البەتتە, جوعارىدا ءبىز ءسوز ەتكەن اقىنداردىڭ بارلىعى دا ادەبيەت الەمىندە ءوز ورنىن قالىپتاستىرىپ كەتكەن. ال جيىرماعا جەتپەي ءوز وتىنا ءوزى جانىپ كەتكەن تالانتتار قانشاما؟! ولاردىڭ قاتارىندا قازاق اقىندارى دا بارشىلىق.
ولەڭ الەمىندەگى ورنەگى بولەك اقىنداردىڭ ءبىرى – سالتانات اباشەۆا. تابيعات تامىرشىسى اتانىپ كەتكەن بەلگىلى اقىن قۋاندىق شولاقتىڭ قىزى سالتانات جيىرما جاسقا جەتپەي باقيلىق بولدى. ءومىرىن ولەڭمەن ورنەكتەگەن جاس تالانتتىڭ جىرلارىنان وكىنىش پەن وكسىكتىڭ ءۇنى ەستىلەتىندەي مە, قالاي؟
«داۋا بولماي تىرلىكتىڭ قۇرعىر ەمى,
وزەگىمدى وكىنىش تىلگىلەدى.
جۇرەككە جول سالسام دەپ
جاس قالامىم,
قولدان سۋسىپ كەتە مە, كىم بىلەدى؟
جارىق تا ءبىر, مەن ءۇشىن مولا دا ءبىر,
نازى باسىم نە دەمەس نالا كوڭىل.
اڭداۋسىزدا اتىلعان وق سەكىلدى,
وسىنشاما كەلتە مە ەڭ,
شولاق ءومىر؟!
ءوزىمدى – ءوزىم زەردەلەپ ۇعىنعانشا,
جالعان, جالعان, جالت بەردىڭ
بۇرىلعانشا.
ولمەگەنىم سول مەنىڭ –
جۇرت كوڭىلىندە
جان-جۇرەكتى جالعىز
جول جىرىم قالسا»,
دەپ جىرلايدى ون توعىز جاستاعى اقىن.
ونىڭ جانىن جەگىدەي جەگەن نەندەي مۇڭ؟ نەگە ول «وسىنشاما كەلتە مە ەڭ, شولاق ءومىر؟» دەپ جىرلادى؟ وسى ءبىر ساۋال كوكەيىمىزدى تىلگىلەي تۇسەتىنى بار. جيىرما جاسقا جەتپەي ءومىر مەن ءولىمنىڭ ءمانىن ۇعىپ قويدى ما ەكەن؟ كىم ءبىلسىن...
«كوكىرەگىمە قابىلداپ سايتان وعىن,
قۇردىمعا اۋىپ قۇمىقتى
ايتار ءانىم...
داۋا تاپپاي جانىما داۋىل كۇنگى,
ەسكەگى جوق قايىقتاي شايقالامىن.
تۇتامدانىپ ءۇمىتتىڭ
قۇلاش ءجىبى,
قۇلاعىما قايعىنىڭ ۇلاستى ءۇنى.
جيرەندىرىپ بارادى
شىندىعى جوق,
ادىلەتسىز ءومىردىڭ لاستىعى»,
دەپ كەلەتىن شۋماقتارىنان سالتاناتتىڭ جانىن الدەبىر قايعىنىڭ جەگىدەي جەگەنىن سەزىنگەندەي بولامىز.
ءيا, بالا كۇنىنەن ولەڭنىڭ تۇنىعىنان قانىپ ىشكەن سالتاناتتىڭ جىرلارى راسىندا دا قۋاتتى ەدى. ونى جوعارىداعى شۋماقتاردىڭ ءوزى دە ايقىنداپ تۇر عوي. ءبىزدىڭ جانىمىزعا باتاتىنى – ونىڭ فانيمەن ەرتە قوشتاسقانى. ونىڭ تاعدىرى – شەشىلمەگەن جۇمباق. جاۋابى جوق جۇمباقتى ەشكىم شەشە المايدى...
جامبىل وبلىسى
