«دامۋ» كاسىپكەرلىكتى دامىتادى

«دامۋ» كاسىپكەرلىكتى دامىتۋ قورى» اق وڭدەۋشى ونەركاسىپتەگى شاعىن جانە ورتا بيزنەس سۋبەك­تىلەرىن قارجىلاندىرۋ ءۇشىن 100 ميلليارد تەڭگەنى ورنالاستىرۋ تۋرالى ەكىنشى دەڭگەيلى بانك­تەرمەن نەسيە كەلىسىمىنە قول قويدى. بۇل جايىندا پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن كەزەكتى بريفينگتە «دامۋ» كاسىپكەرلىكتى دامىتۋ قورى» اق باسقارما ءتورايىمى ءلاززات يبراگيموۆا اڭگىمەلەدى. نەسيە كەلىسىمى «دامۋ» كاسىپ­كەرلىكتى دامىتۋ قورى» اق پەن 13 وتاندىق ەكىنشى دەڭگەيلى بانكتەر اراسىندا 2 پايىز مولشەرلەمەمەن 20 جىل مەرزىمگە دەيىن جاسالعان. قۇجاتقا سايكەس اتالعان قارجىنى ەكىنشى دەڭگەيلى بانكتەر وڭدەۋشى ونەركاسىپ جوبالارىن ىسكە اسىراتىن شاعىن جانە ورتا بيزنەس كا­سىپكەرلەرىنە التى اي ىشىندە بەرۋلەرى ءتيىس. بانكتەر شاعىن جانە ورتا بيزنەس كاسىپورىندارىن ونەركاسىپتى دامىتۋ باعدارلاماسى بويىنشا نەسيەلەندىرەدى. «بانكتەرگە وسى باعدارلاما اياسىندا قانداي دا ءبىر كوميسسيا, ايىپپۇل, ءوسىمپۇل تۇرلەرىن الۋعا تىيىم سالىنادى جانە بۇل قارجى ۇلتتىق قوردىڭ رەسۋرستارى بولعاندىقتان, ولار وتاندىق تاماق, توقىما, مەتاللۋرگيا جانە ماشينا جاساۋ ونەركاسىپتەرىنە بەرىلەدى. «دامۋ» قورى شاعىن جانە ورتا بيزنەس وكىلدەرى نەسيەنى قاراستىرۋعا ارتىق كوميسسيا تولەمەس ءۇشىن بارلىق پروتسەدۋرالاردى ەگجەي-تەگجەيلى باقىلايدى. سونىمەن قاتار, ءبىز بانكتەردى ىنتالاندىرامىز. ولارعا ورتاق قارجىلاندىرۋ كورسەتىلەدى جانە جوبالارعا باسقا دا قوسىمشا رەسۋرستار تارتاتىن بولامىز», دەيدى «دامۋ» كاسىپ­كەرلىكتى دامىتۋ قورى» اق باس­قارما ءتورايىمى ءلاززات يبرا­گيموۆا. بۇل يگى شارا مەملەكەت باس­شىسىنىڭ ەكونوميكاعا قولداۋ كورسەتۋ مەن ونىڭ ءوسىمىن 6-7 پايىز دەڭگەيىندە قامتاماسىز ەتۋ تۋرالى تاپسىرماسىن ىسكە اسى­رۋدىڭ العاشقى قادامى. وسى قاراجاتتى ءبولۋ شاعىن جانە ورتا بيزنەستىڭ جاڭا جوبالارى بويىنشا ينۆەستيتسيالىق قىز­مەتتەرىن ىنتالاندىرادى. سونداي-اق, كاسىپكەرلەرگە نەسيە­لەرىن اسا ءتيىمدى شارتتارمەن قايتا قارجىلاندىرىپ, تۇراقتى جۇمىسىن جالعاستىرۋعا جانە وندىرىستىك قىزمەتىن ىسكە اسىرۋعا مۇمكىندىك تۋعىزادى. ءابدىراحمان قىدىربەك, «ەگەمەن قازاقستان».