2030 جىلعا دەيىن «ۇشتىكتىڭ» جالپى ىشكى ءونىمى 900 ملرد. دوللاردى قۇراۋى مۇمكىن

استانا. 1 مامىر. 2030 جىلعا قاراي ەۋرازيالىق ەكونوميكالىق وداققا مۇشە ەلدەردىڭ جالپى ىشكى ءونىمى 900 ملرد. دوللاردى قۇرايدى. م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە جۇرگىزگەن ءدارىسى بارىسىندا نۇرسۇلتان نازارباەۆ وسىلاي دەدى. بۇل تۋرالى egemen.kz ءتىلشىسى حابارلادى. نۇرسۇلتان نازارباەۆ ەۋرازيالىق ينتەگراتسيانىڭ كوپتەگەن پايداسى بار ەكەنىن ايتا كەلە: «ەۋرازيالىق يدەيا ءححى عاسىردىڭ ەكىنشى ونجىلدىعىنىڭ ورتاسىنا قاراي ناقتى ساياسي, ەكونوميكالىق گەوساياسي ماڭىزعا يە بولا باستادى. جوعارعى ەۋرازيالىق كەڭەس, ەۋرازيالىق ەكونوميكالىق كوميسسيا كوڭىلگە قونىمدى جۇمىس ىستەپ كەلەدى. قازاقستان, بەلارۋس, رەسەي ۇشتىگى بىرىڭعاي كەدەندىك كودەكستى پايدالانا وتىرىپ, ماكروەكونوميكالىق ساياساتىن ۇيلەستىرۋدە. ەۋرازيالىق ەكونوميكالىق وداق يدەياسىنىڭ تۋىنداعانىنا 20 جىل تولۋى قارساڭىندا اتالعان ينتەگراتسيالىق بىرلەستىكتى قۇرۋ تۋرالى تاريحا كەلىسىمگە استانادا قول قويىلۋى ۇلكەن ماڭىزعا يە», – دەدى. قازىرگى تاڭدا وسى قۇرىلعالى وتىرعان وداققا كوپتەگەن مەملەكەتتەردىڭ قىزىعۋشىلىق تانىتىپ وتىرعانىن العا تارتقان نۇرسۇلتان نازارباەۆ: «ەۋرازيالىق ىقپالداستىقتىڭ ەكونوميكالىق الەۋەتى مىقتى دەپ ەسەپتەيمىز. ءۇش ەل ەكونوميكاسىنىڭ جيىنتىعى 0,2 تريلليون دوللاردى قۇرايدى. ونەركاسىپتىك ءونىم ءوندىرىسىنىڭ جيىنتىق كورسەتكىشى 1,5 تريلليون اقش دوللارىن قۇرادى. 2030 جىلعا قاراي وسى ىقپالداستىقتىڭ ءتيىمدى سيپاتى رەتىندە جالپى ىشكى ءونىمنىڭ جيىنتىق ءوسىمى 900 ميلليارد دوللاردى قۇراۋى مۇمكىن. بۇل كورسەتكىشتەردى ماماندار ەسەپتەپ شىققان. وسىلايشا, ەۋرازيالىق ءوزارا ىقپالداستىق ونىڭ بارلىق قاتىسۋشىلارى ءۇشىن قولايلى ستراتەگيالىق مۇمكىندىك بەرىپ وتىر», – دەدى. جولدىباي بازار. دەرەككوز: egemen.kz. فوتو: «24kz».