الدىمەن مينيستر تاراز قالاسىنداعى وبلىس اكىمدىگى ءدىن ىستەرى باسقارماسى مەن ءدىن پروبلەمالارىن زەرتتەۋ ورتالىعىندا بولىپ, ايماقتاعى ءدىني احۋالعا دەن قويدى. كەزدەسۋ بارىسىندا ماماندار ايتقان ۇتىمدى ۇسىنىستاردى تىڭداپ, سالاداعى وزەكتى ماسەلەلەردى تالقىلادى.
بۇدان سوڭ وڭىردەگى ۇكىمەتتىك ەمەس ۇيىم وكىلدەرىمەن كەزدەسۋ وتكىزدى. وڭىردە جەتى جۇزدەن استام ۇەۇ بار, ولاردى تولعاندىراتىن ماسەلە دە جەتكىلىكتى.
كەيىننەن مينيستر وبلىس جاستارىمەن جۇزدەستى. جاس بۋىنعا مەملەكەت تاراپىنان ءبولىنىپ جاتقان گرانتتار مەن جاستار ساياساتىنا قاتىستى باعدارلامالار تۋرالى اڭگىمەلەگەن اسقار قۋانىش ۇلى جاستاردى بەلسەندى بولۋعا شاقىردى. ءوز كەزەگىندە ءوڭىر جاستارى ۆولونتەرلىك قىزمەتپەن اينالىسۋ, گرانتتارعا قاتىستى ساۋالدارىن قويىپ, ستارتاپ جوبالارىن ءمينيستردىڭ نازارىنا ۇسىندى.
تارازداعى ساپارىنىڭ سوڭىندا ا.وماروۆ Jambyl تەلەارناسىنا ارنايى ات باسىن بۇرىپ, رەسپۋبليكالىق جانە وبلىستىق باق وكىلدەرىمەن جۇزدەستى. كەزدەسۋ بارىسىندا وبلىستىق تەلەارنانىڭ ديرەكتورى مەيىرجان الىبەك ۇلى, ارداگەر جۋرناليست جاڭاباي ميلليونوۆ, Taraz 24 تەلەارناسىنىڭ نەگىزىن قالاۋشى زارينا قۋات باستاعان وزگە دە جۋرناليستەر كوكەيكەستى ماسەلەلەردى كوتەردى. ولار وڭىردەگى باق-تاعى قالاماقى ماسەلەسىن, جۋرناليستەردىڭ مارتەبەسى مەن قۇقىعى, مەملەكەتتىك تاپسىرىسقا قاتىستى تۇيتكىلدەر توڭىرەگىندە اڭگىمە ءوربىتتى. سونداي-اق باسپاسوزگە جازىلىم ناۋقانىندا تۋىندايتىن قيىندىقتاردى دا جايىپ سالدى. ارىپتەستەردىڭ اڭگىمەسىن مۇقيات تىڭداعان مينيستر بارلىق ماسەلەگە قاتىستى ءوز ويىمەن ءبولىستى.
وبلىستىق Jambyl تەلەارناسىنىڭ ديرەكتورى مەيىرجان الىبەك ۇلى جولداعان ساۋالعا ءۇن قاتقان مينيستر: «وڭىردەگى تەلەارنالار جەرگىلىكتى اكىمدىكتىڭ يەلىگىنە ءوتۋى كەرەك نەمەسە Qazaqstan تەلەراديوكورپوراتسياسىنىڭ قۇرامىندا بولۋعا ءتيىس دەگەن ماسەلەگە قاتىستى ناقتى پىكىر ايتۋعا ءالى ەرتە. بۇل ماسەلە زەردەلەنىپ جاتىر. بىرقاتار وڭىردەگى اكىمدىكتەر جەرگىلىكتى تەلەارنالاردى قامقورلىعىنا العىسى كەلسە, كەيبىر وڭىردەگى اكىمدىكتەر ءالى دە دايىن ەمەس. مەن جەكە كوزقاراسىمدى ايتسام, ەرتەڭ ارىپتەستەر ءىلىپ اكەتەدى. سوندىقتان ءالىپتىڭ ارتىن باعا تۇرايىق», دەدى ول.
جايشىلىقتا لاۋازىمدى قىزمەتتەگى شەنەۋنىكتەردى تىم سيرەك كورەتىن مويىنقۇمدىق تۇرعىندار اۋدانعا ات باسىن ارنايى بۇرعان مينيسترمەن كەزدەسۋگە اسىعىپ جەتكەنى بايقالىپ تۇردى. بىردە ءبىر اۋىلىنا كوگىلدىر وتىن تارتىلماعان اۋدان رەتىندە جۇرتشىلىققا تانىلعان مويىنقۇمدا ماسەلەلەر شاش ەتەكتەن. الايدا ءوڭىر باسشىسى 2025 جىلعا قاراي وبلىستا اۋىز سۋ مەن كوگىلدىر وتىن ماسەلەسى 100 پايىز شەشىمىن تاباتىنىن ايتقان بولاتىن. مويىنقۇمدىقتار سولاي بولاتىنىنا سەنگىسى كەلەدى...
تۇرعىندارمەن كەزدەسپەس بۇرىن مينيستر اۋداندىق ورتالىق مەشىتكە باس سۇقتى. جەرگىلىكتى يمامدار مينيسترمەن كەزدەسۋ بارىسىندا مامان تاپشىلىعىن ايتىپ, جاستاردىڭ اۋدانعا كەلە بەرمەيتىنىن اتاپ ءوتتى. جالپى, يمامداردىڭ جالاقىسى ازداۋ ەكەنىن دە ماسەلە رەتىندە كوتەردى.
حالىقپەن وتكەن كەزدەسۋ بارىسىندا ءسوز العان ا.وماروۆ پرەزيدەنت جارلىعىنا سايكەس وڭىرلەردى ارالاپ جۇرگەنىن جەتكىزدى.
«البەتتە, ءبىزدىڭ مينيسترلىك نەگىزىنەن باق, ءدىن, جاستار ساياساتى ماسەلەلەرىنە باسا نازار اۋدارادى. دەگەنمەن بۇگىنگى كەزدەسۋدە بارلىق سالاعا قاتىستى, ءتىپتى الەۋمەتتىك ماسەلەلەردى دە ەركىن ايتا بەرسەڭىزدەر بولادى. سىزدەر كوتەرگەن وزەكتى ماسەلەلەردى ۇكىمەت مۇشەسى رەتىندە ءتيىستى مينيسترلىكتەرگە جەتكىزىپ, وڭ شەشىمىن تابۋىنا ىقپال ەتۋگە تىرىسامىن», دەدى مينيستر.
كەزدەسۋ بارىسىندا ا.وماروۆ مينيسترلىكتىڭ ىسكە اسىرعان جوبالارى, اتقارعان جۇمىستارى مەن نەگىزگى مىندەتتەرى تۋرالى ايتىپ بەردى. باسقوسۋ بارىسىندا حالىق ماڭىزدى ماسەلەلەردى كوتەردى. اۋدان تۇرعىندارىن گاز, اۋىز سۋ, ۇيالى تەلەفون جانە ينتەرنەت بايلانىسى, جەدەل جاردەم, كوپبالالى انالاردىڭ جاردەماقىسى ماسەلەلەرى تولعاندىرادى ەكەن. ماسەلەن, قىلىشباي اۋىلىنان كەلگەن زەينەتكەر سۆەتا ساكيەۆا جولدى اسفالتتاۋ, ۇيالى بايلانىس, اۋىز سۋ ساپاسىنىڭ جايىنا توقتالدى. كەزدەسۋ بارىسىندا ۇلانبەل
اۋىلىنا ينتەرنەت اۋاداي قاجەت ەكەنى دە ايتىلدى. ا.وماروۆ جەرگىلىكتى جەردە شەشىلۋگە ءتيىستى ماسەلەنى اۋدان جانە وبلىس اكىمدىگى وكىلدەرىمەن بىرگە تالقىلادى. ال رەسپۋبليكالىق دەڭگەيدە قارالاتىن سۇراقتاردى ءتيىستى ورگاندارعا جەتكىزەتىنىن ايتتى.
سونىمەن قاتار اۋداندىق «مويىنقۇم تاڭى» گازەتىنىڭ رەداكتسياسىندا بولىپ, جەرگىلىكتى تىلشىلەردىڭ تىلەگىن تىڭدادى. كەيىننەن ازاماتتاردى جەكە سۇراقتارى بويىنشا قابىلداپ, وتىنىشتەرىنە نازار اۋداردى.
جامبىل وبلىسى
