اماناتتىقتار ەل ايماقتارىنىڭ باسىم كوپشىلىگىندە بولىپ, وندا سايلاۋالدى ۋادەلەردىڭ ورىندالۋ بارىسىن تەكسەرىپ قانا قويماي, ازاماتتاردىڭ ءتۇرلى ماسەلەلەرگە قاتىستى وتىنىشتەرىن قارادى.
ماسەلەن, قاڭتار قاسىرەتى سالدارىنان كاسىبى زارداپ شەككەن الماتىداعى كاسىپكەرلەرمەن كەزدەسۋ بارىسىندا پارتيالىقتار وتەماقىنى ۋاقىتىلى تولەۋ ماسەلەسىن باقىلاۋدا ۇستاۋعا ۋادە بەردى.
جيىن بارىسىندا پارتيا قالالىق فيليالىنىڭ اتقارۋشى حاتشىسى مەيىرجان وتىنشيەۆ 1594 كاسىپكەر, ياعني 99%-ى 14,5 ملرد تەڭگە كولەمىندە قارجىلاي تولەم العانىن, بۇل باعىتتاعى جۇمىس ءارى قاراي دا جالعاسىپ جاتقانىن مالىمدەدى.
ورال قالاسىندا دارىندى بالالارعا ارنالعان №8 مامانداندىرىلعان مەكتەپ وقۋشىلارىنىڭ اتا-انالارى ءبىلىم وشاعىنىڭ بىرنەشە جىلدان بەرى جوندەۋگە جابىلعانىن, الايدا ەشقانداي جۇمىس جۇرگىزىلمەي جاتقانىن ايتىپ شاعىمداندى.
پارتيانىڭ باتىس قازاقستان وبلىستىق فيليالىنىڭ اتقارۋشى حاتشىسى مۇرات مۇقاەۆتىڭ ايتۋىنشا, وبلىستىق بيۋدجەتتى ناقتىلاۋ كەزىندە جوندەۋ جۇمىستارىنا قاراجات ءبولىندى. جۇمىس باستالىپ كەتتى. ونىڭ اياقتالۋ ۋاقىتى 2023 جىلعى تامىزعا جوسپارلانعان.
شىمكەنت قالاسىندا اسحات ورالوۆ AMANAT پارتياسىنىڭ سايلاۋالدى باعدارلاماسىن ىسكە اسىرۋ اياسىندا پوزيتروندى-ەميسسيالىق توموگرافياعا ارنالعان جابدىق ورناتىلعان قالالىق ونكولوگيالىق ورتالىققا باردى. شىمكەنت قالاسىنىڭ جانە وعان جاقىن ورنالاسقان وبلىستاردىڭ تۇرعىندارى ءالى كۇنگە دەيىن زاماناۋي جابدىقتا تەگىن تەكسەرۋدەن وتە المايدى. سەبەبى پەت-زەرتحانا پايدالانۋعا بەرىلمەگەن.
قالالىق فيليالدىڭ مالىمەتىنشە, توموگراف قىركۇيەك ايىندا ىسكە قوسىلادى.
تۇركىستان وبلىسىنىڭ ساران اۋدانىندا شورناق اۋىلىنىڭ تۇرعىندارى اۋدان قۇرىلعاننان بەرى ءبىر جىلدان استام ۋاقىت وتسە دە, جولدىڭ ناشارلىعىنا جانە كوشە جارىق جوعىنا نازار اۋداردى.
پارتيا ايماقتىق فيليالى باسشىلىعىنىڭ ايتۋىنشا, شورناق اۋىلىنداعى كوشەلەردى اسفالتتاۋ جانە جارىق شامدارىن ورناتۋ جۇمىستارى بيىل جەلتوقسان ايىندا اياقتالادى.
«كەزدەسۋلەردىڭ قورىتىندىسى بويىنشا 88 حاتتامالىق تاپسىرما بەرىلدى. ونىڭ 31-ءى ورىندالدى. قالعانى ورىندالۋ ۇستىندە. ءار تاپسىرمانىڭ ارتىندا قۇر ساندار ەمەس, ادام تاعدىرى تۇرعانىن ءتۇسىنۋ كەرەك. سوندىقتان ەشقانداي ماسەلە نازاردان تىس قالمايدى. وڭىرلىك فيليالدار وسى ماسەلەلەردى شەشۋ جولدارىن تەزدەتىپ, اپتا سايىن اقپارات بەرىپ تۇرۋى ءتيىس», دەدى اسحات ورالوۆ.
