«تەك سوڭعى 3 جىلدىڭ ىشىندە پروكۋرورلار 18 ملن گەكتار بوس جانە 3 ملن گەكتار زاڭسىز بەرىلگەن جايىلىمداردى انىقتادى, ولاردىڭ 5 ملن گەكتارى مەملەكەتكە قايتارىلىپ, 4 ملن گەكتارى اينالىمعا تارتىلدى», دەلىنگەن ۆەدومستۆو اقپاراتىندا.
ۋچاسكەلەردى يگەرۋگە مۇمكىندىگى جوق ادامدار جەردىڭ جاساندى تاپشىلىعىن تۋدىراتىنى اتاپ ءوتىلدى.
«ەل بويىنشا 15 ملن گەكتارعا جۋىق قوعامدىق جايىلىمدار جەتىسپەيدى, بۇل جەكە قوسالقى شارۋاشىلىقتاردىڭ مال جايۋ پروبلەماسىن تۋعىزادى. جاعدايدى جاقسارتۋ ءۇشىن بيىل اۋىل شارۋاشىلىعى مينيسترلىگىمەن بىرلەسىپ, مەملەكەتكە قوسىمشا 5 ملن گەكتار جەردى قايتارۋ جوسپارلانۋدا», دەلىنگەن باس پروكۋراتۋرا حابارلاماسىندا.
بۇل اۋىلدىق ەلدى مەكەندەر ماڭىنداعى جايىلىمدىق جەرلەردى جەكە تۇلعالارعا بەرۋگە جول بەرمەۋگە مۇمكىندىك بەرەدى.
«جايىلىمداردى بەرۋ كەزىندەگى زاڭ بۇزۋشىلىقتار جانە ءتيىستى باقىلاۋدىڭ جوقتىعى ءۇشىن پروكۋراتۋرا ورگاندارىنىڭ قاداعالاۋ اكتىلەرى بويىنشا 520 لاۋازىمدى تۇلعا تارتىپتىك جاۋاپكەرشىلىككە تارتىلدى», دەپ قوستى ۆەدومستۆودان.
