وبلىس ورتالىعىنداعى قوعامدىق كولىكتەردىڭ ماسەلەسى لايىقتى شەشىم تاپپاي كەلە جاتقانىنا ءبىراز بولدى. ايتالىق, كەز كەلگەن سەمەيلىكتەن سۇراساڭىز, باعىتتاعى اۆتوبۋستاردىڭ ازدىعىنا, جۇرگىزۋشىلەر مەن كوندۋكتورلاردىڭ قىزمەتىنە شاعىمدانا جونەلەدى.
جول اقىسىن تولەۋ ءراسىمى ءبىر ىزگە تۇسىرىلمەگەنى دە حالىققا قولايسىز. ەگەر دە كەيبىر اۆتوبۋستاردا جول اقىسىن قولما-قول اقشامەن تولەۋگە تۋرا كەلسە, باسقالارىندا كولىك كارتاسى قابىلدانادى. وسى جانە اۆتوبۋستاردىڭ مارشرۋتتاردان ەرتە شىعىپ كەتۋى جايلى ءوڭىر باسشىسى جولاۋشىلاردى تاسىمالدايتىن كومپانيا وكىلدەرىنە ايتىپ, ماسەلەنى جىلدام رەتتەۋدى تاپسىردى.
«اۆتوبۋستار جۇمىسىن ەرتە اياقتايتىنىن ەسكەرسەك, كەيبىر قوعامدىق ورىندارعا دا بەلگىلەنگەن ۋاقىتتان بۇرىن جۇمىستارىن توقتاتۋعا تۋرا كەلەدى. بۇل مەيرامحانالار نەمەسە باسقا دا ويىن-ساۋىق ورتالىقتارىنا قاتىستى ەمەس. ماسەلە حالىق سەرۋەندەيتىن قالالىق ساياباقتاردا بولىپ تۇر. ايتالىق, جەكە ءوزىم ساياباققا بارىپ, ونىڭ 19.30-دا جابىق تۇرعانىن بايقادىم. نەگە؟ ويتكەنى بۇل ۋاقىتتان كەش قالسا ادامدار ۇيلەرىنە جەتە الماي قالادى», دەدى ن.ۇرانحاەۆ.
«سەماۆتوپارك» جشس-نىڭ ديرەكتورى گريگوري پينچۋك بۇل ماسەلەدەن حاباردار ەكەنىن ايتا كەلە جۋىق ارادا ونى شەشۋدىڭ جولدارىن قاراستىراتىنىن جەتكىزدى.
ء«بىز قىزمەتكەرلەردىڭ جالاقىسىن كوتەرۋ مەن كەشكى ۋاقىتتاردا اۆتوبۋستاردىڭ سانىن ۇلعايتۋعا بايلانىستى ۇسىنىستاردى پىسىقتادىق», دەدى گ.پينچۋك.
وبلىس اكىمى بۇل ماسەلە قالا ءۇشىن ماڭىزدى بولعاندىقتان ونى مىندەتتى تۇردە شەشۋ كەرەك ەكەنىن جەتكىزدى. «جالاقىنى كوتەرىپ, مارشرۋت سانىن ۇلعايتۋمەن بىرگە اۆتوبۋستاردىڭ قوزعالىس كەستەسىن ۇزارتقان دۇرىس. ءوز تاراپىمىزدان جىلى ايالدامالاردىڭ ماسەلەسىمەن اينالىسامىز», دەدى ن.ۇرانحاەۆ.
اباي وبلىسى
