبىلدىرىپ, دىندەر كوشباسشىلارى اراسىنداعى اشىق ديالوگتى قامتاماسىز ەتۋدىڭ ماڭىزدى ەكەنىنە توقتالىپ ءوتتى.
