جالپى كاسىبي مەرەكەلەردى وتكىزۋدىڭ قاتىپ قالعان قاعيداتى بار. قۇتتىقتاۋ شارالارىنىڭ كوبى رەسمي فورماتتا ءوتىپ, لەبىز ءبىلدىرۋ, العىسحات بەرۋمەن شەكتەلەدى. ال ەلورداداعى فيزيكا-ماتەماتيكا باعىتىنداعى NIS-تە وتكەن ءىس-شارا ەرەكشە راۋىشتە ءوتتى.
جۋرناليستەردى قارسى العان وسى باعىتتاعى مەكتەپتىڭ ديرەكتورى مەيرام جاكەنوۆ: «جۋرناليست – قىزىعى مەن قيىندىعى قاتار جۇرەتىن, جاۋاپكەرشىلىگى ۇلكەن ماماندىق. ءتورتىنشى بيلىك وكىلدەرى قاشان دا – قوعامنىڭ ءۇنى ءارى ايناسى. البەتتە, اقپارات مايدانىندا ءجۇرۋ, جاڭالىق تاراتۋ وڭاي شارۋا ەمەس. بۇگىنگە دەيىن سىزدەر ءبىزدىڭ ەلەڭ ەتكىزەرلىك وقيعالارىمىزدى ەلگە جەتكىزىپ, سول ارقىلى زياتكەرلىك مەكتەپتەرىنە, شاكىرتتەرىمىزگە قولداۋ كورسەتىپ كەلدىڭىزدەر. وسى جولى سىزدەردى جۇمىس ىستەپ, جازۋ ءۇشىن ەمەس, مەرەكەلىك كوڭىل كۇيدى سەزىنىپ, ءبىر ءسات رۋحاني دەمالسىن دەپ ارنايى شاقىرىپ وتىرمىز», دەي كەلە اقپارات سالاسىنىڭ وكىلدەرىنە جىلى لەبىزىن ءبىلدىردى.
راسىمەن ءىس-شاراعا شاقىرىلعان ءار جۋرناليست مەديامارافوننىڭ شىن پەيىلمەن, ۇساق-تۇيەگىنە دەيىن ويلاستىرىلىپ جاسالعانىنا كۋا بولدى. الدىمەن مەيرام ءامىرجان ۇلى باستاعان ۇجىم جۋرناليستەرگە فيزيكا-ماتەماتيكا باعىتىنداعى مەكتەپتىڭ تاجىريبەلىك زەرتحانالارىمەن, ءارتۇرلى ۇيىرمە, سەكتسيالارىمەن تانىستىردى. مۇنداعى ۇستازداردىڭ شەبەرلىك دارىستەرىنە جۋرناليستەردىڭ وزدەرى دە قاتىسىپ, ءبىراز سالانىڭ ىشكى الەمىنە ءۇڭىلدى.
مەديامارافوننىڭ العاشقى شەبەرلىك ساباعى كونەدەن كەلە جاتقان كاسىپ ءتۇرى – قىش ونەرىمەن تانىسۋدان باستالدى. قوسىمشا ءبىلىم بەرۋ پەداگوگى اسان بورونچينوۆ قالام ۇستاعان قاۋىمعا ساز بالشىقتان قۇمىرا, توستاعان, تاباق, ءتىپتى سازسىرناي جاساۋدىڭ قىر-سىرىن كورسەتتى. قىزىق ءبىزدىڭ قولىمىزعا نەبارى 300 گرامدىق ساز ۇستاتقاندا باستالدى. ونى يلەۋدىڭ ءوزى كۇش ەكەن. دۇرىس يلەنبەسە, ىستەگەلى تۇرعان «عاجايىپ» تۋىندىڭنىڭ ءپىشىنى دۇرىس شىقپايتىنى بىلاي تۇرسىن, كەپكەندە ۇگىتىلىپ سىنىپ كەتەدى. ودان كەيىن ءيى قانعان سازدى ۇزدىكسىز اينالىپ تۇرعان قۇمىراشى شەڭبەردىڭ ورتاسىنا دالدەپ جاپسىرۋ, ودان قالاعان ءپىشىندى جاساپ شىعارۋ اجەپتاۋىر كۇش-جىگەر مەن شەبەرلىكتى قاجەت ەتەدى ەكەن. كەراميست-شەبەر گونچارلىق ونەر ءبىر كۇندە ۇيرەنەتىن ءىس ەمەس ەكەنىن, وعان ءبىراز ۋاقىت قاجەت ەكەنىن ءتۇسىندىردى.
بۇدان كەيىن «شەبەر-Art» شەبەرلىك ساباعى ءوتىپ, وندا جۋرناليستەر ونەر ءپانىنىڭ وقىتۋشىسى التىن ەرعازينامەن بىرگە, ەكولوگيالىق سومكەلەرگە ترافارەتتىڭ كومەگىمەن ءتۇرلى سۋرەت سالۋعا ماشىقتاندى.
ال قوسىمشا ءبىلىم بەرۋ پەداگوگى سالتانات وماروۆانىڭ «ارت-ديزاين» دارىسىندە قاتىسۋشىلار فەتردەن ۇلتتىق ناقىشتاعى شاعىن سومكە جاساۋدى ۇيرەنىپ, ولاردى ءتۇرلى اشەكەيلەرمەن بەزەندىردى.
ونەر ءپانىنىڭ مۇعالىمى ورازبەك ەشانوۆتىڭ دا ساباعى تاعىلىمدى بولدى. قالام ۇستاعان قاۋىم اعاشتان بەسىك جاساۋدى ۇيرەنىپ, دايىن بولشەكتەردى قۇراستىردى. شەبەر ۇستاز بەسىكتىڭ قادىر-قاسيەتىن ءتۇسىندىرىپ, اتادان بالاعا مۇرا بولىپ كەلە جاتقان قۇندىلىعىمىز ءار قازاقتىڭ تورىندە تۇرۋعا ءتيىس ەكەنىن ايتتى.
ەستەرىڭىزدە بولسا, وسى فيزيكا-ماتەماتيكا باعىتىنداعى زياتكەرلىك مەكتەبىنىڭ 2021-2022 وقۋ جىلى دومبىرا ساباعىمەن اياقتالىپ, مىڭنان استام وقۋشى ەلىمىزدىڭ ەڭبەك سىڭىرگەن مادەنيەت قايراتكەرى ايتجان توقتاعاننىڭ جەتەكشىلىگىمەن قازاقتىڭ كۇيلەرىن دومبىرامەن كۇمبىرلەتكەن ەدى. وسىنشا وقۋشىنىڭ بىرمەزگىلدە ۇلتتىق مۋزىكالىق اسپاپتا ويناۋى «ەڭ اۋقىمدى دومبىرا ساباعى» رەتىندە تىركەلىپ, گيننەستىڭ رەكوردتار كىتابىنا ەنۋگە ۇمىتكەر بولىپ وتىر. مىنە, وسىنداي مىقتى ۇستازدىڭ الدىن جۋرناليستەر دە كورىپ, ا.توقتاعاننان قازاقتىڭ «ەركەم-اي» ءانىن دومبىرادا ويناۋدى مەڭگەردى.
جالپى, NIS-تە ءداستۇرلى وقۋ ۇردىسىمەن قاتار, ۇلتتىق قۇندىلىقتارعا, قازاقتىڭ ەجەلگى قولونەر تۇرلەرىنە دە ەرەكشە كوڭىل بولىنەتىنى بايقالدى.
