مادەني ءىس-شاراعا پارلامەنت سەناتىنىڭ توراعاسى, الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى ماۋلەن اشىمباەۆ قاتىستى.
«الداعى سەزد سانى جاعىنان عانا ەمەس, قاتىساتىن ءدىن ليدەرلەرىنىڭ مارتەبەسى مەن دەڭگەيى جاعىنان دا تاريحي ءىس-شارا بولماق. فورۋمعا قاتىسۋ ءۇشىن الەمنىڭ 50-دەن استام ەلىنەن 100-دەن استام دەلەگاتسيا كەلەدى. سەزدە بەيبىتشىلىكتى قامتاماسىز ەتۋگە, ديالوگ پەن ىنتىماقتاستىق يدەولوگياسىن ىلگەرىلەتۋگە قاتىستى ماسەلەلەر تالقىلانادى. قازىر الەمدە ساياسي داعدارىس ورىن الىپ وتىر. كوشباسشىلاردىڭ كەلىسسوزدەر جۇرگىزۋى جانە ىمىراعا كەلۋى قيىن ماسەلەگە اينالدى. وسىنداي جاعدايدا رۋحاني كوشباسشىلاردىڭ بىرلەسىپ جۇمىس ىستەۋگە جانە الەمنىڭ ءار تۇكپىرىندەگى وزەكتى ماسەلەلەردى كوتەرىپ, ولاردى شەشۋگە دەگەن ۇمتىلىسىن ايرىقشا اتاپ وتكەن ءجون», دەدى ماۋلەن اشىمباەۆ ءوز سوزىندە.
ايتا كەتسەك, الەمدىك جانە ءداستۇرلى دىندەر ليدەرلەرىنىڭ VII سەزىنە وراي ۇيىمداستىرىلعان ءىس-شارادا «ەڭ كوپۇلتتى وركەستر» اتالىمى بويىنشا جاڭا الەمدىك رەكورد تىركەلدى. جاڭا رەكورد گيننەس كىتابىنا ەنگىزىلدى.
سەنات توراعاسى ءىس-شارانى ۇيىمداستىرۋشىلار مەن مۋزىكانتتاردى جاڭا رەكوردتىڭ تىركەلۋىمەن قۇتتىقتادى.
«مادەنيەت پەن ونەر ۇلتىنا, دىنىنە جانە الەۋمەتتىك جاعدايىنا قاراماستان ادامداردى بىرىكتىرۋشى كۇشكە يە. بۇگىن ءبىز تاريحي وقيعانىڭ كۋاسى بولدىق. رەكوردتىڭ الەمدىك جانە ءداستۇرلى دىندەر ليدەرلەرىنىڭ VII سەزى قارساڭىندا تىركەلۋى دە ايرىقشا مانگە يە. بۇل – ءبىزدىڭ ەلىمىز ءۇشىن عانا ەمەس, بۇكىل الەم ءۇشىن, اسىرەسە, قازىرگىدەي قيىن-قىستاۋ كەزەڭدە ماڭىزدى وقيعا. جاڭا جوبانىڭ تۇپكى ماقساتى VII سەزدىڭ يدەولوگيالىق باعىتىمەن تولىق ۇندەسەدى. ول – ديالوگ, ىنتىماقتاستىق جانە الەمدەگى قازىرگى وزەكتى پروبلەمالاردى بىرلەسىپ شەشۋ سياقتى باسىمدىقتار», دەپ اتاپ ءوتتى سەنات توراعاسى.
ايتا كەتسەك, گيننەس كىتابىنا ەنگەن «ەڭ كوپۇلتتى وركەستردىڭ» قۇرامىندا 75 ەتنوستىڭ وكىلدەرى بار. ولاردىڭ بارلىعى رەسپۋبليكالىق جانە حالىقارالىق كونكۋرستاردىڭ لاۋرەاتتارى اتانعان.
