مەملەكەت باسشىسىنىڭ وسى جىلعى 1 قىركۇيەكتەگى قازاقستان حالقىنا جولداۋىندا ايتىلعان تاپسىرماسىن ورىنداۋ ماقساتىندا الەۋمەتتىك ساقتاندىرۋ جۇيەسىن دامىتۋدىڭ وسى جانە باسقا دا شارالارى قر الەۋمەتتىك كودەكسىنىڭ جوباسىندا قاراستىرىلادى.
قولدانىستاعى زاڭناماعا سايكەس جۇمىستان بوساتىلىپ جانە جۇمىسسىز رەتىندە تىركەلگەندەر مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە جانە سوڭعى 24 ايداعى تابىسىنا بايلانىستى جۇمىسىنان ايىرىلۋ بويىنشا 1 ايدان 6 ايعا دەيىن الەۋمەتتىك تولەمدەر الادى. بۇل تولەم جوعالعان تابىستىڭ 40%-نا دەيىنگى مولشەردە ماسق قاراجاتى ەسەبىنەن جۇزەگە اسىرىلادى.
«پرەزيدەنت تاپسىرماسىن ورىنداۋ ءۇشىن قر الەۋمەتتىك كودەكسىنىڭ جوباسىندا جۇمىسىنان ايىرىلعان جاعدايدا تولەنەتىن الەۋمەتتىك تولەمنىڭ مولشەرىن ەسەپتەۋ ءۇشىن تابىستى الماستىرۋ كوەففيتسيەنتىن 40-تان 45%-عا دەيىن ارتتىرۋ كوزدەلگەن. ناتيجەسىندە, وسى تولەمدەردىڭ مولشەرى ورتا ەسەپپەن 13%-عا ۇلعايتىلادى», دەلىنگەن ۆەدومستۆو حابارلاماسىندا.
وسى ورايدا جۇمىس بەرۋشىلەردىڭ ماسق-كە ولاردىڭ قىزمەتكەرلەرى ءۇشىن الەۋمەتتىك اۋدارىمدار مولشەرلەمەسىنىڭ بەلگىلەنگەن مولشەرى وزگەرىسسىز قالاتىنىن اتاپ ءوتۋ ماڭىزدى.
اتالعان قۇجاتتا تابىستى جوعالتۋ بويىنشا الەۋمەتتىك تاۋەكەلدەردىڭ بارلىق 6 ءتۇرى بويىنشا, اتاپ ايتقاندا: جۇمىسىنان ايىرىلۋ, ەڭبەككە قابىلەتتىلىگىنەن ايىرىلۋ, اسىراۋشىسىنان ايىرىلۋ, جۇكتىلىككە جانە بوسانۋعا بايلانىستى تابىسىنان ايىرىلۋ, جاڭا تۋعان بالانى اسىراپ الۋعا بايلانىستى تابىسىنان ايىرىلۋ, بالا ءبىر جارىم جاسقا تولعانعا دەيىن ونىڭ كۇتىمىنە بايلانىستى تابىسىنان ايىرىلۋ جاعدايىندا جۇمىسپەن قامتىلعان حالىقتى مىندەتتى الەۋمەتتىك ساقتاندىرۋمەن قامتۋدى كەڭەيتۋ كوزدەلگەن.
الەۋمەتتىك ساقتاندىرۋ جۇيەسىنە جۇمىسشىلاردىڭ كەلەسى ساناتتارىن قوسۋ ۇسىنىلادى:
- ازاماتتىق-قۇقىقتىق سيپاتتاعى شارتتار بويىنشا تابىس الاتىن جەكە تۇلعالار;
- ينتەرنەت-پلاتفورمالار مەن پلاتفورمالىق جۇمىسپەن قامتۋدىڭ ءموبيلدى قوسىمشالارى ارقىلى قىزمەت كورسەتەتىن جەكە تۇلعالار. بۇل رەتتە ينتەرنەت-پلاتفورما وپەراتورى جەكە تۇلعا ءۇشىن شارت بويىنشا الىنعان تابىستىڭ 1% مولشەرىندە الەۋمەتتىك اۋدارىمدار جۇرگىزەدى.
«ماسق قاراجاتى ەسەبىنەن جۇمىسىنان ايىرىلعان جاعدايدا تولەنەتىن الەۋمەتتىك تولەم جۇمىستان بوساتىلۋ سەبەپتەرىنە قاراماستان جۇزەگە اسىرىلاتىنىن جانە جۇمىسسىز ادام جۇمىس ىزدەپ جۇرگەن كەزەڭدە ونى قولداۋعا ارنالعان. سوندىقتان دا الەۋمەتتىك تولەم قۇقىعى جۇمىستان بوساتىلعان ادام جۇمىسسىز رەتىندە تىركەلگەن كۇننەن باستاپ پايدا بولادى», دەپ قوستى مينيسترلىكتىڭ ءباسپاسوز قىزمەتى.
