مەرەيتوي اياسىندا بىرقاتار ماڭىزدى عىلىمي-زەرتتەۋ, مادەني جانە قوعامدىق ءىس-شارالار ۇيىمداستىرىلدى. جىل سوڭىنا دەيىن احمەت بايتۇرسىن ۇلىنىڭ 12 تومدىق ەڭبەكتەر جيناعىن باسىپ شىعارۋ جانە ونى ەلىمىزدىڭ كىتاپحانالارىنا تاراتۋ جوسپارلانعان. سونداي-اق مەرەيتوي اياسىندا ۇلى اعارتۋشىنىڭ ءومىرى مەن قىزمەتى تۋرالى تولىقمەتراجدى كوركەم فيلم ءتۇسىرىلىمى جوسپارلانىپ وتىر.
«بۇگىندە ءبىز ۇلت ۇستازى, قازاق ءتىل ءبىلىمىنىڭ اتاسى, ءتول ءالىپبيىمىزدىڭ نەگىزىن قالاۋشى احمەت بايتۇسىن ۇلىنىڭ 150 جىلدىعىن اتاپ وتۋدەمىز. وكىنىشكە قاراي, كيەلى تورعايداعى بۇگىنگى تورقالى توي ءتىلسىز جاۋدىڭ كەسىرىنەن توقتاتىلىپ وتىر. كەشەلى بەرى قوستاناي حالقىنا قول ۇشىن سوزىپ جاتقان جانداردىڭ سانى ارتىپ كەلەدى. بۇل – بىرلىگىمىز بەن ىنتىماعىمىزدىڭ بەلگىسى. حالقىمىز قانداي قيىندىقتى دا وسىنداي بىرلىكپەن ەڭسەرگەن. ەڭ باستىسى, ەل امان بولىپ, ۇلى تويدىڭ قايتا جاڭعىرۋىنا تىلەكتەسپىن», دەدى ەۋرازيا ۇلتتىق ۋنيۆەرسيتەتىندە وتكەن «ا.بايتۇرسىن ۇلىنىڭ عىلىمي مۇراسى جانە جاڭا قازاقستاننىڭ زياتكەرلىك ساباقتاستىعى» اتتى عىلىمي-پراكتيكالىق كونفەرەنتسيا اياسىندا قر مادەنيەت جانە سپورت ءمينيسترى داۋرەن اباەۆ.
ايتا كەتۋ كەرەك, جىل باسىنان بەرى احمەت بايتۇرسىن ۇلىنىڭ ەسىمى رەسپۋبليكامىزداعى 1 اۋىلعا, 200-دەن استام كوشەگە جانە 39 مەكتەپكە, 1 اۋەجايعا, 1 مۋزەيگە بەرىلگەن. سونداي-اق شەتەلدە ءىس-شارالار جوسپارلانعان. 2021 جىلى يۋنەسكو-نىڭ باس كونفەرەنتسياسىندا قازاق پەداگوگىنىڭ مەرەيتويلىق كۇنىن وسى ۇيىمنىڭ اتاۋلى كۇندەرىنىڭ حالىقارالىق كۇنتىزبەسىنە ەنگىزۋ تۋرالى شەشىم قابىلدانعان.
سونىمەن قاتار بۇگىن ەلورداداعى جازۋشىلار اللەياسىندا «الاش قايراتكەرلەرى» ەسكەرتكىشىنە گۇل شوقتارىن قويۋ ءراسىمى ءوتتى.
