ساعات 11:06-دا قازاقستان كوشەسى, 59-دا ورنالاسقان عيماراتقا جارىلعىش زات سالىنعانى تۋرالى حابارلاما كەلىپ تۇسكەن. شۇعىل قىزمەتتەر تەكسەرۋ جۇرگىزۋ ءۇشىن وقيعا ورنىنا شىقتى.
«كەلۋشىلەر مەن قىزمەتكەرلەر قاۋىپسىزدىك ماقساتىندا ەۆاكۋاتسيالاندى. تەكسەرىس ناتيجەلەرى بويىنشا كەلىپ تۇسكەن اقپارات جالعان بولىپ شىقتى», دەلىنگەن شقو جپق ءباسپاسوز قىزمەتى تاراتقان حابارلامادا.
اتالعان فاكتى قر قك 273-بابى بويىنشا تىركەلىپ, سوتقا دەيىنگى تەرگەۋ باستالدى.
سول كۇنى ساعات 15:32-دە «102» ارناسىنا اۋەجايدا باگاجدى سكانەرلەگەن كەزدە كۇدىكتى زات تابىلعانى تۋرالى حابارلاما كەلىپ ءتۇستى.
«قازىر وقيعا ورنىندا شۇعىل قىزمەتتەر جۇمىس ىستەپ ءجۇر, كەلىپ تۇسكەن اقپارات تەكسەرىلەدى. جولاۋشىلار مەن قىزمەتكەرلەر ەۆاكۋاتسيالاندى», دەلىنگەن حابارلامادا.
ءتيىستى تەكسەرۋدەن كەيىن اۋەجاي ءوز جۇمىسىن شتاتتىق رەجيمدە قايتا باستايدى.
