بيپلان جۇيەسىن قولدانۋ – ەندوۆاسكۋليارلىق نەيروحيرۋرگيانىڭ «التىن ستاندارتى». بيپلان انگيوگرافيالىق كەشەننىڭ يننوۆاتسيالىق جۇيەسى جوعارى تەحنولوگيالىق وپەراتسيالاردىڭ سەنىمدىلىگى مەن قاۋىپسىزدىگىن ارتتىرىپ قانا قويماي, وپەراتسيالاردى جاساۋ پروتسەسىن ايتارلىقتاي جەڭىلدەتەدى.
مەديتسينالىق ورتالىق اۋرۋحاناسىنىڭ وپەراتسيالىق بولمەلەرى زاماناۋي ۇردىستەرگە سۇيەنە وتىرىپ گيبريدتىك وپەراتسيالار ءۇشىن ىڭعايلى ۇيىمداستىرىلعان – ەندوۆاسكۋليارلىق جانە اشىق وپەراتسيالار نەمەسە ولاردىڭ بىرلەسكەن تۇرلەرىن جاساۋعا مۇمكىندىك بار.
بۇل ءتاسىلدىڭ بىرەگەيلىگى – گيبريدتىك وپەراتسيالىق بولمەدە ءارتۇرلى جابدىقتىڭ بولۋى. بۇل ءتاسىل مي ىسىكتەرى, انەۆريزما, ەپيلەپسيا, پاركينسون اۋرۋى, ديسك جارىعى, ومىرتقا ويناماسى جانە باسقا دا اۋرۋلاردى ەمدەۋدە مي مەن ج ۇلىنعا جاسالاتىن وپەراتسيالاردىڭ تيىمدىلىگى مەن ىڭعايلىلىعىن ارتتىرادى. يدەيانىڭ ماقساتى تەك وتكىزۋ قابىلەتتىلىگىن ارتتىرۋ عانا ەمەس, سونىمەن قاتار ءبىر وپەراتسيالىق بولمە ىشىندە بىرنەشە جابدىقتى بىرىكتىرۋ پەرسپەكتيۆاسى.
بۇل جابدىق تەك زەرتتەۋگە ارنالعان اپپارات قانا ەمەس, بۇل تۇتاس مەديتسينالىق كەشەن. ونىڭ كومەگىمەن جۇرەككە جانە اياق-قول تامىرلارىنا ەندوۆاسكۋليارلىق جانە گيبريدتىك وپەراتسيالار جۇرگىزىلەدى.
«بىرنەشە كەزەڭدە جاسالاتىن وپەراتسيالاردى ءبىز ءبىر كەزەڭدە جاسايمىز. ياعني ەكىنشى وپەراتسيانى كۇتۋدىڭ كەرەگى جوق, مۇنداي جاعدايلاردا پاتسيەنتتەر ءۇشىن ۋاقىتتى ۇنەمدەۋ وتە ماڭىزدى. گيبريدتىك وپەراتسيالاردىڭ ارقاسىندا پاتسيەنت وپەراتسيالىق بولمەدە, تيىسىنشە ناركوزدا از جاتادى, سونداي-اق اعزانىڭ قانتامىرلارىن دياگنوستيكالاۋ جانە ۆيزۋاليزاتسيالاۋ كەزىندە پايدالانىلاتىن كونتراستى زات پەن رەنتگەننىڭ تەرىس اسەر ەتۋى دە بولمايدى», دەپ ءبولىستى قر ءپىب مەديتسينالىق ورتالىق اۋرۋحاناسىنىڭ حيرۋرگيالىق قىزمەت باسشىسى بەرىك قايكەنوۆ.
قر ءپىب مەديتسينالىق ورتالىعى اۋرۋحاناسىنىڭ زاماناۋي جابدىقتالعان وپەراتسيالىق بولمەلەرى, نەيروحيرۋرگتەردىڭ جوعارى بىلىكتىلىگى كەز كەلگەن كۇردەلى وپەراتسيالاردى جاساۋعا مۇمكىندىك بەرەدى. اۋرۋحانانىڭ وپەراتسيالىق بلوگى 11 وپەراتسيالىق زالمەن جابدىقتالعان. ولاردىڭ بىرىندە وپەراتسيالار بيپلان انگيوگرافيالىق كەشەن جۇيەسىن قولدانۋ ارقىلى جۇزەگە اسىرىلىپ كەلەدى. 2022 جىلدىڭ سەگىز ايىندا نەيروحيرۋرگيالىق, كارديوحيرۋرگيالىق جانە انگيوحيرۋرگيالىق بەيىندەردە جوسپارلى جۇيەنى پايدالانا وتىرىپ, 175 وتا جاسالدى.
