ء«بىز نۇرسۇلتان نازارباەۆ حالىقارالىق اۋەجايىن 2022 جىلى ورتالىق ازيا مەن تمد-داعى ۇزدىك وڭىرلىك اۋەجاي رەتىندە وسى ماڭىزدى ماراپاتقا يە بولۋىمەن قۇتتىقتايمىز. سوڭعى ەكى جىل بۇكىل الەمدەگى اۋەجايلار ءۇشىن وتە كۇردەلى ءارى قيىن كەزەڭ بولدى. ولار COVID-19 پاندەمياسىنا بايلانىستى كوپتەگەن شەكتەۋلەرگە تاپ كەلدى. قازىر اۋە تاسىمالدارى قالىپتى دەڭگەيگە قايتا ورالدى. وسى رەتتە نۇرسۇلتان نازارباەۆ حالىقارالىق اۋەجايىندا اۋە تاسىمالدارى ەڭ جوعارى ستاندارتتارتار بويىنشا ورىندالۋدا. سوندىقتان دا اتالعان بەدەلدى سىيلىقتى وسى اۋەجايعا بەرۋگە شەشىم قابىلداندى», دەپ اتاپ ءوتتى Skytrax باس ديرەكتورى ەدۆارد پلەيستەد.
«World Airport Awards» – الەمدىك اۋەجايلار يندۋسترياسىنداعى ەڭ بەدەلدى ماراپات. ۇزدىكتەر داۋىس بەرۋ ناتيجەسىندە جانە ارنايى جۇرگىزىلەتىن جاھاندىق ساۋالناما بويىنشا انىقتالادى.
«ۇزدىكتەردى انىقتاۋ ءۇشىن الەمدەگى 550-دەن استام اۋەجايداعى جولاۋشىلارعا قىزمەت كورسەتۋ ساپاسى مەن ىڭعايلىلىق جان-جاقتى ساراپتالعان. بۇل سىيلىق – جاھاندىق اۋەجاي يندۋسترياسى ءۇشىن ساپا ستاندارتى بولىپ سانالادى», دەيدى «نۇرسۇلتان نازارباەۆ حالىقارالىق اۋەجايى» اق باسقارما توراعاسى عابيت ءتاجىمۇراتوۆ.
قر يندۋستريا جانە ينفراقۇرىلىمدىق دامۋ مينيسترلىگى ازاماتتىق اۆياتسيا كوميتەتىنىڭ توراعاسى تالعات لاستاەۆ الەمدىك بەدەلدى سىيلىقتى الۋدا اۋەجاي جۇمىسشىلارى مەن كوميتەت قىزمەتكەرلەرىنىڭ قوسقان ۇلەسى زور ەكەندىگىن اتاپ ءوتتى. ولار كۇندەلىكتى ەڭبەگى ارقىلى جولاۋشىلار تاسىمالىن ىڭعايلى ءارى قاۋىپسىز ۇيىمداستىرۋدا.
ساۋالناما 8 اي كولەمىندە جۇرگىزىلىپ, وعان 100-دەن استام ۇلت وكىلىنەن تۇراتىن اۋەجاي كليەنتتەرى قاتىسقان. زەرتتەۋ قورىتىندىسى اۋەجايدىڭ كليەنتتەرگە قىزمەت كورسەتۋ ساپاسى جانە تىركەۋ, ۇشىپ كەلۋ, ترانسفەر, ساتىپ الۋ, قاۋىپسىزدىك, پاسپورتتىق باقىلاۋ سىندى نەگىزگى كورسەتكىشتەر بويىنشا شىعارىلعان.
