الماتى قالاسى پوليتسيا دەپارتامەنتىنىڭ مالىمەتىنشە, ەسىرتكى قىلمىسىمەن اينالىسقان توپ قالانىڭ تۇركسىب اۋدانىنداعى مايلين كوشەسىندە ۇستالدى.
«كۇدىكتىلەردىڭ قولىندا بىرنەشە پاكەت بولدى. ونىڭ ىشىندە وسىمدىك تەكتەس زاتى بار 120-دان استام بۋما جانە ءشوپتى دوزاعا ءبولىپ, وراۋعا ارنالعان جابدىق بار. تاركىلەنگەن زاتتاي ايعاقتار بويىنشا سوت-حيميالىق ساراپتاما تاعايىندالدى. جۇپتىڭ تەك ەسىرتكى تاراتۋمەن عانا ەمەس, وندىرۋمەن دە اينالىساتىنى انىقتالدى. سوڭعى ءىس-ارەكەتتەرى بويىنشا ولاردىڭ سىبايلاستارى بار ەكەنى بەلگىلى بولدى. ولار - 35 جاستاعى ەر ادام مەن 23 جاستاعى ازاماتشا. ولار الماتى وبلىسى تالعار اۋدانى اۋماعىنداعى ۇيلەرىندە قىلمىستىق ءوندىرىستى باستاعان. مۇندا ءوز ايماقتارىندا وسىرىلگەن شيكىزاتتى وڭدەگەن», دەدى الماتى قالالىق پوليتسيا دەپارتامەنتىنىڭ ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.
قىلمىستىق كودەكستىڭ 296-بابى 4-بولىگىندە كوزدەلگەن قىلمىس بەلگىلەرى بويىنشا ەسىرتكى زەرتحاناسىنىڭ جۇمىسىندا پايدالانىلعان قۇرالدار, دايىن شيكىزات, بۇتالار تاركىلەنىپ, قىلمىستىق ءىس ماتەريالدارىنا تىركەلدى.
«سوت-حيميالىق ساراپتاماعا سونداي-اق «ساڭىراۋقۇلاق» دەپ اتالاتىن سۇر زات جىبەرىلدى. كۇدىكتىلەر قاماۋعا الىندى. ەسىرتكى زەرتحاناسى جويىلدى. قازىر ەسىرتكى ساتۋشىلاردىڭ تۇراقتى «كليەنتتەرىنىڭ» شەڭبەرى قۇرىلۋدا», دەدى ە.الماعامبەتوۆ.
