وبلىستىق پوليتسيا دەپارتامەنتى كريمينالدىق پوليتسيا باسقارماسىنىڭ اعا جەدەل ۋاكىلى دانيار دەنەس ۇلى ايماقتا جالپى الاياقتىق قىلمىستاردىڭ تىركەلۋى ازايعانىمەن, ينتەرنەت ارقىلى الداۋ-ارباۋدىڭ ءالى دە بولسا الاڭداتارلىق جاعدايدا ەكەنىن ايتادى. بيىلعى 7 ايدا وسىنداي قىلمىستاردىڭ 529 دەرەگى تىركەلسە, ونىڭ 288-ءى ينتەرنەت-الاياقتىق بولىپ وتىر.
وتكەن جىلدىڭ سوڭىنا قاراي قىزىلوردالىقتارعا بەلگىسىز بىرەۋلەردىڭ «جاقىنىڭ ەسىرتكى زاتىمەن ۇستالىپ تۇر, ونى جازادان بوساتۋ ءۇشىن ءبىز ايتقان ەسەپشوتقا دەرەۋ قاراجات اۋدارۋىڭىز كەرەك» دەپ تەلەفون شالۋى جيىلەپ كەتكەنى بايقالعان. جاقىنىنىڭ اتى-ءجونىن جاڭىلماي ايتىپ تۇرعاندارعا سەنگەندەر سۇراعان سوماسىن دەرەۋ تاۋىپ بەرىپ, كەيىن سان سوعىپ قالعان ەدى. از ۋاقىتتا وبلىستا وسىنداي 32 قىلمىستىق ءىس تىركەلىپ, جابىرلەنۋشىلەرگە كەلتىرىلگەن شىعىن كولەمى 24 ميلليون تەڭگەگە جۋىقتاپتى.
وسى جىلعى ءساۋىر ايىندا وبلىستىق پوليتسيا دەپارتامەنتى قىزمەتكەرلەرى ابدەن ەركىنسىپ كەتكەن ينتەرنەت-الاياقتاردى قۇرىقتاۋ شاراسىن باستاعان ەدى. پوليتسەيلەر جيناقتالعان ايعاقتارعا سۇيەنىپ, وسى قىلمىستاردىڭ بارلىعى ءبىر قىلمىستىق توپتىڭ ارەكەتى دەگەن بولجام جاساپتى. بيىلعى 15 شىلدەدە الماتى, اقتوبە جانە جامبىل وبلىستارىندا ءبىر مەزەتتە ارنايى ءىس-شارا وتكىزىلىپ, ءبىر-بىرىمەن سىبايلاسۋ ارقىلى الاياقتىقپەن اينالىسىپ كەلگەن 8 ادامنان قۇرالعان قىلمىستىق توپ قۇرىقتالدى.
الاياقتاردىڭ باسپانالارىن ءتىنتۋ كەزىندە قىلمىس قۇرالى رەتىندە قولدانىلعان 17 ۇيالى تەلەفون, بەيتانىس تۇلعالاردىڭ اتىنا جاسىرىن تىركەلگەن 15 ابونەنتتىك ءنومىر, 60 ازاماتتىڭ جەكە سايكەستەندىرۋ ءنومىرى, اتى-ءجونى جازىلعان ءتىزىم, اقشا اينالىمدارىن تىركەگەن بلوكنوت انىقتالىپ, ايعاق زات رەتىندە تاركىلەندى. وتكەن جىلدىڭ سوڭىنان بەرى قىزىلوردالىقتاردى سارساڭعا سالىپ كەلگەن وسى توپ مۇشەلەرى ەكەندىگى بەلگىلى بولدى. قازىرگى ۋاقىتتا بۇل قىلمىستىق توپتىڭ وزگە دە وڭىرلەردە تىركەلگەن الاياقتىق قىلمىستارىنا قاتىستىلىعى تەكسەرىلۋدە.
دەسە دە وڭاي ولجاعا قۇنىققانداردىڭ دەسى ءالى قايتپاي تۇرعانىن بايقايمىز. الاياقتار ءجيى قولداناتىن تاسىلدەرىنىڭ ءبىرى بانك قىزمەتكەرى رەتىندە حابارلاسىپ, تۇلكىبۇلاڭعا سالىپ, نەسيە الدىرىپ نەمەسە ازاماتتاردىڭ قاراجاتىن بەيتانىس ەسەپشوتتارعا اۋدارتۋ بولىپ تۇر. ولاردان الەۋمەتتىك جەلى ارقىلى «قاراجاتىڭدى ەسەلەپ بەرەمىز» دەيتىندەر, ءتيىمدى شارتپەن ساۋدا-ساتتىق جاساۋ تاسىلدەرىمەن ۇسىناتىندار دا قالىس قالىپ جاتقان جوق.
پوليتسەيلەر تۇرعىنداردى ساقتاندىرۋ ماقساتىندا بۇقارالىق اقپارات قۇرالدارى مەن الەۋمەتتىك جەلىلەردە تۇسىندىرمە جۇرگىزىپ-اق جاتىر. ارنايى بەينەروليكتەر ءتۇسىرىلىپ, كوپشىلىك جينالاتىن ورىنداردا بيلبوردتار دا ىلىنگەن. ىشكى ىستەر مينيسترلىگى مەن تسيفرلىق دامۋ مينيسترلىگىنىڭ بىرلەسكەن جوسپارىنا سايكەس, وسى ايدان باستاپ الاياقتىق ارەكەتتەردەن سمس ارقىلى ساقتاندىرۋ جۇرگىزىلۋدە. بىراق «تەز بايىپ كەتسەم» دەپ تىلەيتىندەر اككىلەردىڭ تۇزاعىنا ءتۇسىپ قالا بەرەدى.
مامانداردىڭ ايتۋىنشا, الاياققا الدانىپ, «ساقالدى قولدان بەرگەندەي» سان سوعىپ قالماس ءۇشىن كۇماندى ۇتىس ويىندارىنان اۋلاق بولىپ, ينتەرنەت ارقىلى ساۋدا جاساعاندا بوتەن ۇيالى تەلەفونعا نەمەسە ەسەپشوتتارعا اقشا اۋدارماستان بۇرىن تەكسەرىپ الۋ قاجەت.
قارجى نارىعىن رەتتەۋ جانە دامىتۋ اگەنتتىگىنىڭ قىزىلوردا قالاسىنداعى وڭىرلىك وكىلدەر باسقارماسىنىڭ باس مامانى مۇرات سارمانوۆ الاياقتاردىڭ ايلاسى كوبەيىپ تۇرعانىن ايتادى.
مىسالى, الەۋمەتتىك جەلى ارقىلى ساتۋعا حابارلاندىرۋ بەرگەن تاۋارىڭىزعا الدىن الا تولەم ەنگىزۋگە ازىرلەر دەرەۋ تابىلا كەتەدى. ادەتتە الاياقتار وزدەرىن بۋحگالتەر نەمەسە فيرما ديرەكتورى رەتىندە تانىستىرىپ, جسن جانە جەكە كارتاڭىزبەن بايلانىستىراتىن تەلەفون ءنومىرىن, بانكتىك كارتا مەن جيناقشوت ءنومىرى سياقتى دەرەكتەمەلەردى اتاۋدى سۇرايدى. سۇراعانىنىڭ ءبارىن بۇلجىتپاي ورىنداپ وتىرعان جان سوڭىندا زاتىن ساتام دەپ ءجۇرىپ, شوتىنداعى جيعانىنان قالاي ايىرىلىپ قالعانىن اڭعارماي قالادى. بۇل – ينتەرنەتتەگى ساۋدا الاڭدارىندا ءجيى كەزدەسەتىن ءتاسىل.
بانكتەن تەلەفون سوققان ادامنىڭ كەيپىنە ەنىپ, شوتىڭىزدى ۇپتەۋ, جاقىن ادامىڭ بولىپ حابارلاسىپ كومەك سۇراۋ, «جۇمىسقا تۇرعىزام, وقۋعا تۇسىرەم» دەگەن ۋادەنى ءۇيىپ-توگىپ جەر سيپاتىپ كەتۋ ابدەن اككىلەنگەندەرگە تۇك ەمەس. ارينە, ولاردىڭ قادامىن قىسقارتۋ, قىلمىستىڭ الدىن الۋ پوليتسەيلەردىڭ مىندەتى. سويتسە دە ءبىر ءسات ءوزىمىز دە الاياققا الدانباۋدىڭ قامىن ويلايىق.
قىزىلوردا
