«ونەگە-بەيسەن-سايقىن» تاسجولىندا اۋقىمدى جۇمىس باستالدى. جول سالۋ 2 ۋچاسكە دە ءجۇرىپ جاتىر. ءبىرى 0-دەن 50-ءشى شاقىرىم ارالىعى, ەكىنشى ۋچاسكە 50-دەن 103-كە دەيىن. اتالعان باعىتتاعى جولدىڭ ۇزىندىعى 103 شاقىرىمدى قۇرايدى. 2 مەردىگەر كومپانيا جۇمىس ىستەپ جاتىر, ەكەۋى دە جەرگىلىكتى. جۇمىسشىلار مەن تەحنيكا جەتكىلىكتى, ءبىر عانا ماسەلە جول قۇرىلىسى ماتەريالدارىن جەتكىزۋ جاعىنان كەدەرگىلەر بار. ماسەلەنى شەشۋ ءۇشىن بۇگىندە قازاقستان تەمىر جولى كومپانياسىمەن كەلىسىم جۇرگىزىپ جاتىرمىز. جول قۇرىلىسى ماتەريالدارىن جەتكىزەتىن ۆاگون سانىن ارتتىرۋدى سۇراپ وتىرمىز», دەدى قازبەك مامبەتوۆ ءباسپاسوز تۋرى بارىسىندا.
«ونەگە-بەيسەن-سايقىن» تاسجولىن سالۋعا 170-كە جۋىق جۇمىسشى مەن 100-دەن استام تەحنيكا جۇمىلدىرىلدى. «قازىرگى ۋاقىتتا 12 شاقىرىم اسفالت توسەلدى. جەر توسەمىن ورناتۋ, جول توسەمەسىنىڭ تومەنگى قۇرىلىمىن سالۋ جانە تاعى سول سياقتى جۇمىستار جالعاسىپ جاتىر. سونداي-اق ينەرتتى جانە قۇرىلىس ماتەريالدارىن دايىنداۋ جۇمىستارى دا قاتار جاتىر. جولدى قولدانىسقا 2023 جىلدىڭ سوڭىندا بەرۋ جوسپارلانىپ وتىر», دەيدى ول.
ەسكە سالا كەتسەك, تاياۋدا بقو-داعى كۇرە جولدار پروبلەماسى پرەزيدەنتتىڭ نازارىنا ىلىككەن ەدى.
مەملەكەت باسشىسى ۇزاق جىلدار بويى شەشىلمەي كەلە جاتقان باتىس قازاقستان وبلىسىنداعى جول پروبلەماسى بويىنشا ۇكىمەتكە جانە ايماق باسشىسىنا تاپسىرما جۇكتەدى.
