بۇل - قايرات ساتىبالدى ۇلى, گۇلميرا ساتىبالدى مەن قايرات بورانباەۆقا قاتىستى ىستەر.
«قازىرگى ۋاقىتتا تەرگەۋ ورگاندارىنىڭ قابىلداعان شارالارىمەن شامامەن 230 ملرد تەڭگە مەملەكەت ەنشىسىنە قايتارىلدى», دەلىنگەن باس پروكۋراتۋرا حابارلاماسىندا.
سىبايلاس جەمقورلىققا قارسى قىزمەت تەرگەگەن ءىس بويىنشا ايىپتالۋشىلار ءوز ەركىمەن ليحتەنشتەيننەن 170 ملن دوللاردان استام اقشانى قايتاردى.
«قازاقتەلەكوم» اق, «كولىكتىك سەرۆيس ورتالىعى» اق مۇلكىن ۇرلاۋ تۋرالى ىستەر بويىنشا تەرگەۋ ورگانى شامامەن 36 ملرد تەڭگە ءوڭدىردى.
قارجى مونيتورينگى اگەنتتىگى بورانباەۆقا قاتىستى ءىستى تەرگەۋ بارىسىندا 11,3 ملرد تەڭگە وتەگەنىن حابارلادى.
ەسكە سالا كەتسەك, 13 ناۋرىزدا قايرات ساتىبالدى ۇلى ۇستالدى. ال 17 ناۋرىزدا قارجى مونيتورينگى اگەنتتىگىنىڭ ءباسپاسوز قىزمەتى قازاقستاندىق كاسىپكەر قايرات بورانباەۆتىڭ ۇستالعانىن مالىمدەدى. اگەنتتىك كۆازيمەملەكەتتىك سەكتوردا اسا ءىرى مولشەردە قاراجات ۇرلاۋ فاكتىسى بويىنشا قىلمىستىق ءىستى تەرگەۋدە.
قايرات ساتىبالدى ۇلىنىڭ بۇرىنعى ايەلى گۇلميرا ساتىبالدى ۋنيۆەرسيادا-2017 نىساندارىن جوندەۋگە باعىتتالعان قاراجاتتى ۇرلادى دەگەن كۇدىككە ءىلىنىپ,16 ناۋرىزدا ۇستالعان بولاتىن.
ايتا كەتەيىك, وسى جىلدىڭ 5 ماۋسىمىندا پرەزيدەنتتىڭ جارلىعىمەن ەكونوميكالىق رەسۋرستاردى زاڭسىز شوعىرلاندىرۋعا قارسى ءىس-قيمىل ماسەلەلەرى جونىندەگى كوميسسيا قۇرىلدى.
