«ايتسە دە, اقپان مەن ناۋرىزدا ساۋدا بىلتىرعى دەڭگەيدەن اسىپ ءتۇستى. قاڭتاردا, ساۋىردە جانە مامىردا كورسەتكىشتەر بىلتىرعى دەڭگەيدەن تومەن بولىپ شىقتى. ماۋسىمدا جاڭا اۆتوموبيلدەردىڭ ساۋداسى بىلتىرعى دەڭگەيگە جەتتى. ەلەكتروندى قۇرامداستاردىڭ تاپشىلىعى, جاھاندىق ينفلياتسيا, شىعىس ەۋروپاداعى گەوساياسي تۇراقسىزدىق پەن لوگيستيكالىق تىزبەكتىڭ بۇزىلۋى الەمدىك اۆتوموبيل نارىعىن ءالى دە قىسپاققا الىپ جاتىر. قازاقستان نارىعىنداعى جاعدايعا رەسەي فەدەراتسياسىنان اۆتوموبيلدەر مەن ماشينا جيىنتىقتارىن جەتكىزۋدىڭ كۇرت قىسقارۋى ۇلكەن اسەر ەتتى», دەلىنگەن ورتالىقتىڭ شولۋىندا.
وسىنداي جاعدايلاردان 6 ايدىڭ قورىتىندىسى بويىنشا جاڭا تەحنيكانىڭ جيىنتىق ساۋداسى 7,7 پايىزعا تومەندەگەنى بايقالدى. دەگەنمەن بۇعان دەيىن ايتىلعانداي, جەكەلەگەن ايلاردا ساۋدا بىلتىرعى دەڭگەيدەن اسىپ تۇسكەن. سونىمەن بىرگە قازاقستاندا جەرسىندىرىلگەن اۆتوموبيلدەردىڭ نارىقتاعى ۇلەسى 80 پايىزعا دەيىن ءوسىپ وتىر.
جالپى العاندا, الەمدىك نارىقتا 6 ايدىڭ قورىتىندىسى بويىنشا ساۋدانىڭ 8,5 پايىزعا تومەندەگەنى بايقالدى. بارلىعىن قوسقاندا جىل باسىنان بەرى الەمدە 38 ملن 468 مىڭ اۆتوموبيل ساتىلعان.
قازاقستاندىق ساتىپ الۋشىلاردىڭ سۇرانىسىنداعى بەس برەندتىڭ قاتارىندا Hyundai, Chevrolet, Kia, Lada, Toyota اۆتوموبيلدەرى بار. نارىقتاعى ۇزدىك بەستىكتىڭ قۇرامى وتكەن جىلمەن سالىستىرعاندا وزگەرگەن جوق. دەسەك تە Toyota-نىڭ ساۋداسى 35,6 پايىزعا تومەندەدى. ول سانكت-پەتەربۋرگتەن Camry مەن RAV4 مودەلدەرىن جەتكىزۋدىڭ توقتاۋىمەن بايلانىستى بولىپ وتىر.
2022 جىلدىڭ العاشقى 6 ايىنداعى ۇزدىك بەستىكتەگى ماركالاردىڭ ۇلەسى ەلىمىزدەگى جاڭا اۆتوموبيلدەرگە جالپى سۇرانىستىڭ 78,5 پايىزىن قۇرادى. بىلتىر بۇل كورسەتكىش 73,8 پايىزدى قۇراعان بولاتىن.
العاشقى جارتىجىلدىقتىڭ قورىتىندىسى بويىنشا وتاندىق كاسىپورىندار 51 565 بىرلىك تەحنيكا شىعاردى. ءوندىرىستىڭ ءوسىمى بىلتىرعى ءدال وسىنداي كەزەڭمەن سالىستىرعاندا 30 پايىزدى قۇرادى. ماشينا جاساۋ سالاسىندا اۆتوموبيل ءوندىرىسىنىڭ ۇلەسى 37,5 پايىزعا تەڭ بولدى. ءوندىرىسى 9,4 پايىزعا قىسقارعان جۇك اۆتوموبيلدەرىنەن وزگە تەحنيكالاردىڭ بارلىق ءتۇرى بويىنشا شىعارۋ كولەمىندە ءوسىم بار. كەدەندىك-تاريفتىك كەدەرگىلەردىڭ جەڭىلدەتىلگەنىنە قاراماستان كولىكتىڭ بۇل ساناتىندا يمپورت تا تومەندەدى. قازاقستاننىڭ اۆتوموبيل نارىعىنىڭ جاعدايىنا ايتارلىقتاي اسەر ەتەتىن ەلىمىزدىڭ كورشىلەرىندەگى ءوندىرىستىڭ ديناميكاسىنداعى وزگەرىستەردى اتاپ وتكەن ءجون. رەسەيدە 2022 جىلدىڭ التى ايىندا 281 مىڭ جەڭىل اۆتوموبيل شىعارىلعان, بۇل بىلتىرعى سايكەس كەزەڭدەگى كورسەتكىشتەن 61,8 پايىزعا تومەن.
بۇعان قوسا, جالپى العاندا, 2022 جانە 2023 جىلدارعا الەمدىك اۆتوموبيل ءوندىرىسىنىڭ بازالىق بولجامى 2,6 ملن-عا, سايكەسىنشە 81,6 ملن-عا جانە 88,5 ملن-عا دەيىن تومەندەتىلگەن.
1 شىلدەدەگى جاعداي بويىنشا قازاقستاندا 3 907 214 جەڭىل اۆتوموبيل تىركەلگەن. وسى كورسەتكىش بويىنشا ەسەپتىك كەزەڭدە 1,65 پايىزعا ءوسىم بايقالدى. 2021 جىلدىڭ 1 شىلدەسىندە تىركەلگەن اۆتوموبيلدەر پاركىندە 3 843 826 بىرلىك اۆتوموبيل بولدى.
حالىقتىڭ جەڭىل اۆتوموبيلدەرمەن قامتاماسىز ەتىلۋ پارامەترلەرى بويىنشا رەسپۋبليكانىڭ ءار 1 مىڭ تۇرعىنىنىڭ جەكەمەنشىگىندە ەسەپتىك كەزەڭدە 180 بىرلىك اۆتوموبيل بارى انىقتالدى. وڭىرلەر بويىنشا اۆتوموبيلدەندىرۋدىڭ ەڭ جوعارى دەڭگەيى الماتى وبلىسىندا تىركەلدى – 1 مىڭ تۇرعىنعا 231 اۆتوموبيل, ەڭ تومەنى تۇركىستان وبلىسىندا – 1 مىڭ تۇرعىنعا 76 اۆتوموبيل.
2022 جىلى اۆتوموبيل نارىعى ءالى دە جاھاندىق تاپشىلىق قىسپاعىندا وتىر. ول ءبىزدىڭ ەلىمىزدە رەسەي فەدەراتسياسىنان اۆتوموبيلدەر مەن ماشينا جيىنتىقتارىن جەتكىزۋدىڭ قىسقارۋىنا الىپ كەلدى. ورتالىقتىڭ قازاقستاندىق نارىقتاعى ءىرى ويىنشىلار اراسىندا جۇرگىزگەن ساراپشىلىق ساۋالداماسى ەكىنشى جارتىجىلدىقتىڭ ناتيجەلەلەرى نارىقتىڭ قاتىسۋشىلارىنىڭ بەيىندىلىگىمەن جانە ۆاليۋتا نارىعىنداعى جاعدايعا قاراي ايقىندالاتىنىن كورسەتكەن.
«كوپشىلىگى سوڭىن كۇتىپ وتىر. ءبىزدىڭ كليەنتتەرىمىز دە كۇتۋدە, مۇمكىن رۋبل ارزاندار, وندا باعا دا قالپىنا كەلەتىن بولادى. ءبىز تەك جاعدايعا يكەمدەلە الامىز. كليەنتتەر دە يكەمدەلەدى, بىرەۋلەر جۇرىلگەن كولىكتەردى تاڭدايدى, شۇعىل كولىك ساتىپ العىسى كەلەتىندەر بىزدەن الادى. ساۋدا توقتاپ قالدى دەپ ايتۋعا كەلمەيدى. ساۋدا ءجۇرىپ جاتىر, بىراق ول وتە باياۋ جۇرۋدە», دەپ حابارلادى «ۆيراج» كومپانيالار توبى.
Allur كومپانيالار توبىنىڭ حابارلاۋىنشا, الەمدەگى ساياسي-ەكونوميكالىق احۋالعا قاراماستان, نارىق ساۋدانىڭ قالپىنا كەلگەنىن كورسەتىپ وتىر. برەندتەر ءالى دە لوگيستيكالىق ۇدەرىستەردى رەتتەۋ ۇستىندە, ەكىنشى جارتىجىلدىقتا جاڭا اۆتوموبيلدەر ءوندىرىلىپ, جەتكىزىلەدى دەپ كۇتۋدەمىز, دەيدى ولار.
ء«بىرىنشى جارتىجىلدىققا قاراعاندا ەكىنشى جارتىجىلدىق الدەقايدا تابىستى بولادى. وعان ديستريبيۋتورلاردىڭ قابىلداپ جاتقان قارسى شارالارى كومەكتەسەدى. وتە وپتيميستىك جوسپارىمىز بار», دەيدى «Terra Motors» كومپانيالار توبىنىڭ وكىلدەرى.
«بارلىق قيىندىققا قاراماستان, 2022 جىلى Hyundai Trans Kazakhstan زاۋىتى تولىق قۋاتىنا كوشىپ, اۆتوموبيل ءوندىرىسىن ودان ءارى ارتتىرىپ, مودەلدەر قاتارىن كەڭەيتىپ جاتىر. «استانا موتورس» قۇرامىنداعى كەيبىر ديستريبيۋتورلارىمىز جاڭا لوگيستيكالىق باعدارلاردى قاراستىرۋدا, ويتكەنى جەكەلەگەن اۆتوموبيل برەندتەرى رەسەي فەدەراتسياسى ارقىلى ترانزيتپەن اۆتوموبيل تاسىمالداۋدى دوعاردى. وسىعان بايلانىستى قازاقستانعا اۆتوموبيل جەتكىزۋدە قيىندىقتار تۋىنداپ وتىر», دەيدى «استانا موتورس» وكىلدەرى.
اۆتونارىقتى تالداۋ جانە مونيتورينگىلەۋ ورتالىعىنىڭ الدىن الا باعالاۋى بويىنشا ساۋداداعى قازىرگى ديناميكا ساقتالىپ, لوگيستيكا جۇمىسى رەتتەلەتىن بولسا, نارىق بىلتىرعى دەڭگەيگە تاعى 10 پايىز ءوسىم كورسەتەتىن بولادى. ال بولجامنىڭ ورىندالۋ ىقتيمالدىعى ەلدەگى ماكروەكونوميكالىق جاعدايعا جانە قۇرامداستار مەن تەحنيكانى تۇراقتى جەتكىزىلۋىنە بايلانىستى بولماق.
