ۆيتەبسكىدە «سلاۆيان بازارى» XXXI حالىقارالىق ونەر فەستيۆالى باستالادى. وسىناۋ اۋقىمدى شارانىڭ رەسمي اشىلۋ ءراسىمى قارساڭىندا قر مادەنيەت جانە سپورت ۆيتسە-ءمينيسترى نۇرعيسا داۋەشوۆ بەلارۋس رەسپۋبليكاسى مادەنيەت ءمينيسترىنىڭ ءبىرىنشى ورىنباسارى ۆالەري گرومادامەن كەزدەستى.
كەزدەسۋ اياسىندا نۇرعيسا داۋەشوۆ قازىرگى ۋاقىتتا ەكى ەل اراسىندا مادەني جوبالاردىڭ, كورمە-جارمەڭكەلەر, كينوفەستيۆالدەر جانە وزگە دە ءىس-شارالار جۇزەگە اسىرىلىپ جاتقانىن اتاپ ءوتتى.
سونداي-اق كەزدەسۋدە 2022 جىلعى 17-20 قاراشادا قازاقستاننىڭ بەلارۋستەگى مادەنيەت كۇندەرى جوسپارلانعانى بەلگىلى بولدى. بەلارۋستەگى قازاقستاننىڭ مادەنيەت كۇندەرى اياسىندا مينسك قالاسىندا قازاقستاندىق ارتيستەر مەن شىعارماشىلىق ۇجىمداردىڭ قاتىسۋىمەن گالا-كونتسەرت وتكىزۋ, قولدانبالى ونەر كورمەسىن ۇيىمداستىرۋ, قازاقستاننىڭ كينو كۇندەرىن وتكىزۋ, عازيزا جۇبانوۆا اتىنداعى مەملەكەتتىك ىشەكتى كۆارتەتتىڭ كونتسەرتى جوسپارلانىپ وتىر.
باسقوسۋدا شىعارماشىلىق ۇيىمدار مەن ۇجىمدار اراسىنداعى ىنتىماقتاستىق ماسەلەسىنە ەرەكشە نازار اۋدارىلدى.
ءوز كەزەگىندە ۆالەري گرومادا ىنتىماقتاستىقتى جانداندىرۋعا جانە بىرلەسكەن جوبالار مەن باستامالاردى جۇزەگە اسىرۋعا دايىن ەكەنىن ءبىلدىردى.
