ءىس-شارا ماقساتى – جاڭا قازاقستانداعى مەملەكەتتىك اپپاراتتى كاسىبيلەندىرۋ جولىنداعى مەملەكەتتىك قىزمەتشىنىڭ بولمىسىن تالقىلاۋ, ءتۇسىنۋ.
كەزدەسۋگە قر پارلامەنتى سەناتىنىڭ دەپۋتاتى نۇرتورە ءجۇسىپ, قر پارلامەنتى ءماجىلىسىنىڭ دەپۋتاتتارى امانجول ءالتاي, جاناربەك ءاشىمجان, نازيليا راززاك, بەرىك بەكجانوۆ, «ەگەمەن قازاقستان» اق باسقارما توراعاسى دارحان قىدىرالى, «حابار اگەنتتىگى» اق باسقارما توراعاسى بەرىك ءۋالي, ەۋروپالىق قۇقىقتار جانە ادام قۇقىقتارى ساراپتامالىق ينستيتۋتىنىڭ ديرەكتورى مارات باشيموۆ, مەملەكەتتىك قىزمەت ىستەرى اگەنتتىگى جانىنداعى قوعامدىق كەڭەس توراعاسى سەرىكجان قاناەۆ, قوعام قايراتكەرى سادىبەك تۇگەل, «KAZGUU» باسقارما توراعاسى تالعات نارىكباەۆ, «Academy of Labour Relations» جشس باس ديرەكتورى بيبىگۇل نۇراشەۆا, جۋرناليستەر دەنيس كريۆوشەەۆ, قانات اۋەسباي, اديل دجاليلوۆ, «ادىلدىك جولى» قوعامدىق بىرلەستىگىنىڭ اتقارۋشى ديرەكتورى ديدار سماعۇلوۆ, «قوعامدىق پىكىر» زەرتتەۋ ينستيتۋتىنىڭ عىلىمي كونسۋلتانتى قالامقاس ەسىموۆا, «KAZGUU» بيزنەس-مەكتەبىنىڭ ديرەكتورى الينا ابدراحمانوۆا, قر ەڭبەك سىڭىرگەن قايراتكەرى قانات ايتباەۆ, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ديرەكتورى ايبولات جاۋدىر, جوعارى كولىك جانە كوممۋنيكاتسيا كوللەدجى ديرەكتورى زۋلفۋحار گايپوۆ قاتىستى.
ءوز سوزىندە قازاقستان رەسپۋبليكاسىنىڭ مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباەۆ بۇل كەزدەسۋدىڭ ماڭىزدىلىعىن اتاپ ءوتتى.
«مەملەكەتتىك قىزمەت ول پايدا تابۋ مەن كۇن كورۋدىڭ قۇرالى دەپ قابىلداۋدان الدە قايدا بيىك تۇسىنىك. ول – پارىز, ادامشىلىق بورىش, حالىقتىڭ سەنىمى. ءار ازاماتتىڭ ەلدىڭ الدىنداعى ادامشىلىق ميسسياسى – ەلگە قىزمەت ەتۋ. بۇل زور مارتەبە. سانادا وسىنداي تۇسىنىكتەردى ورنىقتىرعان كەزدە عانا ادال نيەتتى, ءادىل, حالىققا قىزمەت ەتۋدى پارىز دەپ سانايتىن قىزمەتشىلەردىڭ تولقىنى قالىپتاسادى. كەرىسىنشە جاعدايدا ەل ءۇشىن ەمەس, جەكە باس ءۇشىن قىزمەت جاساۋ باستى ماقساتقا اينالادى. سوندىقتان باستى ۇستانىم – ادال نيەتپەن ەلگە قىزمەت ەتۋ بولۋى كەرەك. وسى باعىتتا سانالى تۇردە جاڭعىرۋ قاجەت. مەملەكەتتىك قىزمەتشىگە ازاماتتىق سانا, ەلدىك سانا, مەملەكەتشىلدىك سانا باستى قۇندىلىق بولۋى ءتيىس», دەدى ول.
ساراپشىلار مەملەكەتتىك قىزمەتشىنىڭ حالىققا ادال ءارى كاسىبي قىزمەت كورسەتۋى, ونىڭ الەۋمەتتىك جاعدايىن جاقسارتۋ, باق تاراپىنان قولداۋ ارقىلى مەملەكەتتىك قىزمەتتىڭ بەدەلىن كوتەرۋ, مەملەكەتتىك ءتىلدىڭ مارتەبەسى, وقىتۋ باعدارلامالارىنا تاريحي تۇلعالاردىڭ ونەگەسىن ەنگىزۋ تۋرالى ءسوز قوزعادى.
كەزدەسۋدە مەملەكەتتىك قىزمەتشىنىنىڭ حالىق الدىندا اشىق بولۋى, قىزمەتتىك مىندەتتەرىن ورىنداپ قانا قويماي قوعامدا سىبايلاس جەمقورلىققا قارسى مادەنيەتتى قالىپتاستىرۋدا وزگەلەرگە ۇلگى بولۋ كەرەكتىگى ايتىلدى.
كەزدەسۋ بارىسىندا ساراپشىلار ءوز ۇسىنىستارىن ورتاعا سالىپ, مەملەكەتتىك قىزمەتشىنىڭ بولمىسىنا قاتىستى پىكىرلەرمەن ءبولىستى.
ايانا توعانبەك
