ەلوردا • 01 شىلدە، 2022

ەلوردادا سۋبۇرقاقتان ەنتەروۆيرۋس انىقتالدى

49 رەت كورسەتىلدى

نۇر-سۇلتاندا سۋبۇرقاقتان ەنتەروۆيرۋس رنك-سى انىقتالدى. بۇل تۋرالى ەلوردانىڭ باس سانيتار دارىگەرى سارحات بەيسەنوۆا ءمالىم ەتتى، دەپ حابارلايدى Egemen.kz.

«اۋا رايىنىڭ جىلى بولۋىنا جانە شومىلۋ ماۋسىمىنىڭ باستالۋىنا بايلانىستى ەلوردادا ەنتەروۆيرۋستىق ينفەكتسيامەن سىرقاتتانۋشىلىقتىڭ ماۋسىمدىق ارتۋى بايقالادى. اتاپ ايتقاندا، سوڭعى ەكى اپتادا نۇر-سۇلتان قالاسى بويىنشا سىرقاتتانۋشىلىق دەڭگەيى 2،6 ەسە ءوستى. جالپى جىل باسىنان بەرى 453 ادام اۋىرىپ قالدى. ونىڭ 52 پايىزى نەمەسە 234 جاعداي جازعى كەزەڭگە كەلەدى. بالالار، سونداي-اق يممۋن تاپشىلىعى بار نەمەسە باسقا سىرقات تۇرلەرىنەن السىرەگەن ادامدار بۇل ينفەكتسياعا كوبىرەك بەيىم. جىل باسىنان بەرى تىركەلگەن بارلىق جاعدايلاردىڭ 98 پايىزى نەمەسە 443-ءى - 14 جاسقا دەيىنگى بالالار. قازىرگى ۋاقىتتا 63 بالا ەم الۋدا»، دەدى ول.

ونىڭ ايتۋىنشا، ەپيدەميالىق ماۋسىمدا بالالار اراسىندا ەنتەروۆيرۋستىق ينفەكتسيانىڭ كوپ تارالۋىنىڭ نەگىزگى سەبەبى سۋ قويمالارىندا، باسسەيندەر مەن سۋبۇرقاقتاردا شومىلۋ بولىپ تۇر.

«وسى ءمان-جايلاردى ەسكەرە وتىرىپ، نۇر-سۇلتان قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى تۇرعىندارعا بالالاردىڭ دەنساۋلىعىن ساقتاۋ بويىنشا بارلىق شارالاردى قابىلداۋ جانە ولاردىڭ ومىرىنە قاۋىپ توندىرەتىن بارلىق جاعدايلاردىڭ الدىن الۋ قاجەتتىلىگى تۋرالى كەڭەس بەرەدى»، دەدى سارحات بەيسەنوۆا.

ەستەرىڭىزگە سالا كەتەيىك، استانالىق سانيتاريالىق-ەپيدەميولوگيالىق باقىلاۋ دەپارتامەنتى ەپيدەميولوگيالىق ماۋسىمدا مامىردان قىركۇيەككە دەيىن زەرتحانالىق زەرتتەۋلەرگە سۋ سىنامالارىن الا وتىرىپ، سۋبۇرقاقتاردىڭ سۋ ساپاسىنا سانيتارلىق-ەپيدەميولوگيالىق مونيتورينگ جۇرگىزەدى. زەرتحانالىق زەرتتەۋلەر ناتيجەلەرى بويىنشا سايكەسسىزدىكتەر انىقتالدى.

اتاپ ايتقاندا، لايلىلىق بويىنشا رۇقسات ەتىلگەن ءماننىڭ 1،04 - 1،4 ەسە ارتۋى بايقالادى. سونداي-اق اباي جانە جەڭىس داڭعىلدارىنىڭ قيىلىسىندا ورنالاسقان سۋ بۇرقاقتا ۆيرۋسولوگيالىق كورسەتكىشتەر بويىنشا ەنتەروۆيرۋس رنك-سى انىقتالىپ وتىر.

سوڭعى جاڭالىقتار

ەلوردا «جاسىل» ايماققا ءوتتى

كوروناۆيرۋس • كەشە

ۇقساس جاڭالىقتار