وسى يگى ىسكە قولعابىس ەتىپ كەلە جاتقاندار دا بار ەكەنىن ايتقان ءلازىم. ماسەلەن, 2021 جىلى بولات وتەمۇراتوۆ قورىنىڭ Jas Leader Akademiiasy باعدارلاماسى تۇركىستان وبلىسى مەن شىمكەنت قالاسىنىڭ 50 مەكتەبىندە ىسكە قوسىلعان-دى. بيىلعى وقۋ جىلىندا 5-11-سىنىپتاردىڭ 12,5 مىڭعا جۋىق وقۋشىسى سىني تۇرعىدا ويلاۋعا, توپپەن بىرگە جۇمىس ىستەۋگە, كوپشىلىك الدىندا ءسوز سويلەپ, ءوز پىكىرىن دالەلدى جەتكىزۋگە ماشىقتاندى. وسىلايشا, باعدارلاما اياسىندا بەلسەندىلىك تانىتقان 450 مەكتەپ وقۋشىسى الماتىدا ەكى لەكپەن وتكەن ءبىرىنشى Jas Leader فورۋمىنان تابىلدى.
I Jas Leader فورۋمىنا قاتىسقان كىشكەنتاي كوشباسشىلارعا وقۋ-اعارتۋ ءمينيسترى اسحات ايماعامبەتوۆ: «Jas Leader Akademiiasy باعدارلاماسى سىزدەردىڭ شىعارماشىلىق جانە كوشباسشىلىق الەۋەتتەرىڭىزدى اشا وتىرىپ, قازىرگى سۇرانىسقا يە داعدىلاردى دامىتۋعا ارنالعان قۇرالدار ۇسىندى. ەندى العان ءبىلىمىڭىزدى قالاي پايدالاناتىنىڭىز وزدەرىڭىزگە بايلانىستى. سىزدەردىڭ جاڭا قازاقستاننىڭ قالىپتاسۋىنا ۇلكەن ۇلەس قوساتىندارىڭىزعا سەنەمىن!» دەگەن قۇتتىقتاۋىن جولدادى.
قىسقاسى, قىزىقتى وقيعالارعا تولى بەس كۇندە مەكتەپ وقۋشىلارى ءتۇرلى جاتتىعۋلار مەن ويىندارعا قاتىسىپ, كوشباسشىلىق, شەشىم قابىلداۋ, قارىم-قاتىناس جاساۋداعى ءبىلىم-داعدىلاردى مەڭگەردى. مىسالى, تۇركىستان قالاسىنداعى №14 مەكتەپتىڭ 11-سىنىپ وقۋشىسى ايارۋ باقىتجانقىزىن كوشباسشىلىق باعدارلاماسىنىڭ دارىستەرى كوپشىلىك الدىندا سويلەۋدەن قايمىعۋدان ارىلتقان.
«قىركۇيەك ايىنان باستاپ مەكتەبىمىزدەگى Jas Leader ءAkademiىasy-نىڭ بارلىق فاكۋلتاتيۆ ساباقتارىنا قاتىستىم. وسى ۋاقىت ىشىندە شەشەندىك ونەر تۋرالى ءبىلىم العاندىقتان, توپ الدىندا ءسوز سويلەگەندە, ءوز پىكىرىمدى ايتار كەزدەگى قورقۋدى قويدىم. باسقالاردى تىڭداۋدى, كوپشىلىكپەن ارالاسۋدى ۇيرەندىم. ءبىر-ءبىرىمىزدى قۇرمەتتەۋ ارقىلى ءبىز شەشىمدەردى دە بىرگە تابامىز», دەيدى ايارۋ.
ەڭ باستىسى, Jas Leader Akademiiasy باعدارلاماسى ەڭ ماڭىزدى مىندەتتەردىڭ بىرىنە – قازاق تىلىندەگى زاماناۋي بىلىمگە قول جەتكىزىپ وتىر. قوردىڭ ديرەكتورى مارات ايتماعامبەتوۆتىڭ ايتۋىنشا, ۇزدىك شەتەلدىك تاجىريبەلەردى جيناقتاۋ جانە بەيىمدەۋ باعىتىندا ساراپشىلارمەن بىرلەسە وتىرىپ, بىرقاتار جۇمىس اتقارىلعان.
«العاش رەت مەكتەپتەردە انا تىلىندە وقىتىلاتىن حالىقارالىق وزىق تاجىريبەنى ءبىر باعدارلاماعا جيناقتادىق. فورۋمعا قاتىسۋشىلارمەن كەزدەسىپ, ولاردىڭ قۇلشىنىسىن كوردىم, جەتىستىكتەرى مەن جەڭىستەرىن ەستىدىم. دەمەك ءبىزدىڭ باعىتىمىز دۇرىس جانە وسكەلەڭ ۇرپاققا ارنالعان جوبالاردى دامىتۋدى ءارى قاراي جالعاستىرامىز», دەدى م.ايتماعامبەتوۆ.
سول سياقتى جوباعا تارتىلعان مۇعالىمدەر دە جاڭا داعدىلاردى مەڭگەرگەنىن ايتا كەتۋ كەرەك. تۇركىستان قالاسىنداعى №23 مەكتەپتىڭ مۇعالىمى گۇلجان ساۋلەنبەكوۆا مۇنداي ءبىلىم مەن داعدى وقۋشىلارمەن جۇمىس ىستەگەن كەزدە عانا ەمەس, ءوزىنىڭ بالالارىمەن قارىم-قاتىناس بارىسىندا دا كومەكتەسەتىنىن مويىنداپ: «مۇعالىمدەردىڭ جۇمىسى ارقاشان دا كوپ, كەيدە كۇندەلىكتى قىم-قۋىت تىرشىلىكتەن باستى مىندەتىمىز – بالالارعا ءبىلىم الۋ جولىندا كومەكتەسۋ ەكەنىن ۇمىتىپ كەتەمىز. Jas Leader Akademiiasy باعدارلاماسى بويىنشا مۇعالىمدەرگە ارنالعان وقىتۋدان وتكەننەن كەيىن وقۋشىلاردى سويلەتۋگە, تالقىلاۋعا ىنتالاندىرا باستادىم, ساباقتارىمىز قىزىعىراق وتەتىن بولدى. ءوز ماماندىعىما دەگەن ماحابباتىم قايتا ورالدى, ءتىپتى ونى ءوز بالالارىم دا بايقاپتى. ەندى بالالارىمنىڭ ەركەلىكتەرىن دۇرىس قابىلداپ, ايتقاندارىن مۇقيات تىڭداپ, ءۇي شارۋاسىن تىندىرۋدى تالقىلاۋعا جۇمىلدىرا باستادىم», دەيدى.
ايتقانداي, جاڭا وقۋ جىلىنان باستاپ بولات وتەمۇراتوۆ قورى اتالعان باعدارلامانى جامبىل جانە قىزىلوردا وبلىستارىندا دا قولعا الۋدى جوسپارلاپ وتىر. وسى ايدىڭ وزىندە ىرىكتەلگەن 50 مەكتەپتە مۇعالىمدەردىڭ بىلىكتىلىگىن ارتتىرۋ باستالادى. ءبىر اپتاعا سوزىلاتىن ترەنينگتە مۇعالىمدەر Jas Leader Akademiiasy باعدارلاماسىمەن تانىسىپ, زاماناۋي ءبىلىم بەرۋ تاسىلدەرىن مەڭگەرەدى.
الماتى
