قازاقستاندىق قىزدار تاعى ءۇش قولا مەدال جەڭىپ الدى

استانا. 25 ءساۋىر. استانادا ءوتىپ جاتقان كۇرەستەن ازيا چەمپيوناتىنىڭ ءۇشىنشى كۇنى ءۇش قازاقستاندىق قىز قولا مەدالگە قول جەتكىزدى. بۇل تۋرالى egemen.kz حابارلادى. بۇل كۇنى ايەلدەر تۋرنيرىندە ءتورت سالماق كاتەگورياسى بويىنشا ىرىكتەۋ بەلدەسۋلەرى ءوتىر, ءتورت قازاقستاندىق اتلەت قولا مەدال ءۇشىن تالاسۋ قۇقىعىنا مە بولدى. ولاردىڭ اراسىنان كىلەمگە ءبىرىنشى بولىپ 53 كيلوعا دەيىنگى سالماقتاعى جۇلدىز ەشىموۆا كوتەرىلدى. ول جاپون حيكارا سۋگاۆاراعا بارىنشا قارسىلىق كورسەتىپ باقتى. بىراق اقىرىندا ۇتىلىپ قالدى. بۇدان كەيىن ءبىزدىڭ قىزدار الدارىنا قويعان ماقساتتارىن ورىنداپ شىقتى. 55 كيلوعا دەيىنگى سالماقتاعى ايىم ءابىلدينا (سۋرەتتە) وزبەك سەۆارا ەشمۋراتوۆامەن بەلدەسۋدى جەڭىسپەن اياقتادى. 63 كيلوعا دەيىنگى سالماقتاعى الەمنىڭ وتكەن جىلعى جۇلدەگەرى ەكاتەرينا لاريونوۆا ۆەتنامدىق لي تحي حەندى تازا جەڭدى. سودان سوڭ 69 كيلوداعى ەلميرا سىزدىقوۆا تايپەيلىك يۋ تينگە قارسى شىقتى. كۇرەس بويىنا الدا تۇرعان جەرلەسىمىز اقىرىندا جەڭىسكە دە جەتتى. ەسكە سالا كەتەيىك, 24 ءساۋىر كۇنى 48 كيلوداعى تاتيانا امانجول التىن مەدال جەڭىپ العان ەدى. ەندى ايەلدەر اراسىندا ءبىر عانا سالماق بويىنشا بەلدەسۋ قالدى. اتاپ ايتقاندا, ەرتەڭ 75 كيلودان اۋىر سالماقتا كۇش سىناسۋ بولادى. وندا قازاقستاندىقتار قاتارىنان قۇرامانىڭ باس جاتتىقتىرۋشىسى, لوندون وليمپياداسىنىڭ قولا جۇلدەگەرى گيۋزەل مانيۋروۆا ەل نامىسىن قورعايدى. چەمپيونات 27 ءساۋىر كۇنى اياقتالادى. دامير قوجامقۇل. دەرەككوز: egemen.kz. فوتو: vesti.kz.