ماۋلەن اشىمباەۆ ۇيىمنىڭ بۇعان دەيىن وتكەن وتىرىسىندا قازاقستان پرەزيدەنتى قاسىم-جومارت توقاەۆ تىڭ باستامالار ۇسىنعانىن اتاپ ءوتتى. سونداي-اق الداعى ۋاقىتتا ولاردى ۇيىم اياسىندا ىلگەرىلەتۋدىڭ ماڭىزدى ەكەنىنە نازار اۋداردى.
«قازاقستان پرەزيدەنتى تۇركى مەملەكەتتەرى ۇيىمى اياسىندا بىرقاتار ماڭىزدى باستامالار مەن ۇسىنىستار جاسادى. ولاردىڭ ءبارى باۋىرلاس ەلدەرىمىز اراسىنداعى جان-جاقتى ءوزارا ءتيىمدى ىنتىماقتاستىقتى ودان ءارى نىعايتۋعا باعىتتالعان. پارلامەنت سەناتى الداعى كەزەڭدە باسقا تۇركى مەملەكەتتەرىنىڭ پارلامەنتشىلەرىمەن بىرلەسە وتىرىپ وسى باستامالاردى جۇزەگە اسىرۋ ءۇشىن بەلسەندى جۇمىس ىستەۋگە نيەتتەنىپ وتىر», دەدى ماۋلەن اشىمباەۆ.
باعداد امىرەەۆ ءوز كەزەگىندە قاسىم-جومارت توقاەۆتىڭ تۇركى مەملەكەتتەرى ۇيىمىنا مۇشە ەلدەردىڭ ەكونوميكالىق جانە مادەني-گۋمانيتارلىق ىنتىماقتاستىعىن ودان ءارى نىعايتۋعا ارنالعان باستامالارىن ىسكە اسىرۋ جولىندا ۇيىم بەلسەندى جۇمىس ىستەپ جاتقانىن جەتكىزدى.
سەنات توراعاسى قازاقستان تۇركى ەلدەرىمەن كوپجاقتى ىنتىماقتاستىقتى دامىتۋعا, ونىڭ ىشىندە پارلامەنتتىك بايلانىستى نىعايتۋعا باسا ءمان بەرەتىنىن ايتتى. ول سونداي-اق 5 ماۋسىمدا ەلىمىزدە وتكەن رەسپۋبليكالىق رەفەرەندۋمعا تۇركپا مەن تۇركى مەملەكەتتەرى ۇيىمىنىڭ بايقاۋشىلارى قاتىسقانىن جانە ولاردىڭ قازاقستاننىڭ رەفەرەندۋمدى تابىستى وتكىزگەنى تۋرالى مالىمدەمە جاساعانىن تىلگە تيەك ەتتى.
