زاڭ قارجىلىق پيراميدالاردى جارنامالاۋعا تارتىلعان ادامداردىڭ جاۋاپكەرشىلىك دارەجەسىن انىقتاۋعا, اراجىگىن اجىراتۋعا جانە جاسالعان قۇقىق بۇزۋشىلىققا مولشەرلەس جاۋاپتىلىققا تارتۋعا مۇمكىندىك بەرەدى.
قۇجاتتىڭ ماقساتى – قارجىلىق پيراميدانى قۇرعانى جانە وعان باسشىلىق جاساعانى ءۇشىن جاۋاپتىلىقتى كۇشەيتۋ, سونداي-اق ازاماتتاردى قارجىلىق پيراميداعا تارتۋعا الىپ كەلگەن اقپاراتتى تاراتقانى ءۇشىن قىلمىستىق جاۋاپتىلىقتى زاڭنامالىق رەتتەۋدى قامتاماسىز ەتۋ.
زاڭ جوباسىمەن قىلمىستىق, قىلمىستىق-پروتسەستىك كودەكستەرىنە وزگەرىستەر مەن تولىقتىرۋلار ەنگىزىلدى.
زاڭ جوباسىنىڭ نەگىزگى مىندەتتەرى:
- قارجىلىق (ينۆەستيتسيالىق) پيراميدالاردى قۇرعانى جانە ولارعا باسشىلىق جاساعانى ءۇشىن جازانى قاتاڭداتۋ;
- قارجىلىق (ينۆەستيتسيالىق) پيراميدا اقپاراتىن ايتارلىقتاي زالال كەلتىرە وتىرىپ, وعان ادامداردى تارتۋعا الىپ كەلگەن جەكە جانە تىكەلەي تاراتقانى ءۇشىن, ونىڭ ىشىندە ەلەكتروندىق اقپاراتتىق رەسۋرستار ارقىلى تاراتقانى ءۇشىن قىلمىستىق جاۋاپتىلىقتى ەنگىزۋ;
- قارجىلىق (ينۆەستيتسيالىق) پيراميدالاردى جارنامالاعانى ءۇشىن تەرگەۋگە جاتاتىندىعىن ايقىنداۋ.
سونداي-اق پالاتا دەپۋتاتتارى «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە قارجىلىق (ينۆەستيتسيالىق) پيراميدالاردىڭ قىزمەتىنە قارسى ءىس-قيمىل ماسەلەلەرى بويىنشا تولىقتىرۋ ەنگىزۋ تۋرالى» ىلەسپە زاڭ جوباسىن دا قابىلدادى.
سەنات توراعاسى ماۋلەن اشىمباەۆ قازىرگى تاڭدا قارجى پيراميدالارى قوعامداعى ەڭ وزەكتى پروبلەمالاردىڭ ءبىرى ەكەنىن جانە قارجى الاياقتىعىمەن كۇرەسۋ ماقساتىندا قولدانىستاعى زاڭنامانى جەتىلدىرۋدىڭ ماڭىزى زور ەكەنىن ايتتى.
«قابىلدانعان زاڭداردا قارجى پيراميدالارىنىڭ جارناماسىن قىلمىس دەپ تانۋ جانە ولاردى قۇرىپ, باسقارعانى ءۇشىن جاۋاپكەرشىلىكتى كۇشەيتۋ كوزدەلگەن. بۇل زاڭدار ازاماتتاردى زاڭسىز قارجى جانە ينۆەستيتسيا جوبالارىنا تارتۋدان قورعاۋدى كۇشەيتەدى. سونداي-اق جاڭا نورمالار قارجى پيراميدالارىنان زارداپ شەككەن ازاماتتار اراسىنداعى الەۋمەتتىك شيەلەنىستى تومەندەتەدى دەپ سەنەمىز», دەدى ماۋلەن اشىمباەۆ.
