«قۇرمەتتى ەلوردا تۇرعىندارى!
سىزدەردى قازاقستان رەسپۋبليكاسىنىڭ كونستيتۋتسياسى كۇنىمەن شىن جۇرەكتەن قۇتتىقتايمىن!
كونستيتۋتسيا – ەلدەگى تۇراقتىلىقتى, بەيبىتشىلىك پەن كەلىسىمدى قامتاماسىز ەتەتىن جاسامپازدىق پەن وركەندەۋدىڭ بەرىك كەپىلى. كونستيتۋتسيا مەملەكەتىمىزدىڭ ىرگەسىن قۇقىقتىق جانە زايىرلى مەملەكەت رەتىندە بەكىتتى.
نەگىزگى زاڭ قابىلدانعان كۇننەن باستاپ ەلىمىزدە حالىقتىڭ ءال-اۋقاتىن جاقسارتاتىن ماڭىزدى رەفورمالار وتكىزىلدى. 5 ماۋسىم كۇنى ەلىمىزدىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ جونىندەگى جالپىۇلتتىق رەفەرەندۋم ءوتتى.
مەملەكەت باسشىسى قاسىم-جومارت كەمەل ۇلى توقاەۆ كونستيتۋتسياعا ەنگىزىلەتىن تۇزەتۋلەر ازاماتتاردىڭ مۇددەسىن, قۇقىعىن جانە بوستاندىعىن قامتاماسىز ەتەتىنىن, «الەۋمەتتىك ادىلەتتىلىك – باستى قۇندىلىق جانە جاڭا قوعامدىق كەلىسىمنىڭ تىرەگى» ەكەنىن اتاپ ءوتتى.
كونستيتۋتسيا كۇنى قۇتتى بولسىن! بارشاڭىزعا زور دەنساۋلىق, وتباسىلارىڭىزعا اماندىق تىلەيمىن!», دەپ جازدى التاي كولگىنوۆ ءوزىنىڭ Instagram پاراقشاسىندا.
