بۇگىندە بالالارعا ارنالعان كومپيۋتەرلىك ويىندار كوپ. پايدالىسى از. قان-جوسا توبەلەس, كىسى ولتىرۋمەن ءوربيتىن ويىندار جەتكىنشەكتەردىڭ جۇيكە جۇيەسىنە كەرى اسەرىن تيگىزەتىنى راس. ويىننان ۇتىلىپ قالىپ, قابىرعاداعى تۇسقاعازداردى تىرمالايتىن بۇلدىرشىندەردى دە ەستىدىك.
ەستاي اتىنداعى بالالار مۋزىكا مەكتەبىنىڭ ديرەكتورى مەدعات ماناپوۆتىڭ ايتۋىنشا, ەرەكشە ويىن پەداگوگتەرگە بالالارمەن ءونىمدى جۇمىس ىستەۋگە مۇمكىندىك بەرەدى.
– قازىرگى بالالاردىڭ وقۋ جۇكتەمەسى كوپ. اتا-انالاردىڭ قالاۋىمەن ورتا مەكتەپتەن كەيىن قوسىمشا ءبىلىم بەرۋ ۇيىمدارىن جاعالايدى. ودان شارشاپ شىققان وقۋشى سپورت ۇيىرمەسىنە, ودان قالا بەردى مۋزىكا ۇيىرمەسىنە بارادى. مۇنداي كەزدە شارشاعان بالامەن جۇمىس ىستەۋ قيىن. تىعىرىقتان شىعۋ ءۇشىن ارىپتەستەرىمىزبەن بىرگە ويىن جوباسىن قۇراستىرۋدى قولعا الدىق. وعان سايكەس, بالالارعا تاپسىرما بەرىلەدى. ازىرگە 3-4 كەزەڭ قاراستىرىلعان. تاپسىرمانى ورىنداۋ كەزىندە اڭىزدىڭ جەلىسىمەن كۇي شەرتىلىپ, شىعۋ تاريحى باياندالادى. وسىلايشا, ويىن بارىسىندا بالا كۇيدى قالاي مەڭگەرگەنىن سەزبەي دە قالادى. وعان كوزىمىز جەتتى. العاشقى كۇنى-اق تىڭ ءادىس-ءتاسىلدىڭ ناتيجەسىن كورە باستادىق. بالالاردىڭ ىنتاسى ارتا ءتۇستى, – دەيدى مەدعات ماناپوۆ.
ازىرگە جوبادا «اقساق قۇلان» كۇيى عانا بار. الداعى ۋاقىتتا تاپسىرمالاردىڭ سانى ارتىپ, سايكەسىنشە وزگە دە كۇيلەر توپتاستىرىلماق. كۇيدەن بولەك, كلاسسيكا سياقتى جانرلاردى دا ويىنعا ەنگىزۋ جوسپارلانىپ وتىر.
ادەتتە دومبىرا سىنىبىنىڭ تاربيەلەنۋشىلەرىنە كۇيدى تانىستىرۋ ءۇشىن ەڭ اۋەلى ونىڭ شىعۋ تاريحى, قۇرىلىمى ايتىلىپ, سودان كەيىن عانا نوتالارى ۇيرەتىلەدى ەكەن. ەندىگى جەردە ويىن ارقىلى تەوريالىق ءبىلىمدى مەڭگەرتۋ جەڭىلدەگەنىن اتاپ وتكەن ءجون. ۇستازدار پراكتيكا ىسىنە باسىمدىق بەرەتىن بولادى. بۇل ءادىس تەك دومبىرا سىنىبىنىڭ قاتىسۋشىلارىنا عانا ەمەس, مۋزىكا مەكتەبىنىڭ بارلىق تاربيەلەنۋشىلەرىنە ارنالعان. جوبا اۆتورلارىنىڭ كوزدەگەنى دە سول. كەز كەلگەن ۇيىرمەگە قاتىسۋشىنىڭ ويىن ارقىلى كوڭىل كۇيى كوتەرىلىپ, ساباققا دەگەن ىنتاسىنىڭ ارتۋى ماڭىزدى.
ويىن جوباسىن قۇراستىرۋشىلاردىڭ قاتارىندا مۋزىكا مەكتەبىنىڭ ديرەكتورى مەدعات ماناپوۆ, كىتاپحاناشى سامال ابىكەەۆا, باعدارلاماشى سۇلتان بالتاشەۆ جانە دىبىس جازۋشى قىزمەتىن ۇسىنعان جەرگىلىكتى ءانشى باۋىربەك بەكتەمىروۆ بار. قازىردىڭ وزىندە وزگە وڭىرلەردەگى ارىپتەستەرى بايلانىسقا شىعىپ, ويىن جوباسىنا قىزىعۋشىلىق تانىتىپ جاتقان كورىنەدى. اتا-انالار دا مۋزىكا مەكتەبى باسشىلىعىنىڭ ۇيىرمە جۇمىسىنا ءاتۇستى قاراماي, جان-جاقتى ارەكەت ەتىپ جاتقانىنا ءدان ريزا. بالالار ويىننان ۇتىلسا دا, كۇيدى مەڭگەرۋدەن ۇتىلماق ەمەس.
پاۆلودار وبلىسى,
ەكىباستۇز قالاسى
