مەملەكەت باسشىسىنىڭ تاپسىرماسىن ورىنداۋ ماقساتىندا, سونداي-اق بۇقارالىق سپورتتى دامىتۋدىڭ باسىمدىعىن ەسكەرە وتىرىپ, دەنە شىنىقتىرۋمەن جانە سپورتپەن شۇعىلداناتىن ازاماتتاردىڭ سانىن ارتتىرۋ ماقساتىندا نۇر-سۇلتان قالاسىندا ارنايى باعدارلامالار مەن ءتۇرلى جوبالار وتكىزۋ جوسپارلانعان.
قالالىق دەنە شىنىقتىرۋ جانە سپورت باسقارماسىنىڭ باسشىسى سپورت باعىتىندا قولعا الىنعان ءىس-شارالار جونىندە تولىعىراق ايتىپ بەردى.
«قولجەتىمدى سپورت» جوباسى 2021 جىلدىڭ جەلتوقسان ايىنىڭ سوڭىنا دەيىن جالعاسىپ, 20 مىڭعا جۋىق ەلوردا تۇرعىنىن قامتىدى. 2022 جىلدىڭ ءساۋىر ايىنان باستاپ اتالعان جوبا قايتادان قولعا الىندى. اتالعان جوبا ەلوردا تۇرعىندارىن سپورتتىڭ 5 تۇرىنە باۋليدى. جوباعا بىلىكتى نۇسقاۋشىلار مەن جاتتىقتىرۋشىلار جۇمىلدىرىلدى. ولار قالا ساياباقتارى مەن تىنىم باقتارىندا ساباق وتكىزەدى. جوبا 2022 جىلدىڭ جەلتوقسان ايىنىڭ سوڭىنا دەيىن جالعاسادى. قالا تۇرعىندارى ءۇشىن سكانديناۆيالىق ءجۇرىس, جۇگىرۋ, كاراتە, ۇستەل تەننيسى, فيتنەس جانە يوگا سياقتى سپورت تۇرلەرى قولجەتىمدى بولادى», دەپ اتاپ ءوتتى باسقارما باسشىسى.
سپيكەر بريفينگ بارىسىندا AulaFit جوباسى جايلى اقپارات بەردى.
«2020 جىلعى 25 مامىردان باستاپ نۇر-سۇلتان قالاسىندا #AulaFit باعدارلاماسىنىڭ پيلوتتىق جوباسى قۇرىلىپ, ىسكە قوسىلدى. تۇرعىن ءۇي كەشەندەرىنىڭ تۇرعىندارى سپورتپەن قادامدىق قولجەتىمدىلىكتە, سونداي-اق تەگىن نەگىزدە اينالىسا الادى. اعا بۋىن, جاستار مەن بالالار كۇن سايىن سپورتپەن شۇعىلدانادى, بوس ۋاقىتتارىن, دەمالىستارىن قىزىقتى جانە پايدالى وتكىزەدى, پسيحولوگيالىق قولداۋ الادى», دەدى سامات جىلقىباەۆ.
ونىڭ ايتۋىنشا, ەلوردادا «Asar Joly» اكتسياسى دا ءوتىپ جاتىر.
«وسى باعدارلامالار اياسىندا ەلوردادا فۋتبول, ستريتبول سياقتى سپورتتىق ويىن تۇرلەرى بويىنشا اۋلا ليگالارى وتكىزىلدى. سونىمەن قاتار حالىقتىڭ سپورتپەن شۇعىلدانۋىنا دا بارلىق جاعداي جاسالىنعان. ناقتىراق ايتساق, قالادا 18 سپورت كەشەنى, 1500 جانە ودان دا كوپ ورىندىق تريبۋناسى بار ستاديون, 27 باسسەين, قۇراما كوماندالاردى دايىنداۋ ورتالىقتارى جانە سول سياقتى 44 تەننيس كورتى بار. بۇكىلالەمدىك پاندەمياعا بايلانىستى سپورتتىق ءىس-شارالاردىڭ توقتاتىلعانىن ەسكەرە وتىرىپ, ەلوردا تۇرعىندارىنىڭ سپورتقا دەگەن قىزىعۋشىلىعىن ارتتىرۋ ماقساتىندا ءار اي سايىن جۇگىرۋ جانە ۆەلوجۇگىرۋدەن ونلاين جارىستار ۇيىمداستىرعان ەدىك. قالا تۇرعىندارى وزدەرىنە قولايلى ۋاقىتتا, كەز-كەلگەن ساياباقتا جۇگىرىپ, قورىتىندىسىمەن «ستراۆا» قوسىمشاسى ارقىلى بولىسە الادى», دەدى اكىمدىك وكىلى.
ايتا كەتسەك, قالا تۇرعىندارى مەن قوناقتارى اسىعا كۇتەتىن, قالىپتاسقان ءداستۇرلى سپورتتىق شارالار دا وتكىزىلىپ كەلەدى. ماسەلەن, دزيۋدودان ازيا چەمپيوناتى, «قازاقستان بارىسى» رەسپۋبليكالىق ءتۋرنيرى, ساداق اتۋدان حالىقارالىق تۋرنير, بۇركىتشىلەردىڭ حالىقارالىق ءتۋرنيرى, فۋتبولدان «نۇر-سۇلتان قالاسى اكىمىنىڭ كۋبوگى» رەسپۋبليكالىق تۋرنير, ەلوردا كۇنىنە وراي وتەتىن بايگە تۇرلەرىنەن جارىس, بۇقارالىق ۆەلوشەرۋ جانە قىسقى ماۋسىمدىق جارىستار, گيمناستيكادان رەسپۋبليكالىق چەمپيونات, جاسوسپىرىمدەر اراسىندا ەركىن كۇرەستەن ج.ۇشكەمپىروۆ اتىنداعى حالىقارالىق ءتۋرنيرى, «بۇرقاسىن» قىسقى فەستيۆالى, ترياتلوننان ازيا چەمپيوناتى, «قىسقى ترياتلون» جارىسى, جەڭىل اتلەتيكادان حالىقارالىق ءتۋرنيرى, ت.ب.
