ناۋرىز ارايى

ءتورت قۇبىلامىزدى تەڭ ەتەر جىلدىڭ ءتورت مەزگىلىنىڭ تورەسى – كوكتەم ايى – ناۋ­رىز – تامىرىن تەرەڭنەن تارتقان, بەرەكە مەن تاتۋلىق­­­تىڭ, تازالىق پەن ىزگىلىكتىڭ تۇعىرىن نىعايتاتىن, جاڭا­شىل­دىقتىڭ, ىزگىلىك­تىڭ بەلگىسى. كەشە وسىناۋ جىل باسى – ءاز ناۋرىزدى قازاق ۇلتتىق اگرارلىق ۋنيۆەر­سيتە­تىنىڭ ۇجىمى دا كەڭ كولەمدە سالتاناتتى تۇردە اتاپ ءوتتى. «ناۋرىز – جاڭارۋ مەرەكەسى!» اتتى دۋمانعا ۋني­ۆەرسيتەت ۇستازدارى, ستۋدەنت­تەرى­مەن قاتار شەتەل­دىك قوناقتار, ەسىمدەرى ەلگە بەلگىلى عالىمدار, عىلىمي-زەرتتەۋ ينستيتۋتتارى باسشىلارى مەن ءوندىرىس پەن شارۋاشىلىق جەتەكشىلەرى, قوعام قايراتكەرلەرى, قالامگەرلەر مەن ونەر مايتالماندارى قاتىسىپ, بىرگە تويلادى. بۇل كۇنى وقۋ ورنىنىڭ باس عي­ما­راتىنىڭ الدى ادەتتەگىدەن ەرەك­شە كۇيگە ەندى. جاعالاي كيىز ۇيلەر تىگىلىپ, ايشىقتى بەزەن­دى­رىلگەن. كۇمبىرلەگەن كۇي مەن قازاقى اۋەزدى اۋەن الماتى اسپانىندا اۋەلەپ تۇردى. ناۋرىز تويى­نىڭ شىمىلدىعىن ۋني­ۆەر­سي­تەتتىڭ حالىق اسپاپتار ءانسامبلى «اتا تولعاۋى» كۇيى­مەن اشسا, «تابيعاتتىڭ ويانۋى» قويى­­لىمى مەن ەل بىرلىگىن, بەرە­كە­سىن, تى­نىشتىعىن تىلەگەن قى­دىر اتا­نىڭ باتاسى دا جينالعان قاۋىم­نىڭ ەڭسەسىن ءبىر كوتەرىپ تاستادى. – اتا-بابالارىمىز سان عاسىر ارمانداعان ازاتتىق پەن ەركىندىك بۇگىنگى ۇرپاقتىڭ ەنشىسىنە ءتيدى, – دەدى قازاق ۇلتتىق اگرارلىق ۋنيۆەرسيتەتىنىڭ رەكتورى, اكادەميك تىلەكتەس ەسپولوۆ سالتاناتتى جيىندى اشىپ. تاۋەلسىزدىك – ءبىز ءۇشىن ەڭ قاسيەتتى قۇندىلىق. وسى قۇندىلىق ارقىلى بىزگە ءتول ءداستۇرىمىز, مادەنيەتىمىز بەن ءتىلىمىز, ەڭ اسىل مەرەكەمىز ناۋ­رىز تويى قايتا ورالدى. بۇگىندە ەگەمەندىگىمىزدىڭ ارقاسىندا ەلى­مىز ەلەۋلى جەتىستىكتەرگە جەتىپ, بيىك بەلەستەردى باعىندىردى. ەل­باسىمىز نۇرسۇلتان نازار­باەۆ­تىڭ ساليقالى ساياساتىنىڭ ءناتي­جەسىندە قازىرگى قازاقستان بۇكىل الەم مويىنداعان مەملەكەتكە اينالدى. قازاق ۇلتتىق اگرار­لىق ۋنيۆەرسيتەتى بۇل كۇندەرى اگرار­لىق سالا ماماندىقتارى بويىنشا رەسپۋبليكالىق وقۋ-ادىستەمە ورتالىعى, ۇزدىكسىز اگرارلىق ءبىلىم بەرۋدى دامىتۋ, فەرمەرلەردىڭ بىلىكتىلىگىن ارتتىرۋ ورتالىعى, اكادە­ميالىق ۇتقىرلىقتى دامىتۋ بويىنشا ۇيلەستىرۋشى بولىپ تابىلادى. سونداي-اق, ۋنيۆەر­سي­تەت الەمنىڭ 300-دەن استام اگرارلىق جوعارى وقۋ ورىندارىن بىرىكتىرەتىن جاhاندىق كونسور­تسيۋم مۇشەسى. بۇعان قوسا قۇرامىنا «قازاگرو» ۇلتتىق حولدينگى, قر الەۋمەتتىك-كاسىپكەرلىك كورپوراتسياسى, ۇلتتىق, ترانسۇلتتىق كومپانيالار كىرەتىن اگرارلىق عىلىمي-وندىرىستىك كونسورتسيۋ­مى قۇرىلعان. بۇل رەتتە ۋنيۆەر­سيتەتىمىز جاڭعىرتۋ, يننوۆاتسيا, عىلىم مەن ءوندىرىستىڭ ينتەگراتسياسى جانە حالىقتىڭ ءال-اۋقاتى سىندى مەملەكەت انىقتاپ بەرگەن ءتورت باعىتتى ۇستانۋدا. ناۋرىز تويىندا وقۋ ورنىنىڭ جانىنان قۇرىلعان «گۇلبانۋ» ءان-بي ءانسامبلى مەن تالانتتى ۇستاز­دار مەن وقىتۋشىلار دا ونەر­لە­رىن ورتاعا سالدى. بۇعان قوسا ەڭ ءدامدى ناۋرىز كوجە دايىن­داپ, ۇلت­تىق كيىمدەردىڭ وزىق ۇلگى­سىن كورسەتكەن فاكۋلتەتتەر مەن ۋني­ۆەرسيتەتتىڭ وزگە دە قۇرى­لىمدىق بولىمشەلەرىنە ءتيىس­تى دارەجەدەگى ماراپاتتار مەن باعالى سىي­لىقتار تابىس ەتىلدى. مەرە­كە بارىسىندا قوناقتار ارنايى ءتى­گىلگەن قازاقي ۇيلەر مەن اق داستار­قان باسىندا ۋنيۆەرسيتەت ۇجىمى ءازىر­لەگەن ناۋ­رىز كوجەدەن ءدام تاتتى. گۇلزەينەپ سادىرقىزى, «ەگەمەن قازاقستان». ––––––––––––– سۋرەتتى تۇسىرگەن م.بوتابەكوۆ.