ەلوردا تورىندە وتكەن ءىس-شاراعا مادەنيەت مارقاسقالارى مەن ونەر الەمىنىڭ دارابوزدارى, مەملەكەت جانە قوعام قايراتكەرلەرى جانە ءار سالا بويىنشا قاتارىنان وزا شاۋىپ بايگە العان شىن ۇزدىكتەر قاتىستى. فورۋمدى قۇتتىقتاۋ سوزىمەن اشقان مادەنيەت جانە سپورت ءمينيسترى داۋرەن اباەۆ تاۋەلسىز ەلدىڭ كوك بايراعى جالىندى جاستار مەن دارىندى ازاماتتار ارقىلى قاي كەزدە دە بيىكتە جەلبىرەي بەرەتىنىنە سەنىم ءبىلدىردى.
ء«بىز ارقاشان تۋىمىز بەن ءانۇرانىمىزدى, ەلتاڭبامىزدى ماقتان تۇتامىز. ارقاشان اسپان تۇستەس كوك بايراعىمىز ازاتتىعىمىزدى ايقىنداپ تۇرادى. ارقايسىمىزدىڭ جۇرەگىمىزدە جاتتالعان ءانۇرانىمىزدىڭ قاسيەتتى سوزدەرى الەمدى جاڭارتاتىن جەتىستىكتەرگە جەتەلەپ, جىگەرلەندىرسىن. ەلتاڭبامىز ارقاشاندا قازاق مەملەكەتىنىڭ جوعارى بەدەلىنىڭ بەلگىسى بولسىن! بۇل زالدا ەلىمىزدىڭ وزىق ويلى, جاسامپاز جاستارى باس قوسىپ وتىر. مەن سىزدەردىڭ مەملەكەتتىك رامىزدەرگە دەگەن ايرىقشا قاستەرلى قارىم-قاتىناستارىڭىزدىڭ نەگىزىندە ەلگە دەگەن زور ماقتانىش, وتانعا دەگەن شەكسىز سۇيىسپەنشىلىك جانە شىنايى حالىق بىرلىگى تۇرعانىنا كامىل سەنىمدىمىن», دەدى داۋرەن اباەۆ فورۋمعا قاتىسۋشىلارعا ارناعان قۇتتىقتاۋ سوزىندە.
فورۋم اياسىندا بىرنەشە سالا بويىنشا ۇزدىك شىققاندار ارنايى اتالىمدارمەن ماراپاتتالدى. ايتالىق, «عىلىم جانە ءبىلىم» اتالىمى بويىنشا ءبىلىم بەرۋ زەرتتەۋلەرىنىڭ ەۋروپالىق اسسوتسياتسياسىنىڭ ەۋروپالىق بايقاۋىنىڭ جەڭىمپازى اسحات جۇمابەكوۆ, فيزيك, ل.ن.گۋميلەۆ اتىنداعى ەۇۋ زەرتحانا جەتەكشىسى, فيزيكا-ماتەماتيكا عىلىمدارىنىڭ كانديداتى ماكسيم زدوروۆەتس جەڭىستىڭ بيىك تۇعىرىنان كورىنسە, «مادەنيەت جانە سپورت» اتالىمى بويىنشا قىتاي استاناسى بەيجىڭ قالاسىندا وتكەن قىسقى پاراليمپيادا ويىندارىندا قولا جۇلدەگەر اتانعان پارابياتلونشى الەكساندر گەرليتس جانە بەلگىلى تەلەپروديۋسەر, ستسەناريست, «ماسكا» شوۋىنىڭ قازاقستاندىق نۇسقاسىن ەفيرگە شىعارعان گۇلنۇر ماماساريپوۆا جۇلدەگە لايىق دەپ تانىلدى. سونداي-اق, «مەديتسينا جانە ۆولونتەرلىك» اتالىمى بويىنشا QazCovid-in (QazVac) كوروناۆيرۋس ينفەكتسياسىنا قارسى قازاقستاندىق ۆاكتسينانى ازىرلەۋشى كۇنسۇلۋ زاكاريا مەن ەرىكتى ابىلايحان ءابدىراشتىڭ جۇلدىزى جاندى. «ونەركاسىپ جانە اۋىل شارۋاشىلىعى» اتالىمى بويىنشا كاسىپكەر بەيبىت اسانوۆ پەن امانجول ءارىپوۆ, «تەحنولوگيا جانە بيزنەس» نوميناتسياسى بويىنشا وركەن مامىرباەۆ پەن سابىرجان اقباروۆ, «ەرەكشە ەرلىك كورسەتكەن ازاماتتار» اتالىمى بويىنشا گۆاردياشى, اقتوبە قالاسىنداعى قاڭتار وقيعاسى كەزىندە وتان الدىنداعى بورىشىن ابىرويمەن ورىنداپ, ەرلىكتىڭ ەرەن ۇلگىسىن كورسەتكەن ۇلان مىرزاباي مەن سەگىزىنشى قاباتتان قۇلاعالى تۇرعان ءۇش جاسار قىزدى قۇتقارىپ قالعان ءسابيت شونتاقباەۆ جەڭىمپاز اتاندى.
پاتريوتتار فورۋمىندا ءسوز العان ءسابيت شونتاقباەۆ ءوزىنىڭ ارەكەتىن ەرلىككە تەلىمەيتىنىن جەتكىزدى. «ارداقتى باۋىرلار, دوستار! بارشاڭىزدى وسى باسقوسۋدا كورگەنىمە قۋانىشتىمىن. كورسەتكەن قۇرمەت ءۇشىن ايتار العىسىم شەكسىز. ايتكەنمەن مەن ءوز ارەكەتىمدى ەرلىك دەپ ەسەپتەمەيمىن. ونداي جاعدايدا كەز كەلگەن ادام قول ۇشىن بەرەدى. سوندىقتان دا وسى جەردە وتىرعان بارشاڭىزدى پاتريوتتار دەپ ەسەپتەيمىن», دەدى ول ءوز ويىمەن ءبولىسىپ.
پاتريوتتار فورۋمىندا توپ جارعان ازاماتتاردىڭ بارلىعى دا مەملەكەتتىك رامىزدەر كۇنىنە قاتىستى اقجارما تىلەكتەرىن اقتاردى. ءىس-شارا سوڭى كونتسەرتتىك باعدارلاماعا ۇلاستى.
