ىشكى ىستەر ورگاندارىنا جىل باسىنان بەرى «تەلەفون تەررورشىلارىنان» قانشا جالعان اقپارات كەلىپ ءتۇستى؟ ولاردى قانداي جازا كۇتىپ تۇر؟ حالىقتى ۇرەيلەندىرۋدى ادەتكە اينالدىرعاندارمەن كۇرەس قالاي جۇرگىزىلىپ جاتىر؟ ءىىم ەكسترەميزمگە قارسى ءىس-قيمىل دەپارتامەنتى باسقارما باسشىسىنىڭ ورىنباسارى سپارتاك قابدەنوۆ ءباسپاسوز ءماسليحاتىندا وسى سۇراقتارعا جاۋاپ بەردى.
«جارىلعىش زات قويىلعاندىعى تۋرالى جالعان اقپارات تاراتۋ – جاي عانا بۇزاقىلىق ەمەس, قىلمىستىق جاۋاپقا تارتىلاتىن ارەكەت», دەيدى ءىىم وكىلى. ونىڭ ايتۋىنشا, تەلەفونمەن وتىرىك مالىمەت بەرەتىندەر بۇل قىلىقتارىنىڭ قانشالىقتى اۋىر ەكەنىن سارالاپ جاتپايدى. مۇنداي ارەكەتتى ادامدار كوبىنە ەرىككەننەن, ءازىل رەتىندە نەمەسە ماس كۇيدە جاسايدى ەكەن.
«جىل باستالعالى بەرى 5 ايدىڭ ىشىندە قىلمىستىق كودەكستىڭ 273-بابى بويىنشا ىستەرى سوتقا جولدانعان 12 ادامنىڭ 11-ءى قىلمىستى ماس كۇيدە جاساعان. «جالعان تەرروريستىڭ» الەۋمەتتىك پورترەتىنە توقتالسام, بارلىق قىلمىستىڭ 88 پايىزىن جۇمىسسىزدار جاساعان», دەدى س.قابدەنوۆ. ءىىم وكىلى تاراتقان مالىمەتتەرگە قاراعاندا, بيىل اشىلعان 19 قىلمىستىڭ 15-ءىن جۇمىسسىزدار جاساعان ەكەن. سونىمەن قاتار كەيىنگى كەزدەرى جارىلعىش زات تۋرالى حابارلامالاردى «تەلەفون تەرروريستەرى» كەك الۋ ماقساتىندا نەمەسە جۇرتتى اۋرە-سارساڭعا سالۋ ءۇشىن باسقا ادامنىڭ اتىنان جولداۋدى جيىلەتكەن.
«الەۋمەتتىك جەلىلەردىڭ, مەسسەندجەرلەردىڭ باسقا دا اقپاراتتىق تەحنولوگيانىڭ دامۋىنا بايلانىستى جالعان حابارلامالاردىڭ ينتەرنەت ارقىلى جولدانۋى كۇرت ءوستى. وسى جىلدىڭ 5 ايىندا ەلەكتروندى حابارلامالار جولداۋ بويىنشا 35 قىلمىستىق ءىس قوزعالدى. ماسەلەن, وتكەن جىلى تەرروريزم اكتىسى تۋرالى 73 جالعان حابار تىركەلسە, بيىلعى 5 ايدا عانا بۇل ساناتتاعى قىلمىستىق ىستەردىڭ سانى 72-گە جەتتى», دەدى مينيسترلىك وكىلى جاعدايدى ءتۇسىندىرىپ.
سپارتاك قابدەنوۆتىڭ ايتۋىنشا, وسى سيپاتتاعى قىلمىستاردى اشۋ وڭايعا سوقپايتىن كورىنەدى. سەبەبى اقپاراتتىڭ اق-قاراسىن انىقتاۋ ىشكى ىستەر ورگاندارى قىزمەتكەرلەرىنىڭ ايتارلىقتاي ۋاقىتىن الادى.
«ناۋرىز ايىندا كولىكتەگى پوليتسيا دەپارتامەنتى قوستاناي وبلىسىنىڭ قىزمەتكەرلەرىمەن بىرلەسىپ, الماتى جانە نۇر-سۇلتان قالالارىنداعى ءارتۇرلى 36 وبەكتىنىڭ ەلەكتروندى پوشتالارىنا جالعان حابار جولداعان قوستانايلىق تۇرعىندى ۇستادى. قازىرگى ۋاقىتتا قىلمىستىق ءىس سوتقا جولداندى. سونداي-اق اتىراۋ وبلىسىندا دا ءبىر وقۋشى ساباقتىڭ شىرقىن بۇزۋ ءۇشىن مەكتەپتىڭ ەلەكتروندى پوشتاسىنا حابارلاما جولداعان. جالپى, مەجەلى مەرزىمدە تەرگەۋ اياقتالىپ, 12 قىلمىستىق ءىس سوتقا جولداندى. 5 ادامعا قاتىستى سوت ۇكىمى شىقتى, ەكى ادام باس بوستاندىعىنان ايىرۋعا, ەكى ادامنىڭ بوستاندىعىنا شەكتەۋ قويۋعا, ءبىر ادامدى شارتتى مەرزىمگە سوتتاۋ جونىندە شەشىم شىقتى», دەدى ءىىم وكىلى.
جالپى, مۇنداي قىلمىستاردى مەكتەپ وقۋشىلارى دا ادەيى ۇيىمداستىرىپ جاتاتىن جاعدايلار كەزدەسەدى. وسى ورايدا اتا-انالار 14 جاسقا تولعان بالانىڭ جاۋاپكەرشىلىكتەن قاشىپ قۇتىلا المايتىنىن قاپەرىنەن شىعارماسا دەيسىڭ.
