تەاتر • 05 قىركۇيەك، 2022

تۇركىستان تەاترىنىڭ تارتۋى

103 رەت كورسەتىلدى

ەلوردالىق تالعامپاز كورەرمەندى ەلەڭ ەتكىزگەن ەلەۋلى جاڭالىق بيىل نەبارى ەكىنشى ماۋسىمىنىڭ شىمىلدىعىن تۇرگەلى وتىرعان ەلىمىزدەگى ەڭ جاس ونەر ورداسى – تۇركىستان مۋزىكالىق دراما تەاترىنىڭ باس شاھار تورىندەگى تابىس­تى وتكەن گاسترولدىك ساپارى دەسەك، قاتەلەسپەيمىز. الىستان ات ارى­تىپ جەتكەن جاس ونەر ۇجىمى «استانا وپەرا» تەاترىنىڭ ۇلكەن زالى ساحنا­سىندا ەكى كۇن قاتارىنان قازاق­ستان­نىڭ ەڭبەك سىڭىرگەن قايراتكەرى، جازۋشى-دراماتۋرگ ەرمەك امانشاەۆتىڭ ليبرەتتوسىنا قويىلعان بەلگىلى رەسەي­لىك بالەتمەيستەر، ونەرتانۋشى كونستانتين سەمەنوۆتىڭ «قورقىت تۋرالى اڭىز» پلاستيكالىق سپەكتاكلىن ۇسىندى.

– تۇركىستان مۋزىكالىق دراما تەاترىنىڭ اشىلعانىنا كوپ ۋاقىت وتپەسە دە، تەاترىمىز قازىردىڭ وزىندە رەسپۋبليكا كولەمىنە تانىمال بولا باستادى. بۇل – ءبىزدىڭ ۇجىمنىڭ ەلورداعا جاساعان ەكىنشى گاسترولدىك ساپارى. وسىعان دەيىن ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ساحناسىندا استانا حالقىنا ارناپ جازۋشى، دراماتۋرگ، مەملەكەتتىك سىيلىقتىڭ لاۋرەا­تى دۋلات يسابەكوۆتىڭ «بورتە» تاريحي دراماسىن قويساق، ەندى مىنە، اراعا از عانا ۋاقىت سالىپ «قورقىت تۋرالى اڭىز» قويىلىمىن ۇسىنىپ وتىرمىز. «استانا وپەرانىڭ» تاماشا ساحناسىندا ونەر كورسەتۋ – ءبىز ءۇشىن ۇلكەن مارتەبە. ال زاماناۋي بي مەن وپەرانى بىرىكتىرگەن سپەكتاكلىمىز باس قالانىڭ تالعامپاز كورەرمەندەرىنىڭ كوڭىلىنەن شىقتى دەپ سەنەمىز، دەدى تۇركىستان مۋزىكالىق دراما تەاترىنىڭ ديرەكتورى ءارى كوركەمدىك جەتەكشىسى اينۇر كوپباساروۆا.

تەاتر باسشىسى ا.كوپباساروۆانىڭ جە­تەك­شىلىگىمەن رۋحاني استانانىڭ سالەمىن ار­قالاپ جەتكەن ايتۋلى سپەكتاكل كوشپەلى حالىقتاردىڭ تاريحىندا تەرەڭ ءىز قالدىرىپ، قۇندى ادەبي-مۋزىكالىق مۇرا جاساعان اڭىز ادام قورقىت اتانىڭ ومىرىنەن سىر شەرتەدى. ليبرەتتو جەلىسىنە سايكەس، قوبىزىنىڭ ۇنىمەن تىرشىلىكتى تەربەتكەن كۇي اتاسى – قورقىت پەن جەر بەتىن ارازدىق الاڭىنا اينالدىرۋعا تى­رىسقان سيقىرشى مارتۋدىڭ اراسىنداعى ماڭگىلىك قاقتىعىس زاماناۋي حورەوگرافيا تىلىمەن اسەرلى بەينەلەنەدى.

– تاعدىرى ەرەكشە قورقىت تۋرالى شى­عار­مانى قولعا العاندا، ارينە، باسىندا كىلتىن تابا الماي ءبىراز قينالدىم. كەيىن تۇلعا ءومىرىن زەرتتەي كەلە قويىلىم نەگىزىن مۋزىكا مەن پلاستيكادان ىزدەۋگە بەكىندىم. نەگە دەسەڭىز، قورقىتتىڭ ءوزى دە، ءومىرى دە مۋ­زى­كا ەمەس پە؟! دەمەك سپەكتاكلدىڭ دە وزەگى قو­بىز ۇنىمەن ءورىلۋى كەرەك دەپ ءتۇيدىم. سون­­دىقتان دا سپەكتاكلدىڭ لەيتموتيۆى – قوبىز­دىڭ قوڭىر ءۇنى. كۇمبىر ءۇننىڭ اياسىندا تۇلعا تاعدىرىن تولعادىق. ماڭگىلىك ءومىر ىزدەگەنىمەن، ولىمنەن قۇتىلا الماعان قورقىت، قوبىزىنىڭ ارقاسىندا ەكىنشى ومىرىنە ولمەس تاعدىر سىيلادى. وسى ءبىر فيلوسوفيالىق تاقىرىپ ونەر ادامى رەتىندە مەنى دە قانات­تان­دىردى، – دەپ «قورقىت تۋرا­لى اڭىز» سپەك­تاكلى جايلى قويىلىمنىڭ رە­جيسسەرى ءارى قويۋشى حورەوگرافى كونستانتين سەمەنوۆ سىر اشتى.

تاعىلىمدى تۋىندىنى جارىققا شىعارۋ جولىندا قويۋشى حورەوگرافتان بولەك باسقا دا كوپتەگەن تاجىريبەلى ماماندار تەر توكتى. اتاپ ايتساق، كومپوزيتور حاميت شاڭعاليەۆ، قويۋشى سۋرەتشىسى تاتيانا ۆيۋشينسكايا، جارىق بويىنشا سۋرەتشى تاتيانا ميشينا، بەينەكونتەنت سۋرەتشىسى سەرگەي رىلكو، كوستيۋمدەر بويىن­شا سۋرەتشىلەر – نازىم جاي­لاۋباەۆا مەن نازىم قارپىقوۆا، دەكوراتور-سۋرەتشى جانات كوكىمبەكوۆ، بالەتمەيستەر داۋلەت مۇراتپەكوۆ، گريم بويىنشا سۋرەتشى ادەل نۇرقاسىموۆا باستاعان كاسىبي شەبەرلەر ەڭبەگى دە ايرىقشا اتاپ وتۋگە تۇرارلىق ءساتتى ىزدەنىستەر ساناتىندا دەپ سەنىممەن ايتا الامىز. ويىمىزدى تەاتر ماماندارى دا قولدادى.

– «استانا وپەرانى» تۇركىستان مۋزىكا­لىق دراما تەاترىمەن دوستىق ءارى شىعارما­شى­لىق قارىم-قاتىناس بايلانىستىرادى. كوپشىلىككە بەلگىلى، ءبىزدىڭ بالەت ترۋپپامىز بيىل ماۋسىمدا العاش رەت تۇركىستاندا گاسترولدىك ساپارمەن بولدى. دراما تەاتر ساحناسىندا ارتىستەر XX عاسىر جاۋھارى – ن.ا.ريمسكي-كورساكوۆتىڭ مۋزىكاسىنا قويىلعان كەمەڭگەر حورەوگراف م.فوكيننىڭ «شەحەرازادا» بالەتىن جانە بالەت ترۋپپا­سى­نىڭ كوركەمدىك جەتەكشىسى، رەسەيدىڭ حالىق ءارتىسى التىناي اسىلمۇراتوۆانىڭ اۆتورلىق گالا-باعدارلاماسىن ورىندادى. ارا­عا ەكى اي سالىپ «استانا وپەرادا» جاۋاپ رەتىن­دەگى گاسترولمەن كيەلى تۇركىس­تان قالاسىنان كەلگەن ارتىستەردىڭ جوعا­رى دەڭگەيدە ونەر كورسەتكەنىنە وتە قۋانىش­تىمىز. جاس تا بولسا وزدەرىنىڭ ىرگەلى شىعار­ما­شىلىق ىزدە­نىستەرىنىڭ ناتيجەسىندە ەلوردا­لىق تال­عام­پاز كورەرمەننىڭ ىستىق ىقى­لاسى­نا بولەنىپ، جوعارى باعاسىن العان ارىپتەس­تەرىمىزدىڭ ونە­رىنە ەرەكشە ءتانتىمىن، – دەدى «استانا وپەرا» تەاترىنىڭ ديرەكتورى، قازاقستاننىڭ ەڭبەك سىڭىرگەن قايراتكەرى عالىم احمەدياروۆ.

ەكى كۇن قاتارىنان باس شاھار كورەرمەن­دەرى الدىندا تۇركىستان مۋزىكالىق دراما تەاترىنىڭ ەلامان ابدىقالىق، ەركىنبەك اۋباكىروۆ، اكىلاي سىدىعاليەۆا، الينا ورمونبەك، رۋستام شايحوۆ، گۇلجانات قالامعازينا، باقىتنۇر دۇيسەنباەۆا، ماو ساكاي، فارحات سادۋاقاسوۆ، داستان ساتتار، ءىليا جارلىقاسىموۆ، الۋا تورەگەلدى، كاميلا ءالىمجانوۆا، ءمادينا سادۋباەۆا، بەكارىس قاراعۋلوۆ، دانيار دوسىمبەك، الماس جىلقىبەك، فەريدە تولوباەۆا، داۋلەت شومانوۆ باستاعان تالانتتى ارتىستەر توبى تابىستى ونەر كورسەتتى.

سوڭعى جاڭالىقتار

ۇقساس جاڭالىقتار