ساراپشىلاردىڭ ايتۋىنشا, 2022 جىلعى قاڭتار-شىلدە ايلارىندا ديزەل وتىنىن ءوندىرۋ كولەمى 3,1 ملن توننانى قۇرادى. بۇل بارلىق ۋاقىتتاعى ءتيىستى كەزەڭنىڭ ەڭ جوعارى كورسەتكىشى بولىپ ەسەپتەلىنەدى. وتكەن جىلدىڭ ۇقساس كەزەڭىمەن سالىستىرعاندا ديزەل وتىنىن ءوندىرۋ 9,2%-عا ءوستى.
ەنەرگەتيكا ءمينيسترى بولات اقشولاقوۆتىڭ ايتۋىنشا, وسى جىلعا ديزەل وتىنىن ءوندىرۋ بولجامى 5,2 ملن توننانى قۇرايدى, بۇل 2021 جىلمەن سالىستىرعاندا 300 مىڭ تونناعا ارتىق جانە 2020 جىلمەن سالىستىرعاندا 600 مىڭ تونناعا ارتىق بولادى دەگەن ءسوز.
2022 جىل بويىنشا ديزەل وتىنىن تۇتىنۋ بولجامى شامامەن 5,5 ملن توننانى قۇرادى, بۇل 2020 جىلمەن سالىستىرعاندا 500 مىڭ تونناعا جانە وتكەن جىلمەن سالىستىرعاندا 90 مىڭ تونناعا ارتىق.
تامىز ايىندا ەگىن جيناۋ ناۋقانى باستالار الدىندا قازاقستان ديزەل وتىنىنىڭ تاپشىلىعىنا تاپ بولدى. ەلىمىزدىڭ بارلىق وڭىرلەرىن ديزەل وتىنىمەن ۇزدىكسىز قامتاماسىز ەتۋ ماسەلەسىن شەشۋ ءۇشىن ارنايى كوميسسيا قۇرىلدى, ول جاعدايعا تەرىس اسەر ەتكەن فاكتورلاردى انىقتادى. نەگىزگى سەبەپتەردىڭ ءبىرى تۇتىنۋدىڭ, سونداي-اق ترانزيتتىك كولىكتىڭ ايتارلىقتاي ءوسۋى دەپ اتالدى.
ەسكە سالا كەتسەك, ۋاقىتىلى شارالار قابىلداماعانى ءۇشىن «قازمۇنايگاز» ۇك اق باسقارما توراعاسى ماعزۇم مىرزاعاليەۆ پەن ەنەرگەتيكا ۆيتسە-ءمينيسترى اسەت ماعاۋوۆقا قاتاڭ سوگىس جاريالاندى.
«2022 جىلدىڭ تامىز ايىنىڭ قورىتىندىسى بويىنشا ديزەل وتىنىنىڭ قۇنى ءبىر ايدا ورتاشا ەسەپپەن 0,7%-عا ءوستى. باتىس قازاقستان جانە اقتوبە وبلىستارىندا ديزەل وتىنى قىمباتتادى: تيىسىنشە 3,5% جانە 3,4%. شىعىس قازاقستان وبلىسىندا باعا 2,9%-عا قىمباتتادى. 2021 جىلدىڭ تامىزىمەن سالىستىرعاندا ءبىر جىل ىشىندە ديزەل وتىنى 35,5%-عا قىمباتتادى. وڭىرلەر بويىنشا باعانىڭ ءوسۋى الماتى وبلىسىندا 15,4%-دان اقمولا وبلىسىندا 58,4%-عا دەيىن وزگەرەدى. تامىز ايىنىڭ قورىتىندىسى بويىنشا ەلىمىزدە جازعى ديزەل وتىنىنىڭ ءبىر ءليترىنىڭ ورتاشا بولشەك ساۋدا باعاسى 238 تەڭگەنى قۇرادى. ەڭ جوعارى باعالار قوستاناي مەن پەتروپاۆلدا ء(بىر ءليترى ءۇشىن 260 تگ), ەڭ تومەن باعا - اقتاۋدا ء(بىر ءليترى ءۇشىن 225 تگ) تىركەلدى», دەلىنگەن زەرتتەۋدە.
