«بۇگىنگى كۇنى نەگىزگى جۇمىس تۇرلەرى, ونىڭ ىشىندە ۇشۋ-قونۋ جولاعىن 2700 مەترگە دەيىن ۇزارتۋ جانە رۋلدەۋ جولىن كەڭەيتۋ اياقتالدى, جەتىسۋ وبلىسىنىڭ اكىمدىگى مەردىگەرلىك ۇيىممەن بىرلەسىپ جوبا بويىنشا قالعان جۇمىستاردى ىسكە اسىرۋ بويىنشا شارالار قابىلداۋدا», دەلىنگەن ازاماتتىق اۆياتسيا كوميتەتى حابارلاماسىندا.
ۆەدومستۆونىڭ مالىمەتىنشە, جۇرگىزىلگەن تەكسەرۋ ناتيجەلەرى بويىنشا ءۇشارال اۋەجايىنا پايدالانۋعا جارامدىلىق سەرتيفيكاتى بەرىلدى.
بۇگىن اۋە كومپانيالارى ءۇشارال – الماتى جانە ءۇشارال – نۇر-سۇلتان سۋبسيديالاناتىن باعىتتارى بويىنشا اۆيابيلەتتەردىڭ ساتىلىمىن اشادى.
رەيستەردى SCAT اۆياكومپانياسى crj2 (50 ورىندىق) اۋە كەمەلەرىندە ءار باعىت بويىنشا اپتاسىنا 14 رەيس جيىلىگىمەن جازعى ماۋسىمدا, قالعان ۋاقىتتا 7 رەيس ورىندايدى. بيلەت قۇنى تيىسىنشە 15 000 تەڭگە جانە 16 000 تەڭگە بولادى. ۇشۋلار 2022 جىلدىڭ 15 تامىزىنان باستالادى.
سونداي-اق ءۇشارال-تالدىقورعان باعىتى بويىنشا «جەتىسۋ» اۆياكومپانياسى 11 تامىزدان باستاپ جازعى ماۋسىمدا 28 رەيس جيىلىگىمەن, قالعان كەزەڭدە 14 رەيس ورىندايدى. ۇشۋلار L-410 (19 ورىندىق) ۇشاعىندا ورىندالادى. بيلەت باعاسى - 8 000 تەڭگە.
