«كەشە ۇجىمدىق قاۋىپسىزدىك تۋرالى شارت ۇيىمىنىڭ كەزەكتەن تىس كەڭەسىندە ارمەنيا پرەمەر-ءمينيسترى ۇقشۇ-عا مۇشە ەلدەردىڭ باسشىلارىنا ازەربايجان مەن ارمەنيا شەكاراسىنداعى جاعداي تۋرالى مالىمەت بەردى. جالپى اقپارات قابىلداندى, ارينە, ءبىز وبەكتيۆتى اقپارات العىمىز كەلەدى. ويتكەنى ەكى تاراپتان اركەلكى اقپارات ءتۇسىپ جاتىر. سوندىقتان مەملەكەت باسشىلارى ۇقشۇ باس حاتشىسى وقيعا ورنىنا بارىپ, تولىققاندى مالىمەت الىپ, سول مالىمەتتى مەملەكەت باسشىلارىنا بايانداۋى كەرەك دەگەن شەشىم قابىلداندى», دەدى مۇحتار تىلەۋبەردى الەمدىك جانە ءداستۇرلى دىندەر ليدەرلەرىنىڭ VII سەزىنىڭ جالپى وتىرىسى بارىسىندا.
سونداي-اق ول ەكى ەل اراسىنداعى شەكارانىڭ بۇزىلعانى تۋرالى قانداي دا ءبىر پىكىر ايتۋ قيىن ەكەنىن جەتكىزدى.
«قازىرگى ءبىرىنشى مىندەت - ازەربايجان-ارمەنيا شەكاراسىن دەليميتاتسيالاۋ جانە دەماركتسيالاۋ جونىندەگى كوميسسيانىڭ جۇمىسىن جانداندىرۋ. ءبىز ءوز تاجىريبەمىزبەن بولىسۋگە ءازىرمىز. ويتكەنى ءبىز قۇرلىقتا جانە ءتىپتى تەڭىزدە دە ءوز شەكارامىزدى دەماركاتسيالاپ العانبىز. رەسەيدەن باسقا بۇكىل كورشىلەس مەملەكەتتەرمەن شەكارامىزدى دەماركاتسيالاۋ ءىسى تولىق اياقتالعان», دەدى سىرتقى ىستەر ءمينيسترى.
سونداي-اق مۇحتار تىلەۋبەردى رەسەي فەدەراتسياسىنىڭ پرەزيدەنتى ۆلاديمير پۋتين قازاقستانعا قاشان كەلەتىنىن ايتتى.
«رەسەي پرەزيدەنتى قازاقستانعا ازياداعى ءوزارا ءىس-قيمىل جانە سەنىم شارالارى جونىندەگى كەڭەسكە قاتىسۋ ءۇشىن كەلەدى. سونداي-اق تمد مەملەكەتتەرى باسشىلارىنىڭ كەڭەسىن وتكىزۋ جوسپارلانۋدا. رەسەي پرەزيدەنتى قازاقستانعا قازان ايىنىڭ ورتاسىندا كەلۋى مۇمكىن. قازىر رەسمي راستاۋدى كۇتىپ وتىرمىز», دەدى مۇحتار تىلەۋبەردى.
پرەمەر-ءمينيستردىڭ ورىنباسارى ءوز سوزىندە قازاقستان قايتالاما سانكتسيالارعا ۇشىرامايتىنىن اتاپ ءوتتى.
«بىزدە رەسەيگە قارسى سانكتسيالاردىڭ ءبىزدىڭ ەكونوميكامىزعا تەرىس اسەرىن بولدىرماۋ, ونىڭ ىشىندە قايتالاما سانكتسيالارعا جول بەرمەۋ ءۇشىن ۇكىمەتتىك جۇمىس توبى قۇرىلدى. بۇگىندە اتالعان جۇمىس توبى تابىستى جۇمىس ىستەۋدە, ەۋروپالىق كوميسسيامەن جانە اقش اكىمشىلىگىمەن تۇراقتى كونسۋلتاتسيالار جۇرگىزىلۋدە», دەپ قوستى سىرتقى ىستەر ءمينيسترى.
ەسكە سالا كەتسەك, قازاقستان پرەزيدەنتى قاسىم-جومارت توقاەۆ 2022 جىلعى تامىزدا سوچيگە جۇمىس ساپارى اياسىندا ۆلاديمير ءپۋتيندى قازاقستاندا قازان ايىندا وتەتىن تمد سامميتىنە قاتىسۋعا شاقىرعان ەدى.
