وبلىستىق جەر قاتىناستارى باسقارماسىنىڭ باسشىسى ەرعالي تىلەگەننىڭ ايتۋىنشا, 2022 جىلى ەلدى مەكەندەردەگى ورتاق جايىلىم كولەمىن 1012,0 مىڭ گەكتارعا ۇلعايتۋ جوسپارى ازىرلەنىپ, ەلدى مەكەندەردى ورتاق جايىلىممەن قامتاماسىز ەتۋ بويىنشا ءار ايعا جوسپار كەستەسى بەكىتىلگەن.
بۇگىنگى كۇنى بۇل جۇمىستار ەكى باعىتتا جۇزەگە اسىرىلۋدا. ءبىرىنشى باعىت بويىنشا ماقساتىنا ساي پايدالانىلماعان 405,2 مىڭ گەكتار جايىلىمدىق جەردى مەملەكەت مەنشىگىنە قايتارۋ كوزدەلسە, ەكىنشى باعىت بويىنشا ءىرى جەر پايدالانۋشىلارمەن مەموراندۋم ارقىلى 606,8 مىڭ گەكتار جەردى قايتارۋ جوسپارلانعان. ال بۇگىندە 58,5 مىڭ گەكتار جەر مەملەكەت مەنشىگىنە قايتارىلسا, مەموراندۋم ارقىلى 267 مىڭ گەكتار جايىلىم ەلگە بەرىلدى.
سونىمەن قاتار 2021 جىلى قۇرىلعان جۇمىسشى توپ تاراپىنان اۋدان, قالا اكىمدىكتەرى بويىنشا جايىلىم جەر ۋچاسكەلەرىنە زەردەلەۋ جۇمىستارى جۇرگىزىلگەن. ناتيجەسىندە 476,2 مىڭ گەكتار جەر ماقساتىنا ساي پايدالانىلماعانى انىقتالىپ, حابارلاما بەرىلگەن. تۇركىستان وبلىسىنىڭ اكىمى ومىرزاق شوكەەۆ جايىلىم جەردى ەلگە قايتارۋ جۇمىسى جالعاساتىنىن جەتكىزدى.
«جايىلىم قورىن مولايتۋ – وتە ماڭىزدى ءارى جاۋاپتى ماسەلە. اۋدان اكىمدەرى جاۋاپتى باسقارمالارمەن بىرلەسىپ جۇمىستى جالعاستىرۋى ءتيىس. ءبىزدىڭ مەجە – ءبىر ميلليون گەكتار جايىلىمدى قايتارۋ. قازىردىڭ وزىندە 30 پايىزى قايتارىلىپ ۇلگەردى. مەموراندۋم ارقىلى جاقسى جۇمىس اتقارىلىپ جاتىر. جەردىڭ يەلەرى جايىلىمعا مۇقتاج جاندار وزدەرىنىڭ اۋىلداستارى ەكەنىن ءتۇسىنۋى ءتيىس. يگەرىلمەي جاتقان جەردى ەشكىم بوس قالدىرىپ قويا سالمايدى. ءار اي سايىن وسى ماسەلە اپپارات وتىرىسىندا كۇن تارتىبىنە ەنگىزىلىپ تۇرسىن. جايىلىم ماسەلەسى تىكەلەي قاداعالاۋدا بولادى», دەدى ومىرزاق شوكەەۆ.
