الماتى وكىلدىگىنىڭ باسشىسى ا.شوقىباەۆ قۇتتىقتاۋ سوزىندە ەلدىڭ سىرتقى ساياسات ۆەدومستۆوسىنىڭ باستاۋىندا تۇرعان اعا بۋىننىڭ قوسقان ۇلەسى زور ەكەنىن اتاپ ءوتتى. باسقوسۋدا ارداگەرلەر تاۋەلسىزدىك تاريحىنداعى العاشقى سامميتتەر مەن حالىقارالىق فورۋمداردىڭ ۇيىمداستىرۋ تاجىريبەلەرىنىڭ كەيبىر قىرلارىن ەسكە ءتۇسىرىپ, مەملەكەتىمىزدىڭ, سىرتقى ساياساتىمىزدىڭ, جالپى ديپلوماتيامىزدىڭ قالىپتاسۋىنا زور ۇلەس قوسقان تۇلعالاردىڭ ەسىمدەرىن ەسكە ءتۇسىردى.
ديپلوماتيا ارداگەرى اعىباي سماعۇلوۆ ارىپتەستەرىن قازاقستاننىڭ ديپلوماتيالىق قىزمەتىنىڭ 30 جىلدىعىمەن قۇتتىقتاپ, ەل باسشىلىعىنا جانە سىرتقى ىستەر مينيسترلىگىنە كورسەتكەن ءىلتيپاتى مەن ماراپاتتارى ءۇشىن العىسىن ءبىلدىردى. ءوز كەزەگىندە 1999-2003 جىلدارى قازاقستان رەسپۋبليكاسىنىڭ بۇۇ جانىنداعى ەلشىسى, تۇراقتى وكىلى قىزمەتىن اتقارعان ءمادينا جاربوسىنوۆا قازاقستان بۇۇ-عا مۇشە بولا وتىرىپ, ونى دامىتۋعا تولىق قاتىسۋعا قۇقىق پەن ناقتى مۇمكىندىك العانىن اتاپ ءوتتى. ەلشى قازاقستاننىڭ بۇۇ-داعى بەيبىتشىلىك پەن حالىقارالىق قاۋىپسىزدىكتى نىعايتۋ, قارۋسىزدانۋ جانە يادرولىق قارۋدى تاراتپاۋ رەجىمىن نىعايتۋ, يادرولىق سىناقتاردى توقتاتۋ جانە تىيىم سالۋ سالاسىنداعى نەگىزگى باستامالارىنا توقتالدى.
2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋىمەن قازاقستاننىڭ وسى سالاداعى تاريحي ۇلەسى مەن دايەكتى ۇستانىمىن الەمدىك قوعامداستىق راستاپ, مويىنداعانى دا ايتىلدى.
سالتاناتتى كەشتە ديپلوماتيا ارداگەرلەرى ا.سماعۇلوۆ پەن م.جاربوسىنوۆاعا مەملەكەت باسشىسىنىڭ قۇرمەت گراموتاسى تابىستالدى. شەتەلدىك ديپلوماتتار اسقار شوقىباەۆتىڭ الماتىداعى ميسسياسىنىڭ اياقتالۋىنا جانە مينيسترلىكتىڭ تاياۋ شىعىس جانە افريكا دەپارتامەنتىنىڭ ديرەكتورى بولىپ تاعايىندالۋىنا بايلانىستى تىلەكتەستىگىن ءبىلدىردى.
الماتى
