ءماجىلىس دەپۋتاتى ەرلان سايروۆ قوعامدىق پالاتانىڭ ماقساتى مەن مىندەتتەرى تۋرالى ارنايى بايانداما جاسادى.
«قۇرىلعالى وتىرعان قوعامدىق پالاتا ۇلتتىق قۇرىلتاي فورماتىن شىعارماشىلىق تۇرعىدا دامىتا وتىرىپ, ءماجىلىس پەن ازاماتتىق قوعام وكىلدەرى, ساراپشىلار قاۋىمداستىعى اراسىنداعى بايلانىستاردى جۇيەلى تۇردە نىعايتۋعا سەرپىن بەرەدى. پالاتا اياسىندا قوعام وكىلدەرى زاڭ جوبالارىن قاراپ, قوعامدىق ساراپتاما جاساۋ ارقىلى قوعامداعى وزەكتى ماسەلەلەرگە تاۋەلسىز, وبەكتيۆتى ويلارىن ورتاعا سالا الادى», دەدى ەرلان سايروۆ.
ونىڭ ايتۋىنشا, پالاتا روتاتسيا ءپرينتسيپى بويىنشا جۇمىس ىستەپ, ونىڭ مۇشەلەرى جۇيەلى تۇردە وزگەرىپ تۇراتىن بولادى.
«پالاتا مۇشەلىگىنە پارلامەنتتىك جانە پارلامەنتتىك ەمەس پارتيا مۇشەلەرى, ەلىمىزدەگى پارلامەنتاريزم ماسەلەسىمەن تەرەڭ اينالىسىپ جۇرگەن ازاماتتار, قوعام بەلسەندىلەرى, ءار-ءتۇرلى سالاداعى ساراپشىلار مەن ساياساتتانۋشىلار مۇشە بولا الادى», دەپ قوستى دەپۋتات.
ءماجىلىس توراعاسى ەرلان قوشانوۆ اتالعان قوعامدىق پالاتانىڭ جۇمىسىن تىكەلەي ءوزى قاداعالايتىنىن ايتتى.
«مەنىڭ ويىمشا بۇگىن وتە دۇرىس شەشىم قابىلدانىپ, قوعامدىق پالاتا قۇرىلدى. ەندى ونىڭ قاشان جۇمىس باستايتىنى جونىندە قوسىمشا اقىلداسامىز. بۇل باستاماعا ءاربىر دەپۋتات بەلسەنە قاتىسۋ كەرەك. ونىڭ مۇشەسى بولۋ مىندەتتى ەمەس. بىراق كەز كەلگەن زاڭ جوباسى بويىنشا ايتار پىكىرىڭىز بولسا, ءاربىر دەپۋتات وعان قاتىسا الادى. بۇل جۇمىستى مەن ءوزىم تىكەلەي قاداعالايمىن», دەدى ءماجىلىس سپيكەرى.
