بيىلعى مامىر ايىندا سىر ەلىنە جاساعان ساپارى بارىسىندا ەنەرگەتيكا ءمينيسترى بولات اقشولاقوۆ ەلىمىزدە بۇرىن-سوڭدى جىلۋ ەلەكتر ورتالىعىن شەتەلدىك ينۆەستور كومەگىمەن سالۋ بولماعانىن, مۇنداي مۇمكىندىككە وسى وبلىس العاش بولىپ قول جەتكىزىپ وتىرعانىن ايتقان ەدى. جۋىردا نىسان قۇرىلىسىن جۇرگىزەتىن كومپانيا انىقتالدى. وبلىس اكىمى نۇرلىبەك نالىباەۆ ينۆەستورلارمەن كەزدەسىپ, جوبانى جۇزەگە اسىرۋ ماسەلەلەرىن تالقىلادى. باسقوسۋعا «اكسا ەنەردجي» كومپانياسىنىڭ قازاقستانداعى وكىلى مۇستافا كەمال مەن ەنەرگەتيكا مينيسترلىگىنىڭ جاڭارتىلاتىن ەنەرگيا كوزدەرىن قولداۋ جونىندەگى قارجى-ەسەپ ايىرىسۋ ورتالىعىنىڭ ديرەكتورى گۇلجان قاليجانقىزى قاتىسىپ, تاراپتار اراسىندا ەكىجاقتى كەلىسىمشارت جاسالدى.
– مەملەكەت باسشىسى ۇكىمەتتىڭ كەڭەيتىلگەن وتىرىسىندا وڭتۇستىك وڭىرلەردى ۇزدىكسىز ەلەكتر ەنەرگياسىمەن قامتاماسىز ەتۋ ماقساتىندا 3 جىلدا قۋاتتىلىعى 1 مىڭ مەگاۆاتت مانەۆرلىك ستانسالار سالۋدى تاپسىرعان بولاتىن. وسى باعىتتاعى باستامامىزعا قولداۋ بىلدىرگەن سالالىق مينيسترلىك پەن «اكسا ەنەردجي» كومپانياسى باسشىلىعىنا ايماق جۇرتىنىڭ اتىنان العىسىمدى بىلدىرەمىن. ماڭىزدى جوبانىڭ ساپالى جانە ۋاقتىلى جۇزەگە اسىرىلۋىنا كۇش سالامىز, – دەدى وبلىس اكىمى.
تۇرىك كومپانياسىنىڭ وكىلى مۇستافا كەمال ەنەرگەتيكالىق قاۋىپسىزدىكتى ساقتاۋعا ايرىقشا مۇمكىندىك بەرەتىن جاڭا نىسان 2025 جىلى ەل يگىلىگىنە بەرىلەتىنىن اتاپ ءوتتى. «اكسا ەنەردجي» مازۋت, تابيعي گاز, جەل گەنەراتورلارى مەن سۋ ەلەكتر ستانسالارى ارقىلى ەلەكتر ەنەرگياسىن وندىرۋدەن الەمدىك تاجىريبەسى مول, جەتەكشى كومپانيالاردىڭ ءبىرى. وسىعان دەيىن افريكا مەن تمد ەلدەرىندە وسىنداي نىساندار سالعان «اكسا ەنەردجي» قىزىلورداداعى قۇرىلىستى بيىل جەلتوقسان ايىندا باستاماق.
جيىندا بيىل وبلىستا 23 الەۋمەتتىك نىساننىڭ جىلۋ قازاندىعى قايتا جاڭعىرتىلاتىنى, وعان رەسپۋبليكالىق جانە وبلىستىق بيۋدجەتتەن 676 ملن تەڭگە بولىنگەندىگى ايتىلدى.
قىزىلوردا وبلىسى
