سولتۇستىك قازاقستان وبلىسى پوليتسيا دەپارتامەنتى ءباسپاسوز قىزمەتىنىڭ مالىمەتىنشە, پەتروپاۆل تۇرعىنى ەسكى گاراجىن بۇزعان كەزدە ەدەن استىنان تۇيىنشەك تاۋىپ العان. ول ماتاعا ورالعان كونە مىلتىق بولىپ شىعادى. ەر ادام تابىلعان زاتتى بىردەن قالالىق پوليتسيا باسقارماسىنا تاپسىرىپتى.
زەرتتەۋ بارىسىندا كريميناليستەر بۇل قارۋدىڭ اڭشى مىلتىعىنا قولدان وزگەرتىلگەن, حالىق اراسىندا «فرولوۆكا» دەپ اتالىپ كەتكەن 1870 جىلعى بەردان ۆينتوۆكاسى ەكەنىن انىقتادى.
تاريحي دەرەككوزدەرگە سۇيەنسەك, XIX عاسىردىڭ اياعىندا بەردان ۆينتوۆكالارى اڭشى مىلتىعى رەتىندە ساتىلعان. كەيىن 1920 جىلدارى بۇل ۆينتوۆكالار تۋلا قارۋ زاۋىتىندا 28-ءشى كاليبرلى قارۋعا وزگەرتىلىپ شىعارىلدى.
«كريميناليستەردىڭ قورىتىندىسىنا سايكەس قارۋ اتۋعا جارامسىز. قازىرگى ۋاقىتتا سيرەك كەزدەسەتىن مىلتىقتى وبلىستىق پوليتسيا دەپارتامەنتىنىڭ مۋزەيىنە تاپسىرۋ ماسەلەسى شەشىلىپ جاتىر. تىركەلمەگەن قارۋدى ءوز ەركىمەن تاپسىرۋ ناتيجەسىندە زاڭسىز ساقتاعانى ءۇشىن قىلمىستىق جانە اكىمشىلىك جاۋاپكەرشىلىكتەن بوساتىلاتىنىن ەسكە سالامىز», دەيدى سقو پد اكىمشىلىك پوليتسيا باسقارماسىنىڭ ەرەكشە تاپسىرمالار جونىندەگى اعا ينسپەكتورى قۇرمان مۋسين.
بۇعان دەيىن بالىق اۋلاۋعا بارعان پەتروپاۆل تۇرعىنىنىڭ قارماعىنا مىلتىق ىلىككەنىن ايتقان ەدىك.
ايانا توعانبەك
