كوللاجدى جاساعان قونىسباي شەجىمباي, «ەQ»
قۇندىلىقتارعا سۇيەنە وتىرىپ, ادام وزىمەن ءبىر باعىتتا قوزعالاتىن رۋحتاس ادامدارىن تابا الادى. وسى قۇندىلىقتارىنىڭ ءبىرى رەتىندە ادالدىقتى تاڭداسا, وندا ونىڭ ورتاسى مەن ءومىرى تەك ادالدىققا سايكەس قۇرىلۋى كەرەك. ياعني ادەت-عۇرىپتىق, كونستيتۋتسيا مەن ادامداردىڭ مورالدىق-ەتيكالىق نورمالارىنا سايكەس كەلۋگە ءتيىس. ايتپەسە, ادام ۇنەمى ىڭعايسىزدىقتى سەزىنەدى. ەگەر ادام قۇندىلىقتارعا قايشى ارەكەت ەتسە نەمەسە ونى تۇرلەندىرۋدەن باس تارتسا, ونىڭ ەنەرگيا ارنالارى جابىلىپ قالادى. مۇنداي جاعدايدا ونىڭ جۇيكەسى جۇقارىپ, اۋرۋعا شالدىعىپ, باقىتقا جەتە المايدى. ادامنىڭ وي-ءورىس دەڭگەيى وسكەن سايىن, ونىڭ جاۋاپكەرشىلىگى دە ارتا تۇسەدى. سوندىقتان ول قۋاتىن قۇندىلىقتارى وزىنە ۇقسايتىن ادامداردى ءوز ءومىرى مەن ورتاسىنا تارتىپ, ولارمەن قارىم-قاتىناس ورناتۋعا جۇمساعانى ابزال. وسىلايشا, سولاردان قولداۋ تاۋىپ, وسۋگە, دامۋعا مۇمكىندىك تۋادى. ادالدىق ترانسفورماتسياعا اپاراتىن جول رەتىندە دۇنيەنى بولۋدەن گورى, ونىڭ تۇتاستىققا كوشۋىنە جانە ادامنىڭ بويىنداعى جاعىمدى رەسۋرستاردى قالىپتاستىرۋعا جاعداي جاسايدى.
وسى ءۇردىس, ىمىراشىلدىق پەن ادامداردىڭ نادان قالاۋلارىنىڭ باسىمدىققا يە بولۋى قوعامدى تىعىرىققا تىرەرى انىق. ادالدىق ەرتە مە, كەش پە ادام قۇندىلىقتارىنىڭ اراسىنان ءوز ورىنىن الادى. ويتكەنى ادالدىق ءوزى الدانسا دا, ءوزى ەشكىمدى الدامايدى. مۇندايدا ويلى ادامنىڭ ءومىرى ماڭگىلىك مايدانعا اينالىپ, اششى جانە اجارسىز شىندىقتى «بەتكە ايتقاننىڭ ءزارى جوق» دەپ ايتىپ, وسى ۇستانىم كۇش الا باستايدى. بىراق اشىق ايتۋ – انىق ايتۋ بولعانىمەن, اقيقاتتى ايتۋ ەمەس ەكەنىن دە ەسكەرگەن دۇرىس. ادالدىق جانە ادىلدىك جۇرگەن جەردە ەركىن وي مەن اقىل كەرەك. ەندەشە, ادىلدىك – ول تۋرانى قيسىق بۇرماۋ جانە تازا ەڭبەكپەن كۇن كورۋ دەگەن ءسوز. ونى مويىنداۋ – ادال كىسىنىڭ ءىسى. ادىلدىك – كوپتىڭ مۇددەسى. باسقاشا بولعان جاعدايدا جۇرت ازىپ, دۇرىستىق-بۇرىستىقتى بىلمەي ەل ءىشى بەرەكە-بىرلىكتەن ايرىلادى. سوندىقتان تازالىق تازالىققا شاقىراتىنىن ۇمىتپاعان ءجون. سوندا عانا ادالدىق, ادىلدىك جانە اقيقات جالعاندى جەڭەدى. ويتكەنى رۋح – تازا اقىل, ال ادەت-عۇرىپ پەن حالىقتىق ءداستۇرلى قۇندىلىقتارىمىز ەلدىكتىڭ ۇيتقىسى جانە اسىل مۇراسى. اقيقاتتى اقىلدى كوزدەرمەن عانا كورۋگە بولادى. ەندەشە, مەملەكەت باسشىسى ق.توقاەۆ ۇنەمى ايتىپ جۇرگەن كۇيرەگەن رۋحتى قايتا كوتەرۋ قازىرگى تاڭداعى باستى ماقسات. ادالدىقسىز قوعامدى جاڭعىرتۋ, كىسىنى «ۇيقىدان وياتۋ» مۇمكىن ەمەس. ادالدىقسىز ءوزىڭدى-ءوزىڭ تانىپ, بىلە المايسىڭ. ونسىز ءوزىڭنىڭ مەنمەندىگىڭ مەن تاكاپپارلىعىڭدى جەڭۋ دە مۇمكىن ەمەس.
ادال بولعىڭ كەلسە, اراممەن بىرگە بولما. مۇندايلاردان ارا-جىكتى ايىرىپ, ءبىرجولاتا ءبولىنۋ ارقىلى ءومىردىڭ تۇتاستىعىن قامتاماسىز ەتۋدىڭ ماڭىزى زور. بۇل قوعامدى ساۋىقتىرادى. سوندا عانا ازامات ءوزىنىڭ بولمىسىنداعى بارلىق قاسيەتتەرىن تولىققاندى قابىلداۋ ارقىلى عانا الەمنىڭ تۇتاستىعىن تابا الادى. ويتكەنى ول ونىڭ قۇرامداس ءبىر بولىگى رەتىندە عالامدىق نيەتپەن ۇيلەسىمدى بولادى. وسىنى دۇرىس ءتۇسىنۋ ادامنىڭ ءبىلىمىن كەڭەيتەدى. باسقاشا بولعان جاعدايدا قوعامنىڭ دامۋى باياۋلاپ, بىرتىندەپ قۇلدىراپ, توقىراۋعا ۇشىرايدى.
مۇندايدا جاقسى دەنساۋلىق, كىرشىكسىز تازا قارىم-قاتىناس, باسقالاردىڭ تاعدىرىن جاقسارتۋعا ۇلەس قوسۋعا دەگەن قۇلشىنىس پەن تىنىشتالعان اقىل نەمەسە ىشكى تەپە-تەڭدىك قاجەت-اق. سوندا ادام ومىرلىك جاراقاتتارىنان ارىلا باستايدى. سونىمەن بىرگە ادام ءوزىن وسى الەمنىڭ ءبىر بولىگى رەتىندە سەزىنەدى. شىعارماشىلىق پايدا بولىپ, عالامدىق, جالپىعا ورتاق نيەت پەن ۇيلەسىمدىلىكتىڭ بەلگىلەرى كورىنە باستايدى. بۇل قوعامدا مەيىرىمدىلىك پەن سۇيىسپەنشىلىكتىڭ, زايىرلىلىق نيەتتىڭ, ماحابباتتىڭ تاراۋىنا جول اشادى.
ادام نە جاساسا دا ادەمىلەپ ىستەپ, ونى ءتۇسىنۋى جانە قابىلداۋى شارت. بۇعان نيەتتىڭ كۇشى مەن عالامدىق سانانىڭ كەڭەيۋى كومەكتەسەدى. سول سياقتى وسى ماقساتتاردى ىسكە اسىرۋدىڭ ءوزىنىڭ بەلگىلى ءبىر قۇرالدارى بولادى. ەڭ الدىمەن, ادام الدىنا ماقسات قويعاندا «مەن قالايمىن» دەپ ويلاۋدىڭ ورنىنا, «مەن جاسايمىن نەمەسە ىستەپ جاتىرمىن» دەگەنى دۇرىس. بۇل نيەتتىڭ ارتىندا مەن قاجەت نارسەنى جاسايمىن دەگەندى كورسەتەتىن ءىس-ارەكەت پەن ناقتى قيمىل نەمەسە ۇدەرىستىڭ تۇرعانى دۇرىس. جانە ونىڭ ناتيجەسىنەن ادامنىڭ كوڭىلى راحات الۋى كەرەك. ياعني ناتيجەگە قيالدا ەمەس, ناقتى ارەكەت جاساۋ بارىسىندا قول جەتكىزگەننىڭ ماڭىزى وتە زور. ماقساتىن ەلەستەتكەن كەزدە كوپ ادام قيالعا بەرىلىپ كەتىپ, سوندا وتىرىپ قالىپ, ارەكەت ەتە المايدى. ولاردىڭ ءومىر تۋرالى يدەيالارى شىندىقپەن بايلانىستى بولماي شىعادى. سوندىقتان بۇلاردا تولىق قاناعاتتانۋ سەزىمى دە بولمايدى. قيالدىڭ «جۇمىس ىستەمەۋىنىڭ» سەبەبى ادامداردىڭ شەكتەن تىس راتسيونالدى ويلاۋىندا جاتىر.
ەگەر جەردەگى تىرشىلىكتى جوققا شىعارساق, وندا جەر بەتىندە نيەتپەن بايلانىس بۇزىلىپ, ماقساتقا قول جەتكىزۋ مۇمكىن بولماي قالادى. بۇعان ادامنىڭ جۇمىس ىستەۋدىڭ ورنىنا راتسيونالدى ويلاۋى مەن ءومىردى تەرىسكە شىعارۋى كەدەرگى جاسايدى. دەمەك «ۇتىمدى» ويلاۋ, اشۋ جانە وتكەنگە وكىنىشپەن قاراپ جالتاقتاي بەرۋ ءومىردى تەرىسكە شىعارۋعا اكەلىپ سوعادى. ەندەشە, تابىسقا جەتۋ ءۇشىن ادامنىڭ جەر بەتىندە ءومىر سۇرۋگە دەگەن قۇلشىنىسى بولعانى شارت. ول ءومىردى جوققا شىعارۋدىڭ ورنىنا الدىنا ماقسات قويىپ, ءوزىن-ءوزى دامىتۋمەن اينالىسۋى قاجەت. ەڭ باستىسى, ومىردەگى بولىپ جاتقاننىڭ ءبارى نيەتكە بايلانىستى ەكەنىن ۇمىتپاعان ءجون. نيەت دۇرىس بولۋى كەرەك. ول ادامنىڭ العا قاراي ۇمتىلىسىنا قوزعاۋ جاسايدى. ياعني ماقساتتارىمىز ورىندالۋ ءۇشىن جالپىعا ورتاق عالامدىق نيەت سياقتى سىرتقى كىلتتىڭ بولعانى ماڭىزدى. ەندەشە, ەگەر ءبىز ىشكى نيەتىمىزدى سىرتقى, عالامدىق نيەتپەن ۇيلەستىرىپ, سايكەستەندىرە وتىرىپ, ونىمەن قوسىلا الساق, وندا نيەتىمىز العا قويعان ماقساتتارىمىزدى ورىنداۋعا جاعداي تۋدىرادى. ادام وسى عالامدىق نيەتتىڭ ونىڭ ءوزىنىڭ ءون بويى ارقىلى وتۋىنە رۇقسات بەرگەنى قاجەت. بىراق بۇل ەنەرگيا اعىنىنىڭ جەكە سىزدىكى ەمەستىگىن جانە ونىڭ سىزگە تيەسىلى ەمەس ەكەندىگىن دە تۇسىنگەن ءجون. ول ادامنىڭ ىشىندە پايدا بولمايدى. سەبەبى ءبىز عالامدىق نيەتتىڭ ءبىر بولىگىمىز. ول باستاپقى تازا سانادان تۋىندايدى. العاشقى سانادا بارلىعى وڭاي بولسا, ال ادامنىڭ بويىنداعى مەنمەندىك ءبارىن قيسىندى, ويلاستىرىلعان ەتۋ ارقىلى ماقساتتاردىڭ ىسكە اسۋىن قيىنداتىپ, ونىڭ ورىندالۋ مەرزىمىن ۇزاق ۋاقىتقا ىسىرىپ تاستاۋى مۇمكىن. ەگەر ءبىز عالامدىق نيەتتىڭ كۇشىمەن جۇمىس ىستەگىمىز كەلسە, وندا ونىمەن ءوزىمىزدى تەڭەستىرۋىمىز كەرەك.
ومىردەگى ماقساتتاردىڭ ورىندالۋى ادامنىڭ ءوزىن ءوزى جۇزەگە اسىرۋى ماسەلەسىمەن بايلانىستى. ءوزىن ءوزى دامىتۋ دانالىق نۇكتەلەردى بەلسەندىرىپ, ءبىلىمنىڭ كوكجيەگىن كەڭەيتەدى, ءسويتىپ شىندىقتىڭ ارتىنداعى شىندىقتى كورۋگە جاعداي جاسايدى. جەردىڭ ەنەرگياسىمەن فيزيكالىق بايلانىس ورنىعادى. ماقسات ايقىندالىپ, مۇمكىندىكتەر كەڭەيە تۇسەدى. ال ەگەر ادامنىڭ ومىرلىك ماقساتى ونىڭ ءومىرىنىڭ ورتالىعىندا بولماسا, وندا ول جالپىعا ورتاق نيەتپەن ۇيلەسە المايدى. ادامنىڭ ابدەن تيتىقتاپ شارشايتىنى دا وسىدان. ءسويتىپ, سارقىلمايتىن ەنەرگيا كوزدەرىنىڭ جەتكىلىكسىزدىگىن سەزىنە باستايدى. ادامنىڭ سىرتقى فاكتورلارعا تاۋەلدىلىگى قيىندىقتار مەن كەدەرگىلەر تۋدىرارى ءسوزسىز. ءوز ماقساتتارى مەن زايىرلى نيەتتەرىنەن الىستاي ءتۇسىپ, ناقتى ءىس-ارەكەتتەرگە بارا الماي, قولىنان ەشنارسە كەلمەي, ساتسىزدىككە ۇشىراپ, شاراسىزدىققا دۋشار بولىپ, قوسالقى قۋات ىزدەي باستايدى. ونى تەك ەكولوگيالىق ەمەس كوممۋنيكاتسيادان, ىشىمدىك پەن ەسىرتكىدەن تابادى. مۇنداي ارەكەتتەردە ساپا بولمايدى. ول تۇبىندە تەك جاي عانا يلليۋزيا بولىپ شىعادى. عالاممەن ۇيلەسىمدى بولۋ ءۇشىن ادام ءوزىن-ءوزى تارتىپكە كەلتىرۋى كەرەك. سوندا عانا ول ومىرمەن ۇندەستىك كۇيدە بولىپ, كوپتەگەن قاجەتتى تاجىريبە جيناقتاي الادى. ول ءۇشىن اتقاراتىن ءىسىمىزدى جاقسى كورۋىمىز قاجەت. ايتپەسە, جالپىعا ورتاق نيەتپەن ۇيلەسىپ, ونىمەن ۇندەس بولا المايمىز.
جانى تىنىشتالىپ, كوڭىلى ورنىنا تۇسكەن كەزدە عانا ادام ءوز ءومىرىن جاقسى كورە باستايدى. بۇل جەردە باسىمدىقتى تەك ءومىردى جاقسى كورۋگە ەمەس, سول ومىردەگى ءوزىڭدى جاقسى كورۋگە بەرگەن دۇرىس. ەگەر ادام وسىنى تۇسىنبەسە, وندا ونىڭ بويىن ماحاببات پەن بارلىق نارسەنى سۇيىسپەنشىلىكپەن جاساۋدى قۇردىمعا كەتىرەتىن ىسكە اينالدىرادى. ول ادامنىڭ جالپىعا ورتاق نيەتتەن الىس ەكەنىن كورسەتەدى. ويتكەنى ماحاببات ەنەرگياسى – ادامعا ىنتاسىن باسقا ادامدارمەن بولىسۋگە مۇمكىندىك بەرەتىن بىردەن-ءبىر كۇش. ەگەر كىسى ءبارىن تەك ءوزى ءۇشىن جاساسا, وندا عالامدىق اقىلمەن ۇيلەسە المايدى. بۇل جەردە ەگودان ماڭىزدىراق سانانىڭ بار ەكەنى ەسكەرىلۋى كەرەك. ءار ىستەگەن ىسىمىزدەن قانداي ناتيجە الاتىنىمىزدى وسى جوعارى سانا عانا شەشەدى. ولاي بولسا, ءبارىن ءوزىمىز ءۇشىن عانا ەمەس, باسقالار ءۇشىن دە جاساۋىمىز قاجەت. ماحابباتتى ۇنەمى قولعا قونا قالاتىن قۇس دەپ تۇسىنگەن ۇلكەن قاتەلىك. ماحاببات ەنەرگياسى جەلىمدەۋ مەن بىرىكتىرۋگە كەلمەيتىن بولىكتەردى قوسادى, ساقتايدى. كەز كەلگەن ءىس, نيەت سۇيىسپەنشىلىكپەن ورىندالسا, ونىڭ ساپاسى دا جوعارى. سوندا ءبارى ءبىز ويلاعانداي شەشىمىن تابادى.
ادامنىڭ تىلەكتەرىنىڭ ورىندالۋىن قامتاماسىز ەتەتىن جاعداي تۋدىرۋ ءۇشىن كەيبىر العىشارتتار قالىپتاسۋى كەرەك. ەڭ الدىمەن, جالپىعا ورتاق نيەتپەن قوسىلۋدىڭ كەزدەيسوق بولمايتىنىن جاقسىلاپ ۇعىنىپ العان دۇرىس. وسىنداي بايلانىس ارقىلى نيەت اعىنى ادام بويىنان وتە باستاعاندا ناقتى ناتيجەلەر پايدا بولا باستايدى. سوندا نيەت كۇشى كەز كەلگەن ادامعا قول جەتىمدى جانە تيەسىلى بولادى. ادامنىڭ ەگوسى قوعامداعى يميدجگە سايكەس كەلىپ, ءبارىن شەشەتىندىگى كەرەك بولعانىمەن, وندا الدامشى دۇنيەلەردىڭ كوپ بولاتىندىعىن ۇمىتپاعان ءجون. ونىڭ ىعىنا مۇلدەم ءتۇسىپ كەتپەۋدىڭ دە ماڭىزى زور. مۇنداي ادامعا ءوزىنىڭ بىرەۋدەن ارتىقشىلىعىن دالەلدەپ, جارىسقا ءتۇسۋىنىڭ دە قيسىنى جوق. ونىڭ ورنىنا ادامعا ءوزىن ءوزى دامىتۋ ارقىلى ءوز ءومىرىنىڭ ماقساتىن ءتۇسىنۋ باعىتىندا جۇمىس ىستەگەن, بولىنگەن سانادا قالىپ قالماعان, وڭ ەموتسيادا بولعان الدەقايدا تيىمدىرەك.
جاعىمدى ويلار مەن قورشاعان ورتا ادام مەن جالپى قوعامنىڭ ساۋىعۋىنا ىقپال ەتسە, تەرىس ويلار, كەرىسىنشە, اۋرۋدى قوزدىرادى. سوندىقتان پسيحيكالىق زالالسىزداندىرۋ مەن اينالامىزداعى ادامداردا سانالى كوزقاراستىڭ بولعانى ابزال. قوعامدىق قاتىناستار تۋرالى دا وسىنى ايتا الامىز. مۇنداي دەرتتەن اۋلاق بولۋ ءۇشىن الدىمەن ويدى تازارتۋ كەرەك. وسى تۇرعىدا ميدىڭ پايداسى شامالى. ويتكەنى ونىڭ «قولى» تەك قازىرگى جاعدايعا عانا تيەدى. ول ءۇشىن ادامنىڭ نە ويلايتىنى ماڭىزدى ەمەس. بارلىق بيوحيميالىق رەاكتسيالار ءبىزدىڭ دەنەمىزدە, ىشىمىزدە ءوتىپ جاتادى. بۇل ەكى قاراما-قارسىلىقتىڭ بىرىگۋى, ياعني ەكى جاقتىلىق. مىسالى, كەيبىر گۇلدەر لاس توعاندا وسەتىندىگىنە قاراماستان, تازا بولىپ ءوسىپ, گۇلدەيدى. مۇنى تازا نەمەسە سانالى ويلاردىڭ ىقپالى دەلىك. سەبەبى بارلىق جاقسىلىقتار ادامنىڭ ءپوزيتيۆتى ويىنان تۋىندايدى. ەگەر ادام جاقسى ويلارىنا رۇقسات ەتىپ, وعان ەرىك بەرەتىن بولسا, وندا ونىڭ جولى اشىلادى. كەرىسىنشە, ادام بىرەۋگە اقىماقتىق سوزدەر ايتىپ, نامىسىنا تيسە, ءوزى دە ءدال وسىنداي جاعدايعا ۇشىراۋى ابدەن مۇمكىن. ياعني جاماندىقتىڭ ۇرىعىن سەۋىپ, وسىرەتىن ادامنىڭ ءوزى ەكەن. ونىڭ سول قارا نيەتى ەندى ءوزىنىڭ الدىنان شىعىپ وتىر. دەمەك كەز كەلگەن ايتىلعان وي, ءسوز تىركەسى, باعا مەن ءىس-ارەكەت ومىردە ءوز «جەمىسىن» بەرەدى. سول سياقتى ادەمى, تازا باقشاعا جالعىز تال ءارامشوپتىڭ ءتۇسۋى بۇكىل باقشانى قۇرتاتىنى انىق. سوندىقتان جۇماق پەن توزاق, باقىت پەن قايعى-قاسىرەتتىڭ ءبارى ادامنىڭ باسىندا جاتىر. ەندەشە, ويعا قونار ويدىڭ ولمەيتىنىن جانە دۇرىس ويلاۋ ىسكە ۇلاسپاعان جەردە ازاپتىڭ باستالاتىنىن ەسكەرەيىك. باس تەك ويلاي جانە باعالاي الادى. وندا ءىس-قيمىل مەن ارەكەت جوق.
جەر شارىنداعى حالىقتىڭ باسىم كوپشىلىگى مازاسىز سانادا ءومىر سۇرەتىن كورىنەدى. دەمەك وسىنداي كۇي كەشكەن ادامدار ميدىڭ نە تۋرالى ويلايتىنىنا ءمان بەرىپ, ساناسىندا نە بولىپ جاتقاندىعىن قاداعالاۋعا شاماسى كەلمەيدى. ولار, ادەتتە, نەمقۇرايدى ارەكەت ەتەدى, سوندىقتان ولار ءۇشىن ەڭبەك اۋىر جۇمىس نەمەسە ازاپقا اينالادى. ال ويلاناتىن ەش نارسە قالماعان سوڭ, مي ادەتىنشە قيالداي باستايدى. ەندەشە, ادامنىڭ ميىندا وي نەعۇرلىم از بولسا, احۋال سوعۇرلىم وڭالا تۇسەر ەدى. بۇل ادامنىڭ شىنايى الەۋەتىن كورسەتىپ, ۇلكەن پايدا اكەلەرى ءسوزسىز. ايتپەسە, ميعا ەرىك بەرسەڭىز ول جامان, جاقسى ويلار مەن قىسىر اڭگىمەلەردى ساعىز سياقتى «شايناي» بەرەدى. ناتيجەسىندە, تەلەديداردان ۇرىس-كەرىستى, زورلىق پەن زومبىلىقتى, سوعىس پەن ايۋاندىقتى, ز ۇلىمدىق پەن وتىرىكتى كورگەندەردىڭ ءولىم گارموندارى كوتەرىلەرى اقيقات. بۇعان جول بەرمەس ءۇشىن ساناعا, اسىرەسە باستاپقى ينتەللەكتكە, شىعارماشىلىق ورنەككە جانە ىشكى باعىتتاۋشى الەۋەتكە باسا نازار اۋدارۋ قاجەت. سوندا عانا ءاربىر ادامنىڭ رۋحاني ماقساتى جالپىادامزاتتىق سانامەن ۇيلەسىمدىك تاۋىپ, الترۋيستىك, ياعني ءاردايىم باسقالارعا جاقسىلىق تىلەپ, شىن كوڭىلمەن قولۇشىن سوزۋعا تىرىسۋ سياقتى ارەكەتتەرگە باسىمدىق بەرىلەدى.
ەگەر ادام ميىن باسقارماسا, وندا ونىڭ ءومىرى اپاتقا اينالادى. سەبەبى مي ءبارىن ويلاپ تابۋىن توقتاتپاي, قيالداۋدى جالعاستىرا بەرەدى. ادامنىڭ ومىرلىك فۋنكتسيالارى تەجەلىپ, ونى كوپكە دەيىن ساقتاۋ ارقىلى ادامنىڭ بەلسەندىلىك دەڭگەيىن تومەندەتەتىن بلوكتار سوناۋ وتكەن بالالىق شاقتى ەسكە سالادى. وسىنىڭ ءبارىن مي ارقىلى شەشەمىن دەپ ويلاۋدان ەش نارسە شىقپايدى. باس, ياعني مي ءىس جۇزىندە كەرەمەت الدامشى. ويتكەنى اقىل وزىنەن باسقانىڭ ءبارىن كىنالاۋعا شەبەر. ول ارقاشان ءبىر نارسەنىڭ جاڭا نۇسقالارىن «ويلاپ» تابۋعا تىرىسادى. وسىعان بايلانىستى ميدى قاجەتسىز ويدان ادا ەتۋ ارقىلى ادام شىعارماشىلىق الەۋەتىنە يە بولىپ, الدىندا تۇرعان ۇلكەن مىندەتتەردى شەشە الادى جانە ونىڭ ينتۋيتسيامەن بايلانىسى جەڭىلدەيدى. سوندا ادام ءوز ءومىرىن دە جەڭىلدەتەر ەدى. بۇل جەردە اقپاراتتىق ءورىستى لاس, ەكولوگيالىق ەمەس ويلارمەن بىتەپ تاستاۋعا مەيىرىمدىلىك, ىزگىلىك, قۇرمەت پەن سۇيىسپەنشىلىك سياقتى ادامنىڭ باي ىشكى دۇنيەسى جول بەرمەسى انىق. مۇنىڭ قوعام ءۇشىن دە پايداسى زور. ويتكەنى قوعامنىڭ جاسامپازدىق الەۋەتىنىڭ ارتۋىنا ىقپال ەتەتىن دە وسى تازا ويلى دۇنيە ەكەندىگى كۇمانسىز.
