الماتى قالاسى اكىمدىگىنىڭ مالىمەتىنشە, «جالپىعا مىندەتتى وقۋ» قورىنان الەۋمەتتىك وسال توپتاعى وقۋشىلارعا ارنالعان كومەكتىڭ سوماسى – ءبىر بالاعا 43 مىڭ تەڭگەنى قۇرايدى.
«بۇل ماقساتقا جەرگىلىكتى بيۋدجەتتەن جالپى 847 ملن تەڭگە ءبولىندى. قازىرگى تاڭدا قاراجات 16 مىڭ وقۋشىنىڭ اتا-اناسىنىڭ شوتىنا اۋدارىلدى. بارلىعى 20 مىڭعا جۋىق وقۋشى ماتەريالدىق كومەك الادى.
«مەكتەپكە جول – شەكاراسىز جاقسىلىق» رەسپۋبليكالىق اكتسياسى اياسىندا 1 مىڭنان استام بالاعا كومەك كورسەتىلدى. دەمەۋشىلەر مەن مەتسەناتتار بولگەن 17,3 ملن تەڭگەگە مەكتەپ فورماسى مەن كەڭسە تاۋارلارى ساتىپ الىنىپ, تاراتىلدى», دەلىنگەن اكىمدىك حابارلاماسىندا.
وسىعان وراي الماتى اكىمدىگى يگى ىسكە بەي-جاي قارامايتىن قالا تۇرعىندارىنا اكتسياعا اتسالىسىپ, مۇقتاج بالالارعا كومەك كورسەتە الاتىندارىن جەتكىزدى. اكتسيا 30 قىركۇيەككە دەيىن جالعاسادى.
