ۇكىمەت • 16 تامىز، 2022

ۇكىمەت باسشىسى قازاقستاننىڭ الەۋمەتتىك-ەكونوميكالىق دامۋىنا باعا بەردى

323 رەت كورسەتىلدى

قر پرەمەر-ءمينيسترى ءاليحان سمايىلوۆ جەتى ايداعى قازاقستاننىڭ الەۋمەتتىك-ەكونوميكالىق دامۋىنا باعا بەردى، دەپ حابارلايدى Egemen.kz.

«جەتى ايدىڭ قورىتىندىسى بويىنشا جالپى ىشكى ءونىمنىڭ ءوسىمى 3،3%-كە جەتتى. ەل ەكونوميكاسىنىڭ وسۋىنە نەگىزىنەن ناقتى سەكتور ۇلەس قوسىپ وتىر. ماسەلەن، وڭدەۋ ونەركاسىبى سالاسىندا تاماق ونىمدەرىن ءوندىرۋ شامامەن 3%-كە، سۋسىن ءوندىرۋ 9%-تەن استام ءوستى. جەڭىل ونەركاسىپتە ءوسىم 5%-تەن جوعارى بولدى. حيميا ونەركاسىبىندە 11%-كە جۋىق، مۇناي وڭدەۋدە 4%، ماشينا جاساۋ ونىمدەرىن شىعارۋدا 8%-كە جۋىق ءوسىم تىركەلدى»، دەدى پرەمەر-مينيستر ۇكىمەتتىڭ بۇگىنگى وتىرىسىندا.

سونىمەن بىرگە ەلدەگى مەتاللۋرگيا ءوندىرىسى 5%، قۇرىلىس سالاسىندا 8،6% دەڭگەيىندە ءوسىم بار. 7،7 ملن شارشى مەتر تۇرعىن ءۇي پايدالانۋعا بەرىلدى. قىزمەت كورسەتۋ سالاسى بويىنشا ساۋدا 6%-كە، كولىك 5،5%-كە جانە بايلانىس سالاسى 6،5%-تەن استام وسكەن.

«جەتى ايدىڭ قورىتىندىسىندا قاراعاندى مەن سولتۇستىك قازاقستان وبلىستارىندا جانە شىمكەنت قالاسىندا بارلىق كورسەتكىشتەر بويىنشا وڭ ديناميكا قالىپتاسقان.

جاۋاپتى مەملەكەتتىك ورگاندار مەن ءوڭىر اكىمدىكتەرى جۇمىستى جانداندىرىپ، ماقساتتى ماكروەكونوميكالىق كورسەتكىشتەردى قامتاماسىز ەتۋى كەرەك. ءوسۋ ديناميكاسىن ساقتاپ تۇرۋ ءۇشىن ەكونوميكانى ودان ءارى ءارتاراپتاندىرۋ، ينۆەستيتسيالىق جوبالاردى ىسكە اسىرىپ، جۇمىس ورىندارىن قۇرۋدى كۇشەيتىپ، جالعاستىرۋ قاجەت»، دەدى ءا. سمايىلوۆ.

وعان قوسا، شىلدە ايىنىڭ قورىتىندىسى بويىنشا ەلدەگى جىلدىق ينفلياتسيا 15% بولعان.

«ماسەلەن، وتكەن اپتادا مونوپولياعا قارسى اگەنتتىككە قانتتىڭ قىمباتتاۋى مەن تاپشىلىعىنا قاتىسى بولۋى مۇمكىن كومپانيا قىزمەتىن تەكسەرۋگە تاپسىرما بەردىم. بۇل پروبلەمانىڭ كوتەرىلگەنىنە ءبىراز بولدى. سوندىقتان مۇنداي جاعدايدى جاۋاپتى ورگاندار ەرتەرەك انىقتاپ، الدىن الۋ كەرەك.

ينفلياتسيانى تەجەۋ ءۇشىن قاجەتتى قۇرالدار بار. مەملەكەتتىك ورگاندار مەن اكىمدىكتەر ولاردى ءتيىمدى پايدالانۋى ءتيىس.

تاعى دا نازار اۋداراتىن جاعداي – وڭىرلەردەگى دەلدالدىق سحەمالاردى تەكسەرۋ كوميسسيالارىنىڭ جۇمىسىن جانداندىرىپ، الەۋمەتتىك ماڭىزى بار ازىق-ت ۇلىككە باعا ۇستەمەسىنىڭ 15% مولشەرىندە بولۋىن ەرەكشە باقىلاۋدا ۇستاۋ كەرەك. سونداي-اق اكىمدىكتەر اۋىل شارۋاشىلىعى ونىمدەرىن فورۆاردتىق ساتىپ الۋ ءۇشىن كەلىسىم-شارتتاردىڭ ۋاقىتىلى جاسالۋىنا دا باقىلاۋدى كۇشەيتۋى كەرەك»، دەدى ۇكىمەت باسشىسى.

سوڭعى جاڭالىقتار

ۇقساس جاڭالىقتار