بيىلعى جىلدى «ينتەرگاز ورتالىق ازيا» اق «قاۋىپسىز ەڭبەك – 2022» باستاماسى اياسىندا وتكىزۋدە. اتاۋلى جىل شەڭبەرىندە وتكىزىلەتىن ءىس-شارالار اكتسيونەرلىك قوعامدا ەڭبەك قاۋىپسىزدىگىنە جانە ەڭبەكتى قورعاۋعا ايرىقشا باسىمدىق بەرىلگەنىن ايعاقتاپ تۇر. قىزمەتكەرلەردىڭ ءومىرى مەن دەنساۋلىعىنا بەيجاي قاراماي, وندىرىستىك جاراقاتتانۋدىڭ جانە كاسىبي اۋرۋلاردىڭ الدىن الۋ باعىتىنداعى كورسەتكىشتەردى جوعارىلاتاتىن «قاۋىپسىز ەڭبەك – 2022» ءىس-شاراسىن قولعا العان كومپانيا باسشىلىعىنىڭ باستاماسى جان-جاقتى قولداۋ تاۋىپ وتىر.
وسى جىلدىڭ 24 تامىزىندا «ينتەرگاز ورتالىق ازيا» اق پايدالاناتىن «قاراوزەك» كومپرەسسورلىق ستانساسىنىڭ بازاسىندا قاۋىپسىز ەڭبەك جىلى اياسىندا شۇعىل مەديتسينالىق كومەك كورسەتۋ جانە بولجامدى زارداپ شەگۋشىلەردى شۇعىل ەۆاكۋاتسيالاۋ بويىنشا وقۋ-جاتتىعۋ ساباعى ءوتتى. گاز قۇبىرىنداعى اپاتتىق جاعدايدى وقشاۋلاۋ جانە جويۋ ادىستەرىن كورسەتەتىن وقۋ-جاتتىعۋ ساباعىنا «ينتەرگاز ورتالىق ازيا» اق قىزىلوردا فيليالىنىڭ وندىرىستىك بلوگى, جەدەل مەديتسينالىق كومەك كورسەتۋ ماماندارى, «اقبەرەن» اۆاريالىق-قۇتقارۋ قىزمەتىنىڭ قىزمەتكەرلەرى, «جاردەم وندىرىستىك مەديتسينا» جشس مەن وبەكتىنى كۇزەتەتىن مەردىگەرلىك ۇيىمداردىڭ وكىلدەرى قاتىستى.
وقۋ-جاتتىعۋ ساباقتارىنىڭ ستسەناريى بويىنشا كومپرەسسورلىق ستانسادا ءورت بولىپ, شىعۋ شلەيفى جارىلدى. راتسيا ارقىلى تۇسكەن حابارلامالارعا سايكەس جاتتىعۋعا قاتىسقاندار كرانداردى اۋىستىرا وتىرىپ, جۇمىس ىستەپ تۇرعان گاز ايداۋ اگرەگاتتارىن اۆتوماتتى تۇردە توقتاتۋعا كىرىستى. اپاتتى جويۋعا گاز ايداۋ ستانساسىنىڭ باسشىسى جەتەكشىلىك ەتتى. ماماندار وقىستان بولعان وقيعادا ابىرجىماي, كومپرەسسورلىق ستانساداعىلاردى ەۆاكۋاتسيالاۋدى, ءورتتى وقشاۋلاۋ مەن جويۋدى قولعا الدى.
اۋىسىم ينجەنەرى ءورت ءسوندىرۋ جانە قۇتقارۋ قىزمەتتەرىنىڭ ماماندارى جەتكەنىن حابارلادى. ءورت سوندىرۋشىلەر ساناۋلى سەكۋند ىشىندە شلانگتى سۋ گيدرانتتارىنا جالعاپ, جالىننىڭ جولىن كەسۋگە اسىقتى. كوپ ۇزاماي جەلىلىك قۇبىر جۇرگىزۋشىسىنەن اپاتتى جاعدايداعى العاشقى مىندەت ويداعىداي ورىندالعانى جونىندە حابارلاما كەلىپ ءتۇستى.
وسى ءسات راتسيا ارقىلى ەكى ادامنىڭ زارداپ شەككەنى جايلى حابارلاندى. ونىڭ ءبىرى قولى مەن اياعى سىنىپ, كوپ قان جوعالتسا, ەكىنشىسىنىڭ جۇرەك سوعۋى ناشارلاپ, ەسىنەن تانعان. مەديتسينالىق قىزمەتكەرلەر بريگاداسى جەدەل تۇردە بارلىق قاجەتتى رەانيماتسيالىق شارانى قولعا الىپ, الدىمەن قاندى توقتاتتى. ەكىنشى توپ جۇرەك سوعىسى توقتاعان جۇمىسشىنىڭ ەسىن جيعىزۋ ارەكەتىنە كىرىستى.
دەر كەزىندە كورسەتىلگەن العاشقى دارىگەرلىك كومەكتىڭ ناتيجەسىندە زارداپ شەككەندەر امان قالىپ, شاقىرۋ بويىنشا كەلگەن «جەدەل جاردەم» كولىگىنە جەتكىزىلدى. سالدەن سوڭ ءورت ءسوندىرۋ كومانداسىنىڭ قاراۋىل باسشىسى اۋىسىم ينجەنەرىنە جالىننىڭ تولىق اۋىزدىقتالعانىن مالىمدەدى.
وقۋ-جاتتىعۋ ساباعى اياسىندا جاسالعان جۇمىستاردى «QazaqGaz» ۇك» اق جانە ونىڭ ەنشىلەس كومپانيالارىنىڭ باسشىلارى باقىلادى.
«ينتەرگاز ورتالىق ازيا» اق تەحنيكالىق ديرەكتورى اۋەزحان ۋرومباەۆتىڭ ايتۋىنشا, وقۋ-جاتتىعۋ ساباقتارىنىڭ نەگىزگى ماقساتى – بارلىق جۇمىلدىرىلعان توپتىڭ دايىندىعىن, ولاردىڭ اپاتتاردى وقشاۋلاۋ مەن جويۋداعى ءوزارا ءىس-قيمىلىن باعالاۋ. ول جاتتىعۋعا قاتىسقان بارلىق قىزمەت مامانى بەرىلگەن تاپسىرمالاردى كاسىبي دەڭگەيدە اتقارعانىن اتاپ ءوتتى.
– كومپانيا جاريالاعان «قاۋىپسىز ەڭبەك – 2022» ءىس-شاراسى اياسىنداعى بۇگىنگى جاتتىعۋدا بارلىق قۇرىلىم وكىلىنىڭ بىرلەسكەن قيمىلىنىڭ ارقاسىندا اپاتتىڭ اۋىزدىقتالعانىنا كۋا بولدىق. مەردىگەر كومپانيالار وكىلدەرىمەن قاتار, «ينتەرگاز ورتالىق ازيا» اق ماماندارى دا قويىلعان مىندەتتەردى ورىنداۋدا, تەوريالىق ءبىلىمدى تاجىريبەدە قولدانۋدا ناقتى ءارى ۇيلەسىمدى ارەكەت ەتتى. مۇنداي جاتتىعۋلاردىڭ ءبىز ءۇشىن ماڭىزى زور. وسىلايشا, سان مارتە پىسىقتالىپ, داعدىعا اينالعان ءىس-ارەكەتتەر كومپانياعا تۇرعىندارعا تابيعي گازدى ۇزدىكسىز جانە قاۋىپسىز تاسىمالداۋدى جۇزەگە اسىرۋعا مۇمكىندىك بەرەدى, – دەدى اۋەزحان ۋرومباەۆ.
«ينتەرگاز ورتالىق ازيا» اق ءۇشىن قاۋىپسىزدىك ماسەلەسى وتە ماڭىزدى.
كومپانيانىڭ شىمكەنت قالاسىنداعى وقۋ-كۋرستىق كومبيناتىندا ماماندار ارنايى وقىتىلادى. ولاردىڭ كەز كەلگەن جاعدايدا اپاتتىڭ جولىن كەسەتىن تەحنيكالارى دا ساي. كومپانيا باسشىلىعى شەبەرلىكتى شىڭدايتىن وسىنداي جاتتىعۋلاردىڭ ناتيجەسىندە سوڭعى جىلدارى اپاتتى جاعدايلار تىركەلمەگەنىن ايتىپ وتىر.
جاتتىعۋ وتكەن «قاراوزەك» كومپرەسسورلى ستانساسىندا گاز قىسىمىن كوتەرەتىن 3 اگرەگات, ەلەكتر ستانساسى بار. ولاردىڭ جۇمىسىن ۇيلەستىرىپ, اپاتتىڭ الدىن الۋ, وقىس وقيعا بولا قالعان جاعدايدا جولىن كەسۋ مامانداردىڭ بىلىكتىلىگىنە تىكەلەي بايلانىستى. «ينتەرگاز ورتالىق ازيا» اق «قىزىلوردا» مگقب «قاراوزەك» كس باستىعى كەڭەس ەمبەرگەنوۆ جاتتىعۋدا كاسىبي ماماندارمەن قاتار, ارنايى دايىندىقتان وتكەن كومپانيا وكىلدەرى دە ۇزدىك كورسەتكىشكە قول جەتكىزگەنىن ايتتى.
– كومپرەسسورلىق ستانسا توقتاۋسىز جۇمىس ىستەۋى كەرەك. مۇنداعى جۇمىس ۆاحتالىق ادىسكە نەگىزدەلگەن. جازعى كۇندەرى مۇنداعى 3 قوندىرعىنىڭ بىرەۋى جۇمىس ىستەپ, قالعاندارى رەزەرۆتە تۇرادى. بۇگىنگى جاتتىعۋ ستسەناريى بويىنشا قىسىم كوتەرەتىن تۇستان ءورت شىعىپ, ونى توقتاتۋعا ءتۇرلى قىزمەت ماماندارى جۇمىلدىرىلدى. بۇل رەتتە ءوزىمىزدىڭ پارامەديكتەر قىزمەتىن ەرەكشە اتاپ وتكەن ءجون. ءوز ماماندارىمىزدىڭ وسىنداي وقىس وقيعالارعا دايىندىعىن باعالاۋعا ارنالعان جاتتىعۋ ناتيجەسى كوڭىلىمىزدەن شىقتى, – دەدى ستانسا باستىعى.
جاتتىعۋ اياسىندا العاشقى تاپسىرمانى مۇلتىكسىز ورىنداعان ماماندار ەكىنشى تاپسىرماعا سايكەس بولجامدى اپات سالدارىن جويۋعا كىرىسىپ كەتتى. جارتى كۇنگە سوزىلعان ءىس-شارا ناتيجەسىندە وعان قاتىسقان بارلىق قىزمەت وكىلىنىڭ جۇمىسى جوعارى باعالاندى.
قىزىلوردا
