ولار «زەردە» حولدينگىندەگى جاعدايدىڭ تولىق بەينەسىن بەرۋدى جانە ونىڭ ماڭىزدىلىعىن اتاۋدى اسا قاجەت دەپ سانايدى.
«وزدەرىڭىز بىلەتىندەي, حولدينگ قىزمەتكەرلەرى مەملەكەت باسشىسىنىڭ اتىنا ۇجىمدى تاراتپاۋ تۋرالى وتىنىشپەن حات جازعان بولاتىن. بۇدان سوڭ ينتەرنەتتە حولدينگتى جاقتاۋشىلار مەن داتتاۋشىلار اراسىندا «سوعىس» باستالىپ كەتتى. ءبىز ءوز قىزمەتىمىز بەن جۇمىسىمىزدىڭ ناتيجەلەرى تۋرالى جاريالانىمدارعا تولەم جاساماۋ ساياساتىن ۇستانامىز. سەبەبى ءبىز بىرەۋدىڭ مۇددەسىن جاقتامايمىز, تەك پايدا اكەلە وتىرىپ, ءوز جۇمىسىمىزدى ىستەيمىز. ءبىزدىڭ ناتيجەمىزدى IT-نارىق كورىپ وتىر, ولاردىڭ كەيبىرى بۇل تۋرالى الدەقاشان اشىق ايتىپ تا ۇلگەردى», دەدى ۇلتتىق اقپاراتتىق تەحنولوگيا ورتالىعىنىڭ ماماندارى.
حولدينگتىڭ تيىمسىزدىگى, كوپشىلىك ايتقانداي, ونىڭ تاريحىنىڭ العاشقى كەزەڭدەرىندە بولعان. بىراق سوڭعى ەكى جىلدا ەلەۋلى وزگەرىستەر بولدى. اۆتورلاردىڭ پايىمىنشا, بىراق قانداي دا ءبىر سەبەپتەرمەن بۇل فاكتىلەر ەسكەرۋسىز قالۋدا نەمەسە بۇرمالانعان. سونىمەن قاتار حولدينگتى تاراتۋ كۆازيمەملەكەتتىك سەكتور قىزمەتكەرلەرىن ۇستاۋعا ارنالعان مەملەكەتتىك بيۋدجەتتى ۇنەمدەۋمەن نەگىزدەلەدى, بىراق سونىمەن ءبىر مەزگىلدە «تسيفرلىق ۇكىمەتتى قولداۋ ورتالىعى» رمك بىردەي شتاتتىق كەستەمەن جاڭا ۇيىم قۇرىلۋدا. بۇل قازىردىڭ وزىندە سۇراقتار تۋعىزىپ وتىر.
«2020 جىلدان باستاپ وڭتايلاندىرۋ اياسىندا حولدينگتىڭ شتات سانى ايتارلىقتاي قىسقاردى. 2021 جىلى كومپانيانىڭ وندىرىستىك قىزمەتى تيىمدىلىكتىڭ ارتۋى اياسىندا العاش رەت ءوزىن تولىقتاي اقتادى.
ءبىر قىزىعى, 2020 جىلى ەلدى تسيفرلاندىرۋ جۇمىستارى جاپپاي سىنعا ۇشىرادى. ال ونىڭ سەبەبى 42 500 تەڭگە كولەمىندەگى اتاۋلى الەۋمەتتىك جاردەمدەردى ۇسىنۋ كەزەڭىندە پايدالانۋشىلار اعىنىنا توتەپ بەرە الماعان eGov پورتالىنىڭ جۇمىسىنداعى تۇراقتى ساتسىزدىكتەردەن بولدى. ارتىنشا «زەردە» حولدينگىنىڭ باسشىسى بولىپ دەربەس مامان ارمان ابدراسيلوۆ تاعايىندالدى. وعان جاعدايدى تەز ارادا تۇزەتىپ, سالادا جۇيەلى رەفورمالار جۇرگىزۋ تاپسىرىلدى», دەپ ەسكە سالدى سالا ماماندارى.
مالىمدەمەدەن بەلگىلى بولعانداي, حولدينگ پەن ەنشىلەس ۇيىمداردىڭ ىشكى پروتسەستەرىن تالداۋ مۇنداعى قيىن جاعدايدى كورسەتكەن. اتاپ ايتقاندا, ينفراقۇرىلىم پروبلەمالى جاعدايدا بولدى, تۇراقتى اقاۋلارىمەن ماكسيمالدى جۇكتەمەدە جۇمىس ىستەدى, رەزەرۆتىك جۇيە جوق, بايلانىس ارنالارى نەگىزگى دەرەكتەرمەن الماسۋعا مۇمكىندىك بەرمەدى, بيۋدجەتتەر مەن ساتىپ الۋ جۇيەسى سىبايلاس جەمقورلىققا تولعان, كادر تاپشىلىعى بار. ترايباليزم مەن فاۆوريتيزممەن قاتار جۇرەتىن كورپوراتيۆتىك باسقارۋ جۇيەسى, تاۋەكەلدەردى باسقارۋ مادەنيەتى ءتىپتى دە قازىرگىدەي ەمەس. كارانتيننىڭ باستالۋى وسىنىڭ بارلىعىنىڭ سالدارىن ەسەلەپ اشكەرەلەدى.
«باعدارلامالىق قامتاماسىز ەتۋدى ازىرلەۋدە دە ەنشىلەس كومپانيالارعا باسىمدىق بەرىلدى. بۇل شارالار تەك «ۇات» اق قىزمەتىنەن تسيفرلاندىرۋ سالاسىنداعى ساياساتتى ايقىندايتىن توپتارعا جىلىنا 5 ملرد تەڭگە كولەمىندە پايدا اكەلدى, ياعني بيۋدجەتكە وسىنشا زالال تيگىزدى.
جۇرگىزىلگەن ىشكى اۋديت 2018-2020 جىلدارى 17,5 ملرد تەڭگە ورىنسىز شىعىن بولعانىن كورسەتتى. ماتەريالدار قارجىلىق مونيتورينگ اگەنتتىگى مەن انتيكورعا بەرىلدى», دەلىنگەن مالىمدەمەدە.
وسىلايشا, «زەردە» حولدينگى مەن ونىڭ ەنشىلەس كومپانيالارى «اسىل تاۋ» بيزنەس ورتالىعىندا (مەكەن-جايى: استانا ق., الماتى ك-ءسى, 1) كەزدەيسوق ەمەس جانە جوعارى لاۋازىمدى شەنەۋنىكتىڭ تۋىسقانىنا جوعارى باعامەن جالداۋ اقىسىن تولەگەن. جاڭا باسشىلىقتىڭ باستاماسىمەن ەكسپو-2017 اۋماعىندا جاڭا جيھازى بار ا كلاسىنداعى كەڭسەلەرگە كوشۋ ءۇي-جايلاردى جالعا الۋ قۇنىن 2 ەسە ۇنەمدەۋگە مۇمكىندىك بەردى.
«2020-2022 جىلدارى ءدال وسى «زەردە» جاڭا باسشىلىعىنىڭ باتىل ارەكەتتەرى مەن جۇيەلى جۇمىسىنىڭ ارقاسىندا حولدينگتىڭ بارلىق كومپانيالارىنىڭ قىزمەتىندە ايتارلىقتاي وڭ وزگەرىستەرگە قول جەتكىزۋگە مۇمكىندىك تۋدى. سىبايلاس جەمقورلىق سحەمالارى جويىلىپ, رۋشىلدىق پەن جاعىمپازدىق ساياساتتان مەريتوكراتياعا كوشۋ بايقالىپ, اۋقىمدى كادرلىق جۇمىستار جۇرگىزىلدى», دەيدى سالا ماماندارى.
توپتاعى بارلىق كومپانيالاردىڭ قارجىلىق كورسەتكىشتەرى بىرنەشە ەسە ءوستى, بۇل وتكەن كەزەڭدەگى وراسان تيىمسىزدىكتىڭ دالەلى. اتاپ ايتقاندا, «ۇات» اق 2020-2021 جىلدارعا جالپى كىرىستى ساقتاي وتىرىپ, تازا پايدانىڭ 5 ەسە وسكەنىن كورسەتتى (BDO حالىقارالىق اۋديتورلىق كومپانياسىنىڭ ەسەبىمەن راستالعان). كورسەتكىشتەردىڭ ءوسۋى 2022 جىلى جالعاسۋدا, ناتيجە جوسپارلى اۋديت كەزىندە ايقىندالادى.
قىزمەتكەرلەردىڭ دەرەگىنشە, جيناقتالعان تاجىريبە ۇلتتىق بەينەباقىلاۋ جۇيەسى سياقتى توقتاتىلعان ءىرى ينفراقۇرىلىمدىق جوبالاردى قوسىمشا قارجىلاندىرۋسىز ىسكە قوسۋعا مۇمكىندىك بەردى (بۇرىن بۇل جوباعا 50 ملرد تەڭگە جۇمساۋ جوسپارلانعان بولاتىن). سونىمەن قاتا پرەزيدەنتتىك كوممۋنيكاتسيالار, ۇكىمەتتىك كوممۋنيكاتسيالار, قورعانىس مينيسترلىگى جەلىلەرىن جاڭارتۋ, سونداي-اق ءۇزىلىسسىز بايلانىس ءۇشىن, ونىڭ ىشىندە توتەنشە جاعدايلار, بلوكتاۋ جاعدايلارى ءۇشىن اۋىلدىق اكىمدىكتەر دەڭگەيىنە دەيىن جاڭا قاۋىپسىز بايلانىس جەلىلەرىن سالۋ جوبالارى جوسپارلانۋدا.
«ال مۇنىڭ الدىندا ەلىمىزدىڭ نەگىزگى سەرۆەرلىك ينفراقۇرىلىمىنىڭ قيىن جاعدايىنىڭ دالەلى رەتىندە, جازدا سەرۆەرلىك بولمەلەردىڭ قىزىپ كەتپەۋى ءۇشىن قىزمەتكەرلەرگە سىرتقى سالقىنداتۋ قوندىرعىلارىن قولمەن سۋلاندىرۋعا تۋرا كەلگەنىن اتاپ ءوتۋ جەتكىلىكتى.
ماسەلەن, «ەلەكتروندىق ۇكىمەت» تاريحىندا العاش رەت دەرەكتەردىڭ ساقتىق كوشىرمەسىن جاساۋ قاراستىرىلعان. دەرەكتەردىڭ جوعالۋ قاۋپى قازاقستاندىق «ەلەكتروندىق ۇكىمەتتى» نەگىزى قالانعان ساتتەن باستاپ جۇرەدى جانە تسيفرلىق اپات ورىن الۋى مۇمكىن ەمەس», دەدى «ۇات» اق ماماندارى.
ولاردىڭ سوزىنشە, «ەلەكتروندىق ۇكىمەتتىڭ» باعدارلامالىق بولىگىندە دە ءالى شەشىمىن تاپپاعان بىرقاتار كۇردەلى ماسەل بار. «ەلەكتروندىق ۇكىمەتتىڭ» كوپتەگەن قۇرامداس بولىكتەرىنىڭ قۇجاتتاماسى جوق, تەحنولوگيالار ەسكىرگەن, اقپاراتتىق قاۋىپسىزدىك ستاندارتتارى ساقتالماعان, زاماناۋي الەمنىڭ ۇنەمى ءوسىپ كەلە جاتقان تالاپتارى ءبىزدى تەحنولوگيالىق تۇيىققا يتەرمەلەيدى, ودان شىعۋدىڭ جالعىز جولى – جاڭعىرتۋ. جيناقتالعان «تەحنولوگيالىق قارىزدى» وتەۋ كەرەك.
«eGov-تى جاڭعىرتۋ بويىنشا قاجەتتى دايىندىق شارالارى اياقتالدى. 2023 جىلدىڭ سوڭىنا قاراي ەڭ جوعارى حالىقارالىق ستاندارتتارعا سايكەس بارلىق نەگىزگى كومپونەنتتەردىڭ ۇزدىكسىز جۇمىسى قامتاماسىز ەتىلەدى. حولدينگتىڭ ءوسۋى ناتيجەسىندە پايدا بولعان ۇنەمدەۋ ەسەبىنەن جاڭعىرتۋ جۇمىستارىن جۇرگىزۋ جوسپارلانۋدا», دەدى قىزمەتكەرلەر.
«زەردە» حولدينگى تيىسىنشە «قازاقستان پلاتفورما رەتىندە» جانە «ورتالىق ازيا پلاتفورما رەتىندە» اتتى جەرگىلىكتى جانە جاھاندىق وڭىرلىك جوبالاردىڭ باستاماشىسى بولدى. ءبىرىنشى جوبا قازاقستاندىق مەملەكەتتىك باسقارۋ جۇيەسىن تسيفرلىق تۇرلەندىرۋگە باعىتتالعان, ەكىنشىسى بولاشاقتا بارلىق دەڭگەيدەگى ەلدەردىڭ ۇزدىكسىز ينتەگراتسياسىن قامتاماسىز ەتۋ ءۇشىن وڭىرلىك تسيفرلىق جوبالاردى جۇيەلەۋگە جانە ۇيلەستىرۋگە جۇمىس ىستەيدى. باستامالاردى ايماقتىڭ بارلىق ەلدەرى, بۇۇ جانە باسقا دا حالىقارالىق ۇيىمدار وڭ قابىلداعان.
