سۇراقتاردىڭ باسىم بولىگى وتباسىنداعى جانجالدارعا, بالالار مەن پەداگوگتەر اراسىنداعى قارىم-قاتىناسقا, كوپبالالى وتباسىلارعا بەرىلەتىن جاردەماقىلارعا, بۋللينگ جانە جازعى دەمالىستى ۇيىمداستىرۋعا قاتىستى بولدى. ءوتىنىش بەرگەندەردىڭ بارلىعىنا ءتۇسىندىرۋ جۇمىستارى جۇرگىزىلىپ, قاجەتتى پەداگوگيكالىق, پسيحولوگيالىق جانە باسقا دا كومەكتەر كورسەتىلدى.
مىسالى, اكەسىنەن تۇرمىستىق زورلىق-زومبىلىققا ۇشىراعان بالانىڭ اناسىنىڭ ءوتىنىشى بويىنشا الماتى وبلىسىندا تۇراتىن وتباسىنا قامقورشىلىق ورگاندارى, اۋدان اكىمدىگىنىڭ قىزمەتكەرلەرى جانە پوليتسيا قىزمەتكەرلەرى شۇعىل تۇردە جونەلتىلىپ, جاعداي باقىلاۋعا الىندى.
تاعى ءبىر جاعداي, جاس انا تەلەگرام-بوتىنا اكەسى نەمەرەلەرىن شەتەلدە تۇراتىن تۋعان اكەسىنە جىبەرمەي جاتقانىن ايتىپ, كومەك سۇرادى. ماسەلەنى قالاي شەشەرىن بىلمەگەن انا مامانداردىڭ كومەگىنە جۇگىنگەن. قامقورشىلىق ورگاندارى دەپارتامەنتتەرمەن بىرلەسىپ قاجەتتى شارالاردى قابىلدادى. وسىدان كەيىن جاس وتباسى قايتا قاۋىشتى.
ء«بىز ءوتىنىش بەرۋشىلەردىڭ سۇراقتارىنا مۇمكىندىگىنشە جىلدام جاۋاپ بەرۋگە تىرىسامىز. تۇسكەن وتىنىشتەر بويىنشا اتا-انالار مەن بالالارعا قۇقىقتىق جانە پسيحولوگيالىق كومەك جەتىسپەيتىنىن بايقاۋعا بولادى. ءاربىر ءوتىنىشتى پىسىقتاپ, قاجەتتى كومەك كورسەتىپ, بارلىق ءمان-جاي انىقتالىپ, جاعداي تولىق شەشىلگەنشە ءار جاعدايدى ەرەكشە باقىلاۋدا ۇستايمىز. ءار ءوتىنىش 24/7 فورماتىندا شۇعىل تۇردە قارالادى. جىلدام جاۋاپ بەرگەنىمىز ءۇشىن وقىرمانداردان العىس حاتتار دا كەلىپ جاتادى. تەلەگرام-چات بالالاردىڭ قۇقىقتارىن بۇزۋ, كامەلەتكە تولماعاندارعا قاتىستى زورلىق-زومبىلىق نەمەسە قاتىگەزدىك كورسەتۋ جاعدايلارىن جىلدام انىقتاۋعا جانە شەشۋگە كومەكتەسەدى», دەدى بالالاردىڭ قۇقىقتارىن قورعاۋ كوميتەتى توراعاسىنىڭ ورىنباسارى ەلينا پاۋلي.
تەلەگرام-چات ارقىلى وقۋشىلار اراسىنداعى بۋللينگ فاكتىسى دە انىقتالدى. Bala Qorgau telegram-بوتىنا كىشكەنتاي بويى مەن ەرەكشە كەلبەتى ءۇشىن سىنىپتاستارىنىڭ مازاعىنا قالعان وقۋشىدان اقپارات ءتۇستى. ماماندار بالامەن جانە ونىڭ سىنىپتاستارىمەن اڭگىمەلەسىپ, جانجال شەشىلدى.
«بالالارعا پسيحولوگيالىق قولداۋ قاجەت. كوپتەگەن اتا-انا جۇمىستان قولى بوسامايدى جانە بالالارىنا كوپ ۋاقىت بولە بەرمەيدى. سول سەبەپتى اتا-انالاردان بالالارىنا كوڭىل ءبولىپ, اڭگىمەلەسۋىن, ولارمەن جاقىن بولۋىن سۇرايمىز. وسىلايشا قايعىلى جاعدايلاردى بولدىرماۋعا بولادى», دەپ ءتۇسىندىردى ەلينا پاۋلي.
سونداي-اق تەلەگرام-چاتقا مەكتەپتە وقۋشىلار اراسىنداعى اقشا تالاپ ەتۋ جاعدايلارىنا قاتىستى وتىنىشتەر تۇسەدى. مىسالى, تەلەگرام-چاتقا وبلىستاردىڭ بىرىنەن 11-سىنىپ وقۋشىسى حابارلاستى. كوميتەت وكىلدەرى وقۋشىلار اراسىندا قاجەتتى جۇمىستاردى جۇرگىزىپ, پەداگوگتەردىڭ نازارىن وسى ماسەلەگە اۋداردى. ناتيجەسىندە بۇل ماسەلە شەشىلدى.
بالالاردىڭ قۇقىقتارىن قورعاۋ كوميتەتى ءوتىنىش بەرۋشىنىڭ بارلىعىنا قۇقىقتىق جانە پسيحولوگيالىق قولداۋ كورسەتەدى. بۇل باعىتتاعى جۇمىستار جالعاسىن تابادى.
