قسزي ديرەكتورى ءبارى ءبىز ويلاعانداي جىلدام بولمايدى, تۇبەگەيلى وزگەرمەيدى. جارقىن بولاشاققا بايىپتى رەفورمالارمەن جەتەمىز دەدى.
ء«بارى دە ءبىز قالاعانداي جىلدام بولا قويۋى ەكىتالاي. بۇل رەتتە بيلىكتىڭ ورتالىقسىزداندىرىلۋى – ەڭ ماڭىزدى ماسەلە. ويتكەنى بىزدە ەڭ تۇيتكىلدى الەۋمەتتىك پروبلەمالار جەرگىلىكتى جەردە قاتتى بولادى. جول سالۋ, ەمحانا سالۋ سياقتى ماسەلەلەر ءجيى تۋىنداپ جاتادى. مىسالى, قاراعاندى, جەزقازعان, اقتوبە, ارقالىق پروبلەماسى سول وڭىرلەردە شەشىمىن تابۋى ءتيىس. بۇكىل پروبلەمانى تەك نۇر-سۇلتاندا شەشۋ كەرەك دەگەن بولمايدى. قازىر اۋىل اكىمدەرىن, سودان كەيىن اۋدان اكىمدەرىن سايلايمىز. ءبارى ءساتتى بولسا وبلىس اكىمدەرى مەن رەسپۋبليكالىق ماڭىزى بار قالالار باسشىلارىن دا سايلايتىن شىعارمىز. بۇل مۇلدە باسقا جاۋاپكەرشىلىك», دەدى تۇقىموۆ.
ديرەكتور كەڭەسشىسى اسقار نۇرشا بۇگىن ءوز باسىندا داۋىس بەرۋگە قاتىستى قيىندىق تۋىنداعانىن, كەيىن ءبارىنىڭ وڭىمەن شەشىلگەنىن ايتىپ بەردى.
«مەن الماتى قالاسىندا تىركەلگەنمىن. ەلوردادا جۇمىس ىستەگەنىمە كوپ بولعان جوق. مۇندا ۋاقىتشا تىركەۋدە بار بولعاندىقتان داۋىسىمدى بەردىم. باستاپقىدا اتى-ءجونىم تىزىمنەن تابىلمادى. بىراق كەيىن سايلاۋ ۋچاسكەسىنىڭ باسشىلىعىنا جاعدايىمدى ءتۇسىندىرىپ ايتىپ, داۋىس بەرۋ پروتسەسى جۇزەگە استى. مەن ءوزىمنىڭ ازاماتتىق پارىزىمدى وتەگىم كەلدى. ەگەر ءوزىڭ داۋىس بەرمەسەڭ بۇل ءىس-شارانىڭ ماڭىزدىلىعىن باسقاعا ءتۇسىندىرۋ مۇمكىن ەمەس», دەيدى اسقار نۇرشا.
قسزي وكىلى حالىقتىڭ تەز ارادا ۇلكەن وزگەرىستەر جاسالسا دەگەن تىلەگى بار ەكەنىن, بىراق قازىرگى ۇسىنىلىپ وتىرعان وزگەرىستەر مەن تولىقتىرۋلاردىڭ دا ۇلكەن مانگە يە ەكەنىن ءتۇسىندىردى.
«كەي ادامدار بىزدەگى رەفورمالار ونشا تەرەڭ ەمەس دەيدى. ولار بۇدان دا تەرەڭ, تۇبەگەيلى وزگەرىستەر كۇتەدى. بىراق مەنىڭ كەي ارىپتەستەرىم موجاريتارلى جۇيەنىڭ وزگەرىستەر قاتارىنا ەنۋىنە قارسى بولدى. بىزگە ءتيىمدى جانە مىقتى بيلىك كەرەك. ويتكەنى ءالسىز بيلىك داعدارىستىق جاعدايدا احۋالدى باقىلاۋدا ۇستاي المايدى, ەكىنشى جاعىنان بيلىككە دەگەن حالىقتىڭ سەنىمى كەرەك. كونستيتۋتسيا وسى سۇراققا جاۋاپ بەرەدى. جالپى, قوعامنىڭ ءۇمىتى اقتالادى دەپ ويلايمىن. ءبىزدىڭ ارىپتەستەر كەزىندە ۇلتتىق قوعامدىق سەنىم كەڭەسىنە دە قاتىستى. ولاردىڭ ايتۋىنشا, ۇسىنىستارىنىڭ 70 پايىزى وسى ءماتىن پۋلىنا كىردى, سول ماتىننەن تۇزەتۋلەر قالىپتاستىرىلدى», دەدى ساياساتتانۋشى.
رەفەرەندۋم جاقسى ءوتىپ جاتىر. بايقاۋشىلار تاراپىنان دا, حالىق تاراپىنان دا ەشقانداي ارىز-شاعىم كەلىپ تۇسكەن جوق دەيدى. ءوز كەزەگىندە ەركىن تۇقىموۆ رەفەرەندۋمنىڭ باستى مەسسەدجى – ۇلتتى بىرىكتىرۋ ەكەنىن, قازىر بارشامىزدىڭ قوعام كونسوليداتسياسىنىڭ ءجۇرىپ جاتقانىنا كۋا بولىپ وتىرعانىمىزدى جەتكىزدى.
